Read Chang Naga HOSEA 8 Bible Online

HOSEA 8 - Chang Naga bible

HOSEA 8

¹Ka sembunga teklaang che tenashi. Aulu che tegü BUNYUBOUeibü chemdang khulimbo hao louada, aieilausi haoenei ngeibü linjinbü leilua, hoba ngeibü ngühkhüm lulimbo shed shonkei.

²Haoenei kü to, “Kü Mühghaü, kün Israelei no ngeakei” dogo ngeklabü.

³Ai maibü kho Israelei apa, dangbou shuongei hao shieilabü.

⁴Haoenei Choba shuong pienkei, lausikei kho ngo danko aying; haoenei leiyeibü shuong pienkei, lausikei kho ngei angekei; haoeneibü chandinam hoba honei haoen wapan aplabü lele haoenei heangsho shuong kümbei.

⁵O Samaria, ngei kaibü masu shoushou amangsühda, haoen khulimbo ngo khau angda; Israela haoen shed akiko kilabü jih ladang ong longla?

⁶Aishanga Israel ka ho ki, bu jakbü mütei ho kümbei, hoba ho Mühghaü aying, haü, Samariabü masu shoushou netla yeiko jangnyinlabü.

⁷Aishanga haoenei yei wenkei hoba haoenei mühghaü yei latlabü, youlong loan aki youman alonglabü, longa tegükei kho küksithang shuongei shaulabü.

⁸Israel suian apa, tou phangshuong yoa lejim akibü chaksiam tegü haoen ki.

⁹Aishanga haoen yamkabü gadu hao jembü ong shoongaibü tegü Assiria to angan kia, Efraimei namei sanoubü shuong jekda.

¹⁰Haü, phangshuong yoa haoenei yaakyosikei tou ngei haoen yoshaitilabü, hoba Choba si Chobaeibü shousi shuong onang naangkubü ka longche haoen thakan aplabü.

¹¹“Aieilausi Efraimei shabü ashonla shanga lemshang juongnyu yeitiasikei khübü kho hao thedanga shabü aei shonshang lemshang la ong yeiakei.

¹²Ngei hao shanga ngeibü ngühkhüm hajar an dobü ngühkhüma doasikei, khübü kho haoenei angebü peisilei che tegü weeida.

¹³Haoenei haitibü lembü shuong sanouda, haoenei phe lemda, hoba kho shauda, hoba BUNYUBOUei khübü kho asungletda. Tou haoei haoeneibü shedbü shabü damenlabü, hoba haoeneibü shabü shieikoelabü. Haoen Ijep to ngailabü!

¹⁴“Aishanga Israelei jembü Kümbou maan apbei hoba Chobaeibü chem shuong dangkei, hoba Jihudaei ba lebü sangnyu juongnyu yeitikei; lausikei haoeibü sangnyu shuong thük to ngei wan yantilabü hoba khoei khübü Choba chem shuong kho suian aplabü.”