Read Chang Naga HOSEA 2 Bible Online

HOSEA 2 - Chang Naga bible

HOSEA 2

¹Kan jaisinasi shuong to “Kü mütli” dogo hoba nousina to, “Onou hapbü shuong” dogo lenshi.

²Kü shousi shuong, kaneibü nyu to suajaashi; aishanga sao kü yak aying, ngo saoeibü lao kei aying hoba sao ka pejapela hoba saoeibü sen kanglang ka asangalanbü aptiashi.

³Khei ayinglonga ngei sao ka neisimei sungan mütkong aptiko hoba sao buknyet tegü phokulabü hoba sao sangliphang tegü hoba sao kaolin tegü phokulabü hoba deilaei sao haitilabü.

⁴Haü, saoeibü shousi shuong to ngei üeisanou akilabü, aishanga haoen khongshou shuong ki.

⁵Aishanga haoeneibü nyuei asangalanbü jungeikei haoeneibü bukbü nyuei himoulabü lele kümbei, aishanga saoei laukei, “Ngei sanoubü shuong aoyouei kü la nyak, ngeibü dei, ngeibü winei, phembanei, ngeibü onang, hoba yunglabü kuda, haoen phai haulabü.”

⁶Hibü chühashi, ngei saoeibü lamnyu ühüplabü lele ngei sao khulimbo ba lelabü.

⁷Hobaje saoei sao to sanoubü shuong phaito semlabü lausikei saoei haoen alaphetlabü; saoei haoen lamlabü, lausikei haoen ühüplabü; kheijinei saoei laulabü, “Ngo haulabü hoba ngeibü shaangbü lao jungto sepeilabü; aishanga kü shanga tou toje kho ong maibou kikei.”

⁸Aishanga sao la youshou hoba ih, hoba onang ngei kukei, hoba Baal shanga jungeibü chandinam hoba hon ngei haatikei dogo saoei angekei.

⁹Hibü youlat jiha ngei ngeibü youshou sungngaian aplabü, hoba ih jihsiphaia ngeibü semlüh dei senetlabü, hoba ngeibü wi si phemba nei sunglanglabü; khonei saoei jembü mütkong aküplepenlabü.

¹⁰Hobaje sao to sanoubü shuongei hapbo ngei sao mütkong phokulabü, hoba kü ik ka aoeikei sao akhümenlabü.

¹¹Hobaje sao olinbü pendou ngei thaktilabü, saoeibü lem shuong hoba saoeibü litnyu haanbü lem hoba saoeibü nousisou hoba saoeibü lemsilang noubüsoubü pendou,

¹²hoba saoeibü semlühlong hoba bhuklong laobou shanga saoei, “Ngo sanoubü shuongei kü la kubü ngeibü mu habü ki,” dogo laukei, khübü kho ngei leilunyu phokulabü, hoba ngei khübü yam la yeitikulabü, hoba yamkabü meisiauei khübü kho shaulabü.

¹³Hobaje Baal lem chaloua ngei sao shieinangeilabü, ao to saoei jen juokkei; hoba ladang kungkabü chimen hoba namsek yak yakan sao sanoubü shuong jungto haukei, hoba ngo maan apbei dogo BUNYUBOUei lauda.

¹⁴Hibü chühashi, ngei sao suletlabü, hoba sangliphang ka sao leian loulabü, hoba sao to eaaoa joyolabü.

¹⁵Hobaje khonei saoeibü semlühlaak hoba Akhor pholi kho maanglem koukhün che tegü ngei sao la kungeilabü, hoba sao medei jihdanga tegü hoba sao Ijep ka longbü chaloua tegü saoei jungeilabü.

¹⁶Hobaje BUNYUBOUei lauda, kho chaloua nyi kü to kü lao dogo ngalabü, hoba touje kü to ngeibü Baal dogo angalabü.

¹⁷Aishanga saoeibü sembung ka Baal nyen kho sunglanglabü hoba haoeneibü nyen tou alaueilabü.

¹⁸Hobaje kho chaloua ngei haoen shanga yamkabü meisiau yoa, müh kabü au yoa hoba kaoa shuongeibü shuong yoa theyolanyobü che kümlabü, hoba kaonyek ka ngei lau hoba in hoba lason leilutikulabü, hoba haoen thushed akiko lekeitilabü.

¹⁹Israel, ngei no ponpen shanga kanlabü, haü, saopobüa, ngühmaia, sanou dambü hoba onoua; kü shanga ngei no kanlabü.

²⁰Maanglemenbüa khei ngei no kanlabü hoba nyi BUNYUBOU to ngalabü.

²¹Hobaje khübü chaloua ngei müt shuong to jongailabü, hoba haoenei kaodak to jongailabü.

²²Hobaje kaodakei youshou to hoba ih to hoba onang to jongailabü hoba haoenei Jezreel to jongailabü.

²³Hobaje kü shanga kaodaka ngei sao kean ongan pholabü hoba üeisanou akibü sao to ngei üeisanou kilabü hoba aoyou kü mütli aying haoen to ngei laulabü, “No kü mütli ki” hoba haoenei laulabü, “No küneibü Mühghaü ki.”