Read Chang Naga HOSEA 5 Bible Online

HOSEA 5 - Chang Naga bible

HOSEA 5

¹O kan ungshedbou shuong, ho ditashi, hoba kan Israel mütli, maang kuashi, hoba O Choba chemdang, nou haangashi; aishanga kan khulimbo matjembü kia, aishanga kan shanga Mizpaa kan sung che phatko kikei, hoba Tabor thüka tak sanan kikei.

²Hobaje haoenei Shittim püngkhün haülangtham thukei, lausikei haoen pendou ngei shieinangeilabü.

³Ngei Efraim ngeakei, hoba kü ka Israel huan aki aishanga tou, O Efraim, nyi asangalanbü küma, Israel shaan apa.

⁴Haoeneibü kümsileiei haoeneibü Mühghaü jungto sepeila asakkuda, aishanga haoen yoa pejapelabü songsido kia, hoba haoenei BUNYUBOU angekei.

⁵Israel yonglam lilibü kho hao thea aukabü longakei hoba Efraim haoeibü shedbüa phaiyetlabü, Jihuda kei haoen yoa phaiyetlabü.

⁶Lombou shuong haoeneibü san shuong yoa BUNYUBOU lambo haulabü, lausikei haoenei hao ühüplabü; haoen ka hao sukngailanga.

⁷BUNYUBOU khulimbo haoenei yepeijaweko jungeia; aishanga haoenei khuongshou bukkua. Hibü tou litnyu haanbüei haoeneibü sek- phai yoa haoen suian aplabü.

⁸Gibeaa kanei teklaang metashi! Ramaa pithung metashi! Bethavena laphang ngühlang hautiashi! O Benjamin, lühashi.

⁹Kayang chalou lousüha, hoba Israel sangliphang la yeilabü. Israel mütli, ho maimaitham loushedlabü!

¹⁰Jihuda konglebou shuong kho leilaang laang yühan apbü shuong phatko yeia; haoen thükto ngeibü maangshat dei tegü ngei jonan jinkulabü.

¹¹Israel shieikoeei nakan yantiakei; matjema netla yeitiakei; aieilausi haoei jim akibü phainei paila maangangenkei.

¹²Lausikei Israel thüka ngo phetyang phatko, hoba Jihuda chung thedanga monan apbü phatko ki.

¹³“Ladang Israelei sao shatbü hapbei, hoba Jihudaei saoeibü moukhün hapbei, kheijinei Israel Assiria to haukei hoba Jareb Choba jungto hautikei; lausikei haoei no maitikula athük ayingsi kaibü moukhün amaitien.

¹⁴Aishanga Efraim thedanga ngo molosaonyu che tegü hoba Jihuda chung thedanga molosaonyu shoushou phatko kilabü; ngei khei jitnyinkulabü hoba satan aplabü; ngei sunglanglabü, hoba püetlabü aokei akilabü.

¹⁵“Haoenei jembü shedbü thekuko kü the alam shongko, ngo jembü kishang to sepeinyu ngailabü hoba haoen khonkua haoenei ngo maangtakko lamlabü.”