Read Chang Naga HOSEA 6 Bible Online

HOSEA 6 - Chang Naga bible

HOSEA 6

¹Mütshuongei lauda, “Kaiya, sen BUNYUBOU jungto sepeikho, aishanga haoei jitnyinkukei hoba haoei sen maitilabü, haoei ngümbei hoba haoei sen la khühkulabü.

²Chalou nyinyet kian haoei sen khangettilabü sembounyeta haoei sen langngaitilabü, hoba sen hao thedanga kilabü.

³Hobaje senei ngekho, senei BUNYUBOU ngela shanga thedang aeto haukho; ngeyang loubü tegü maimaitham hao loulabü, sulang nepla lang loubüei kaonyu to dei lakkubü tegü hao sen jungto loulabü.”

⁴O Efraim, ngei ka to ai kümla? O Jihuda, ngei ka to ai kümla? aishanga kaibü sanou kho ngeyangbü sangmei tegü hoba tongde satbü nindei tegü ki.

⁵Hibü ngei haoen thuseibü shuong danko akan koutia, ngei haoen kü sembung ngühei haitia hoba ngesakbü tegü ngeibü matjem hauda.

⁶Aishanga ngei haitibü lembü aying, sanou kaangbü mangsühda; hoba juokbü lembü aying, Mühghaü ngebü songsido mangsühda.

⁷“Lausikei Adamei tegü haoenei linjinbü ngühkhüm leilua, khonei haoenei ngo khulimbo yepeijaweko jungeia.

⁸Gilead kho shedbü kümsilei kümbü shuong sangnyu ki, kho siiei naanglepan kia.

⁹Hobaje kokbü shuongei la thobü tegü ungshedbou shuongei Shekhem to haubü lama haoenei müt haitida; haü, haoenei jim akibü kümsilei kümda.

¹⁰Israel chunga ngei hatlabü kümsilei hapbei, khonei Efraim pejapelabü kia, Israel shaan apa.

¹¹“Ka shangakei, O Jihuda, ladang ngei kü mütli langsenbü nyibou sungngailaje kheijinei ka shanga youlatbü jih takletan kia.