Read Chang Naga HOSEA 7 Bible Online

HOSEA 7 - Chang Naga bible

HOSEA 7

¹“Ladang ngei Israel maitimang sühda kheijinei Efraim shabü hoba Samaria amaibü ngean apda, aishanga haoenei yepeijaweko jungeida hoba kokbü shuong maangto lotda, hoba khonga soshausoyungbü shuongei soshausoyungda.

²Hobaje haoeneibü kümsilei amaibü pendou ngei damenda dogo haoenei daman achühda; tou haoen jembü kümsileiei haoen kailepan kia, khübü kho kü thea ki.”

³Haoenei haoeneibü kümsilei amaibüei Choba olintida, hoba amlangbüei kongnyubou shuong olintida.

⁴Haoen pendou asangalanbü shuong, wentek ngoubüei wanhap juoklo maibü tegü haoen ki, wen nyatnyinbü ka kho tokai ayei shongko wan ajiketbü tegü.

⁵Seneibü Choba haanga kongnyubou shuong ihei juokan shatkei, müt attiko nyikubü shuong yoa haoei jembü ik tuokkei.

⁶Aishanga haoeneibü huon amaibüei haoeneibü maang- pon wanhap tegü juokda, langyang sünga haoen khauang litham kian, ngeyangje longan kibü wan tegü kho wanlong longda.

⁷“Yasebü wan tegü haoen pendou auetnyu ki, hoba haoenei haoeneibü songdakbü shuong suida hoba haoeneibü Choba pendou tuongan kia, hoba haoen aoeikei kü to angada.”

⁸BUNYUBOUei lauda, “Efraimei jembü lolo mütshuong yoa kheiyoan Efraim kho leilubü wentek che ki.

⁹Yenbou shuongei haoeibü hau suida, hoba haoei kho angeda, hao la kaoen kaoena khuthu longakei, hoba haoei kho angeda.

¹⁰Hobaje hao khulimbo Israel yonglam lilibüei aukabü kuda, khei yingasikei haoei BUNYUBOU haoeneibü Mühghaü jungto asepei ayingsi hao alamda.

¹¹Hobaje songsido akibü ngoubü dukutuk tegü Efraim kia; haoenei Ijep to ngada hoba Assiria jungto hauda.

¹²Ladang haoen haulaje, ngei haoen ngeibü sungei minlabü, müh kabü aushuong tegü ngei haoen senyenlabü; haoeneibü kümsilei shuong shanga ngei haoen shieinangeilabü.

¹³“Haoen shanga ügütü! Aishanga haoen kü jungka bangjung satkei, haoen shanga maulabü! aishanga haoenei ngo khulimbo ngühkhüm leilukei, ngei haoen angngaikhoulabü, lausikei haoenei ngo khulimbo amlangbü laukei.

¹⁴Hobaje haoenei maang kuko kü jungto angekda, lausikei haoeneibü shena haoen lemenyoda; haoenei nyak hoba ih shanga haoen lulu wapda hoba ngo khulimbo meimeida.

¹⁵Ngei haoen lenensikei hoba hau kitisikei, ngo khulimbo haoenei amaibü huon takda.

¹⁶Haoen sepeida lausikei thükaenei kibou jungto aying, haoen huonettibou lau che ong phatko ki. Haoeneibü sembungei khau angbü haangjung leiyeibü shuong inei tuonglabü. Ijep kaodaka haoen nyikulabü ho kilabü.”