Read Chang Naga HOSEA 11 Bible Online

HOSEA 11 - Chang Naga bible

HOSEA 11

¹BUNYUBOUei laukei, “Ladang Israel nashou che kikei, kheijinei ngei hao sanoukei hoba Ijep ka kü shou ngakei.

²Lausikei ngei hao aei ngasi, haoen kü ka yongbou satan apbei. Baal shuong to haoenei haitian lembei hoba heangsho shuong to lembei.

³Khei yingasikei Efraim to paila lenbou kho ngo kikei; ngei ngeibü ikei haoen bamjung loukei, lausikei ngei haoen maitikei dogo haoenei ange.

⁴Khunak shousi sanou janglühei ngei haoen leiyeikei, hoba aoei haoeneibü sembung ka janglüh sungan apbukei; hao phatko haoen shanga ngo yeikei, hoba khüpjung yanan ngei haoen pangtei onoukei.

⁵“Hao Ijep kaodak to ngailabü, hoba Assiriabü kho haoeibü Choba yinglabü, aieilausi haoenei kü jungto sepeinyu telongaikho dogo lauda.

⁶Haoeneibü sangnyu shuong thük to in hautilabü hoba koukhin wapnyinkulabü, hoba haoeneibü lapheishona haoen maulabü.

⁷Hobaje kü mütli kü ka sukjung ngaila maang angena, thükkaboua kibou khüto haoenei ngasikei cheei ongkei hao asamlabü.

⁸“O Efraim, ngei no lai litila? O Israel, ngei no lai püetla? Adma tegü ngei no lai yeitila? Zeboim tegü ngei no lai apyola? kü maangponei kho akümtilabü! ka shanga ngeibü onou yongko yaangkei.

⁹Ngeibü kaangbüsekbü khauangei ngei akümlabü, Efraim nyibou mautila ngo asepeilabü. Aishanga ngo Mühghaü, müt aying. ngo Saopobou kan yoa ki. Hobaje ngo khauanga ka jungto alotlabü.

¹⁰“BUNYUBOU phaito haoen pailabü; molosaonyuei tegü haoei ngühkulabü, hoba chanep aeka shousi shuong lühjilühko loulabü.

¹¹Ijep ka au tegü lühjilühko haoen loulabü hoba Assiria kaodak ka guduru tegü loulabü, hoba haoeneibü chema haoen kitilabü, dogo BUNYUBOUei lauda.”

¹²BUNYUBOUei lauda, “Amlangbüei Efraimei ngo kailepa, hoba Israel chung khüpsilangei kailepa; lausikei Jihudaeije Mühghaü ngeakei, hoba saopobü Mühghaü to maang lemakei.