Read Chang Naga HOSEA 4 Bible Online

HOSEA 4 - Chang Naga bible

HOSEA 4

¹O kan Israelbü, BUNYUBOU ngüh ditashi; aishanga BUNYUBOUei kaonyeka kibü mütshuong yoa ngühmat che kia, aieilausi kaonyeka maanglemenbü ayingsi sanouyobü ayingsi Mühghaü ngebü aki.

²Thamto haubü, yepeibü, wapyobü, kokbüsembü, hoba asangalanbü ong kia; khübü longtang leda hoba sii angyodang leda.

³Hibü kaodaka mang haapyoda hoba khonei kibü pendou khei yamkabü meisiau hoba müh kabü au, hoba yungnyu kabü ngau shuong shemda.

⁴Khei yingsikei müt aoeikei tüoyo ayingsi aoeikei shed teku- yo, aishanga kan mütli kho ungshedbou shuong to oyobü shuong tegü kia.

⁵Hobaje changea no phaiyetlabü hoba nangnak ka yoa thuseibou kei phaiyetlabü hoba kanyu Israel ngei mautilabü.

⁶Songsido akibü haangjung kü mütli mauda, nyi songsido asungletsije kü shanga no ungshedbou aletilabü. Kaibü Mühghaüeibü ngühkhüm nyi maasije ngeikei ka shousi shuong maan aplabü.

⁷Haoen aei haasi haoenei kükhu limbo shabü shondang lekei, haoeneibü soneikangbü kho ngei himou to jeikulabü.

⁸Kü mütli shabü thüka haoenei olinyoda hoba haoeneibü shedbü thüka haoeneibü maang phoda.

⁹Hibü mütli lai ki, ungshedbou shuongkei kho tegü kilabü, haoeneibü kümsilei shuong shanga ngei haoen shieikoelabü hoba haoenei kümbü haoen la pailetkulabü.

¹⁰Hobaje haoenei shaulabü lausikei senyüh ashemlabü, haoenei pejapelalabü lausikei ühaalabü, aieilausi asangalanbü kümla shanga haoenei BUNYUBOU inletkei.

¹¹Pejapela, ih lebü hoba ih shaangshouei ditenbü langda.

¹²Kü mütshuongei bu ka songsido pheda, hoba haoeneibü juloei haoen to ngetida; aieilausi peja- pela songsidoei haoen mashiktida, hoba haoenei Mühghaü apyoan pejapelako satakei.

¹³Shongh khua haoenei haitian lemda, hoba shongha, yembü long, poplar hoba terebin bulong phanga jen juokda; aieilausi haoeneibü yemekoubü kho maibü ki, hoba kaneibü nouyangshou shuongei pejapelabü jungeikei, hoba kaneibü chemkannyu shuongei asangalan kümbei.

¹⁴Kaneibü nouyangnyu shuong pejapelajinei hoba chemkannyu shuongei asangalanjinei ngei haoen shieinangeilabü, aishanga bousu shuongkei haoen lolo pejapelako satda hoba asangalanbü yoa meisiau haitiko lemdasada hoba aditenbü mütli che kho tekan aplabü.

¹⁵O Israel, nyi asangalan kümsikei Jihuda la shed tekakti; Gilgal to telou, ayingsi Bethaven to tüang, ayingsi BUNYUBOU lang ki shongko, dogo lauko tethetelan.

¹⁶Aishanga masu saoen anyibü tegü Israel shouloakei, khülonga khongthua san shou tegü BUNYUBOUei haoen lai pangteila?

¹⁷Efraim heangsho kümbou la yeiakei; hao khei apyoshi.

¹⁸Haoenei dantiko yung- yoan phaiaje, haoenei athakko pejapela kümda, saoeibü songdakbü shuongei himou aeibou sanouda.

¹⁹Yeiei jembü kaaka sao leilangakei, hoba haoeneibü lembüsabü shanga haoen himoulabü.