Read Chang Naga HOSEA 12 Bible Online

HOSEA 12 - Chang Naga bible

HOSEA 12

¹“Efraim yeia samda, hoba chanyu angbou yei phai semda; haoei amlangbü hoba leilutibü athakko yaang yeitida, hoba haoenei Assiria yoa thebülanbü kümda, hoba Ijep to onang jungan atda.”

²Jihudabü yoa tokei BUNYUBOUei lemen che kia, hoba haoeibü kümsilei thüng Jakob shieinangeilabü, haoei kümbü hima hao la ngaitikulabü.

³Nyusema haoei hao jaieibü youdema senetkei hoba hao hau kijinei haoei Mühghaü to tokyokei.

⁴Haü, haoei khuthük hangangbü to wapyokei hoba thükkei, hao haapbei, hoba hao to sukeijakei, haoei hao Bethela lamenkei, hoba khonei Mühghaüei hao to joyokei.

⁵Khei BUNYUBOU, Thükenbou Mühghaü, haoeibü nyen BUNYUBOU ki.

⁶Hibü no kaibü Mühghaü jungto sepeiashi, sanou hoba ngühmai lamashi, hoba kaibü Mühghaü junga athakko haiyeiko kishi.

⁷BUNYUBOUei lauda, “Namyaak namseibü che ika amlangbü seret jungan haoei khüpeilangei kümmang sühda.

⁸Hobaje Efraimei laukei, maimaitham ngo keia, kü shanga nyaksinam hapa, lausikei haoeibü nyaksinam pendouei haoei shonshaibü shabü ladangkei üplabü.

⁹Lausikei ngo Ijep ka no leibabou BUNYUBOU, ka Mühghaü ki, shangied tegü ngei no neichema kitilabü.

¹⁰“Toukei ngei thuseibü shuong to joyokei, hoba mangsang juongnyu ngei hautikei, hoba thuseibü shuong danko ngei ngüh- phatbü juong kukei.

¹¹Gileada shedbü shabü kia longa haoen lepde lejim akibü la yeilabü. Gilgala haoenei masu pongsu kho haitialonga seka kao shapan shangtian phobü tegü haoeneibü lemshon yeilabü.”

¹²Jakob Aram kaodak to satkei hoba Israelei yaksa che shanga kümbeileikei, hoba yak che shanga haoei san lombei.

¹³Thuseibü che danko BUNYUBOUei Israel Ijep ka leian longkei, hoba thuseibü che danko hao thounoukei.

¹⁴Efraimei hao yongko maangto shattikei, hibü haoeibü sii hao thüka phokulabü hoba BUNYUBOUei hao to hakbü hao jungto ngaitikulabü.