Read Chang Naga HOSEA 13 Bible Online

HOSEA 13 - Chang Naga bible

HOSEA 13

¹Ladang Efraimei joyokei, mütshuong lühkei, haoei hao lolo Israela yaangenkei, lausikei ladang hao Baal to phaiyetkei, hao haikei.

²Hobaje tou haoenei aei ong shabü shonda, hoba haoenei chandinam leman heangsho shuong kümda; haoen maanglimaangsang songsidoei kümbü heangsho ki. Khübü shangabü haoenei lauda, “Haoenei mütei lemda hoba masu shoushou shuong to sembung shepda.”

³Hibü haoen ngeyang sangmei tegü hoba tongde satan apbü nin tegü amshang ka yeiei soulangbü youshou sho tegü hoba hokjung ka wankhük satbü tegü kilabü.

⁴Lausikei ngo BUNYUBOU kaneibü Mühghaü Ijep kaodak ka ki, hoba kü to limbo kanei lubü mühghaü aikei angejan, kü to liman khümenbou ao aki.

⁵Ngei kan yama shulin yunglin kaoa ngean kikei.

⁶Lausikei ladang haoen jembü lolo shenan apbei, haoeneibü maangpon yonglaman apbei khoei haoenei ngo maan apbei.

⁷Hibü haoen thedanga ngo molosaonyu tegü yeilabü, kongkhü tegü ngo lam nyangko thoan kilabü.

⁸Ngo haoen to sap jembü shou laplangbü phatko haüyolabü hoba haoen khükjak khapnyinkulabü hoba khünei ngei haoen molosaonyu phatko suilabü, yamkabü meiei tegü haoen shaknyinlabü.

⁹“O Israel, ngei kan leilutilabü, kan to aoei thuila thükla?

¹⁰Touje kan püetla kaneibü Choba ao ki? Kan pü lela kaneibü songdakbü shuong aoyou shanga kanei Choba che hoba songdakbü shuong labü dogo laubü lan ki?

¹¹Ngo khauang maangpoka ngei choba shuong kukei, hoba ngo maangshata haoen ngei sungngaikei.

¹²“Efraimei shed shonbü the- pan phoa, haoeibü shabü thanan phoakei.

¹³Yaksa nahapshat khonku hao jungto loulabü; hao songsihon akibü jayangshou ki, aishanga nasetshang koukhüna lolabü ho jih aying.

¹⁴Sheol ka ngei haoen angngailabü. Haikhün ka ngei haoen khümenabü. O haibü, kaibü shieinangei lanei ki? O hee, kaibü leilutibü lan ki? Maangpon sepeibü kü the ka küpleplabü.

¹⁵Haoeibü jaisinasi yoa hao bukko haako kiasikei, chaangbou yei loulabü; BUNYUBOUeibü yei yam ka longan haoeibü deikhün uan aplabü, hoba haoeibü deikük hapan aplabü, namsek peisilei pendou thanshang ngei leilutikulabü.

¹⁶Samariaei jembü shedbü künlabü, aishanga haoei jembü Mühghaü khulimbo meimeikei, haoen inei tuonglabü haoeneibü nasakshou shuong netla yeiko ngümnyinkulabü, hoba mang- akongbü yaksa shuong nitnyinkulabü.”