Read Chang Naga HOSEA 9 Bible Online

HOSEA 9 - Chang Naga bible

HOSEA 9

¹O Israel, kan tüolinyo! phangshuong tegü tesungen; aishanga kaneibü Mühghaü apyoan kan pejapelako satakei; youshou nakshang amshang pendoua nyi asangalan namseibü sanoua.

²Amshang si semlüh nitshangei haoen asamlabü, hoba ih alibüei sao senyüh ashemlabü.

³BUNYUBOUeibü kaodaka haoen akilabü, lausikei Efraim Ijep to ngailabü hoba Assiriaa asaopobü shausiyung haoenei shaulabü.

⁴Haoenei ih lembü BUNYUBOU la yetan ajinkulabü ayingsi haoenei haitibü lembüeikei hao aolintilabü, haoen thedanga haoeneibü lembü kho manghaapbü shausi- yung tegü kilabü; kho shaubü pendou shaan aplabü, aishanga haoeneibü shausiyung haoeneibü shiang shanga ong ki, kho BUNYUBOUeibü chem to ütlabü.

⁵Saopobü lemnyet hoba BUNYUBOUeibü lemnyeta kanei ai kümla?

⁶Aishanga chühashi, maulabü ka haoen satan apa, khei yingsikei Ijep to haoen leishailabü, Mimfisei haoen khünlabü haoeneibü namsek chandinam shuong senouei küpleplabü haoeneibü neichema jak kilabü.

⁷Shieikoe chalou shuong loua, ngaingoubü chalou shuong loua, Israelei kho ngelabü; thuseibou kho ngoubü, soushou müt kho langetangbü, aieilausi kaibü shedbü shabü juongnyu hoba theshou- yobü yaang.

⁸Thuseibou kho ngeibü Mühghaü mütli Efraimeibü la- pheibou che kikei, khei yingasikei hao haushang pendoua ausanbü sung ki, hoba haoeibü Mühghaü chema ajiaphaibü kia.

⁹Gibea haanga tegü, haoenei lolo aeibou leilua, haoeneibü shedbüshabü haoei damenlabü, haoei haoeneibü shabü shieinangeilabü.

¹⁰“Yama semlüh hek tegü ngei Israel hapbei; shaangboubü poanga bhuklonga shaang sembü bhuk phatko, ngei kaneibü bousishuong hapbei; lausikei haoen Baal Peor to loukei, hoba haoen lolo Baal la khümbo kukei hoba haoenei sanoubü peisilei tegü haoen mangsenlabü peisilei che la yeikei.

¹¹Efraimeibü soneikangbü au tegü seengjung satlabü, bukbü akilabü, shia künbü akilabü, mang akongko akilabü.

¹²Haoenei shou pangteibükei müt che ongkei akitiko ngei haoen solanglabü, haü, ladang ngo haoen ka banglaje haoen shanga ügütü!”

¹³Ngei hapbüeije Efraim kaoen maibüa kebü Tair tegü, lausikei Efraimei hao shousi shuong haitibou jungto leian haulabü.

¹⁴Haoen la kuashi, O BUNYUBOU, nyi ai kula? Haoen la na setshang leilubü hoba sen linbü kuashi.

¹⁵Haoeneibü amaibü kümsilei pendou Gilgala kia; aieilausi khonei ngei haoen mangsenkei, haoenei kümbü kümsilei amaibü shanga ngei kü chem ka shian sattilabü. Ngei touje haoen to asanoulabü; haoeneibü leiyeibü shuong pendou songdak khulimbo meimeibü shuong ong ki.

¹⁶Efraim to ngüma, haoeibü li lina, haoenei lang aheklabü, haü, haoenei pangteiena tegükei haoeneibü na setshang lang maibü kho ngei haitilabü.

¹⁷Ngeibü Mühghaüei haoen tekan aplabü, aieilausi haoenei hao to ngüha ale; phangshuong yoa haoen shoongaiko nongeibü shuong kilabü.