Read Chang Naga JOEL 2 Bible Online

JOEL 2 - Chang Naga bible

JOEL 2

¹Teklaang metashi; hoba Mühghaüeibü saopobü Zion shongha thüngdou langh dittiashi. Lühashi, Jihuda müt shuong! Aishanga BUNYUBOUeibü chalou kho nyangko louada.

²Nakthüh hoba nakshou naknyu chalou. Mütli yaangbü hoba hauki yaangkibü che nakthühtham shongh shuong küplepan kia; kho tegü shangied kian achüh, ayingsi meten pendou thonko kho phatko haoen phaia touje akilabü.

³Haoen thedanga wanei suian apda, hoba haoen phainei wanlong longda. Kaodak kho haoen thedanga Eden bamang tegü, lausikei haoen phainei sangliphanga yamla yeida; haoen ka aokei asatenda.

⁴Haoen chühla koli phatko hoba wapyobü koli tegü haoen laangda.

⁵Kailong paibü ngühlang tegütham, haoenei shongh khua toman shatda; youho jikan apbü wanlong olinbü tegütham, hau kibü tan lason lamlebü tegü.

⁶Haoen thedanga noknyüh khonkuda, thedanga pendou phaklaktham yeida.

⁷Sekbülakbü shuong tegü haoen laangda, wapyobü mütshuong tegü haoen ba to saüjung nguida. Haoen lulueibü lama paida, hoba haoenei haoeneibü lin aleiluda.

⁸Haoen cheei che to ajangda, mütpem weko lulueibü lama hauda; haoenei insiaubu tujung hauda hoba atoketda.

⁹sangnyua haoen toman shatda; ba thüka haoen laangda, haoen chem to angda haoen kokbü tegü koulom to atda.

¹⁰Haoen junga kaoei nyaakda, mühshuongei lühda; chanyu si litnyu nakthühtham apda, hoba khanshoulitshou shuongei haoeneibü ngesakbü senetda.

¹¹Hobaje BUNYUBOU, jembü sepai tan thedanga ngüh longda, aishanga haoeibü lakjaibü shuong aeibou yaangkei, aoyouei haoeibü ngüha leda, hao hau kibü. Aishanga BUNYUBOUeibü chalou yaangbü hoba aeibou hatlamoklabü che, hoba aoei kho tinla?

¹²“BUNYUBOUei lauda, tou ongkei kan maangpon pendouei kanei mühei nyengko hoba haapbo, hoba manghaapbo kü jungto sepeiashi.

¹³Hobaje kaneibü neisimei ayingko kaneibü maangpon jitnyinashi, hoba BUNYUBOU kaneibü Mühghaü jungto sepeiashi.” Aishanga hao onou hoba üei dambüei shenakei, khauangla maangyangsho hoba sanoudambü apsileko hoba amaibü ka haoei hehoat kida.

¹⁴Khei haoei nyibou maangpon sepeila hoba hao phainei haülabü che, khei shausiyung lembüsabü kaneibü BUNYUBOU Mühghaü la phokulabü lele naang maitikulakei ai ngenyu!

¹⁵Ziona teklaang metashi, mühei nyengbü saüenashi, jaishou shuong kamshaiashi, hoba nashousi shuong si senyopbü shuong leishaiashi!

¹⁶Mütshuong liko hokshaiashi; haoen saopobü thangyen che tensepashi; jaishou shuong ngashaiashi; nashou hanbü shuong hoba nasak yoan leishaiashi. Chemkanbou si chemkannyu jembü popchem maangka longashi.

¹⁷Ungshedbou shuong, BUNYUBOU khangenbü shuong, chemsophang si lemshang kanglanga haapashi, hoba lauashi, “O BUNYUBOU, ka mütli khümenashi. Hobaje phangshuongei kün khulimbo, ‘Haoeneibü Mühghaü lan ki?’ dogo lauko kaibü phetphan awealauko tejungeiti.”

¹⁸Kheijinei BUNYUBOUei jembü kaodak shanga mangsühkei, hoba jembü mütli to maangshikkei.

¹⁹Hobaje BUNYUBOUei jongaiko hao mütli to laukei, “Chühashi, ngei kan jungto youshou, ih hoba onang yantikulabü hoba phang yoa touje kan awealauko ayeitilabü.

²⁰Lausikei chanep phei sepai tan saabü to kuktilabü, hoba kaolong hoba sangliphang to chanyu angbou yungnyu to shian aplabü. haoeneibü thedanga lamleibü shuong Haibü Yungnyu to hoba thenkabou tan Mediterania Yungnyu to shian attikulabü hoba shalüm longlabü hoba lem amaibü longlabü, aieilausi haoei amaibü kümsilei yaang kümbei.

²¹“Tehüt, O kaonyu, olinashi hoba olinangko kishi, aishanga BUNYUBOUei kümsilei yaang küma.

²²Hatko teki, kan khongthua kibü meisiau shuong, aishanga yama lamshaushang longakei, aishanga bulongei jembü lang hekkuda; bhuklong si semlüh longei jembü hau kuda.

²³“Hibü kan Zion shousi shuong olinko kishi, hoba BUNYUBOU kaneibü Mühghaü to olinangko kishi; aishanga haoei kan la shaangbou langh takletbü tükde kuda, hoba kan shanga haoei lang shaangboubü lang hoba phaibou lang shangied tegütham yantikuda.

²⁴Hobaje amshang kho whet youshouei shenan kilabü, hoba ihlechak shuong kho ih hoba onangei soplabü.

²⁵Hobaje ngei kan yoto hautibü ngeibü sepai tan yaangbü, koksüng, jepan apbubou koksüng, shoongbü koksüng, toman shatbü hoba shaukhümkubü koksüng, koksüng shuongei shaukubü kaomai shuong ngei nyibou kan la kungailabü.

²⁶Hobaje kanei apsileko shaulabü hoba senyühshemlabü, hoba kan to maangpanglabü kümbou BUNYUBOU kaneibü Mühghaü, hoba lubü ao aki, dogo kanei ngelabü, hoba ka mütli ladangkei himou abaulabü.

²⁷Hobaje ngo Israelbü yoa kia dogo, hoba ngo BUNYUBOU, kaneibü Mühghaü, hoba lubü ao aki, dogo kanei ngelabü, hoba ka mütli ladangkei himou abaulabü.

²⁸“Hobaje phaia ho haüthüklabü, khei ngei kü soushou phe pendou la khüpan jinkulabü; hoba kaibü jayangshou hoba nouyangshou shuongei thusei ngüh tetenlabü hoba jaishou shuongei mangh lilabü; hoba kaneibü heshou shuongei mangsang haplabü.

²⁹Hobaje tokei khübü chaloua ngeibü sambü hoba samnyu shuong thükto kü soushou khüpan jinkulabü.

³⁰“Hobaje müha hoba kaoa maangpanglabü shuong lenlabü, sii hoba wan hoba wankhük thaonyu kilabü.

³¹BUNYUBOUeibü chalou yaangbü hoba hatlamoklabü aloujinei chanyu kho nakthühtham aplabü hoba litnyu kho sii la yeilabü.

³²Hobaje ho haüthüklabü, khei aoyouei BUNYUBOU nyena ngalaje khümenlabü. Aishanga BUNYUBOUei laubü tegü, Satenbü shuong Zion shongh hoba Jerusalema kilabü, hoba BUNYUBOUei ngabü jouletbü yoa yolabü.”