Read Chang Naga JOEL 3 Bible Online

JOEL 3 - Chang Naga bible

JOEL 3

¹BUNYUBOUei lauda, “Aishanga chühashi, khübü chaloua hoba kho jiha ladang Jihuda si Jerusalem langsenbü nyibou ngei leingailaje,

²ngei phang pendou leishailabü, hoba Jehoshafat pholi to leian yanlabü, hoba ngei khünei kü mütli shanga hoba ngeibü phet Israel shanga aoyouei haoen phangshuong yoa pheinyintian ki, hoba ngeibü kaonyek janan ki, haoen to ngei mat jemlabü.

³Hobaje haoenei kü mütli shanga phaang paklabü, hoba asangalanbü shanga bousushou che kukei hoba haoenei yungla ih shanga yaksashou che yaakkei.

⁴“Haü, O Tair, hoba Sidon hoba Filistia kaonyek pendou kü thedanga kan ai ki? Ngei kümbü shanga kanei kü la kungailep sai? hoba kanei kü la kungaiko laualonga panteiko hoba tongde ngei kaneibü kümsilei sepeinyu kaneibü khu thüka kulabü.

⁵Aishanga kanei ngeibü chandinam hoba ngeibü hon lea, hoba ngeibü nyaksinam maibü kaneibü lemshang chem to kanei sunglanga.

⁶Jihudabü si Jerusalembü haoen jembü leilang ka saabü to lintila shanga kanei Grikbü la yaaka.

⁷Chühashi, kanei laenei haoen yaakan ki khüka ngei haoen meimeitilabü, hoba kaneibü kümsilei kaneibü khu to ngaitikulabü.

⁸Hobaje kaneibü jayang nouyangshou shuong Jihudabü shousi shuong ik to ngei yaaklabü, hoba haoenei saabüa kibü mütshuong la haoen yaaklabü, aishanga BUNYUBOUei kho laua.

⁹“Kanei mütshuong la ho phinthonashi, ‘Wapyo lamleashi; sekbülakbü shuong meimeitiashi, wapyobü müt pendou nyangko loutiashi, haoen longtiashi.

¹⁰Kanei sek shapbü insiaubu jungashi hoba sangjipbü insiaubu jungashi, hau akibüei ngo hau kia dogo lautiashi.

¹¹Kan panteiashi hoba kaiya, kaijembo kibü phang pendou, hoba kan lulu takshatashi.’” O BUNYUBOU, kaibü sekbülakbü shuong louyantiashi.

¹²“Phangshuong haoen lulu shitiashi hoba Jehoshafat pholi to longtiashi; aishanga khünei kaijembo kibü phang pendou matjemla ngo setlabü.

¹³Laangku litiashi, aishanga sek nyena; kaiya kanei juletashi, aishanga semlüh hek nitshanga shenko kia, jephot sopbo kouda; aishanga maibou kho aeibou yaang kia.”

¹⁴Shuong shuonga janthetbü yoa kia! Aishanga janthetbü Yoa BUNYUBOUeibü chalou nyangko kia.

¹⁵Chanyu si litnyu nakthühtham apakei, hoba khanshoulitshou shuongei haoeneibü ngesak senetakei.

¹⁶Hobaje BUNYUBOUei Zion ka ngühlabü, hoba Jerusalem ka haoeibü ngüh hautilabü; hoba müh si kao topeilabü, lausikei hao mütli shanga BUNYUBOU satenshang kilabü, hoba Israel shousi shuong shanga laphei shon kilabü.

¹⁷“Kho tegü kaneibü Mühghaü, ngeibü saopobü shongh Ziona kida dogo ngelabü, kheijinei Jerusalem saopobü kilabü, hoba yenbou aoeikei touje sao ashilabü.

¹⁸“Hobaje kho chaloua ho haüthüklabü, shonghnyu shuongei ih teibü saangtilabü, hoba shonghei sendei koutilabü hoba Jihuda shushou pendou dei koulabü, hoba BUNYUBOUeibü chem ka deikük che longlabü, hoba Shittim pholia dei koulabü.

¹⁹“Jihudabü shousi shuong to ik shatbü hangshong, Ijep sangliphanga kilabü. Edom yam sangliphang shanga yinglabü, aieilausi haoeneibü ikei haoenei shedbü akibü sii phinkei.

²⁰Lausikei Jihuda ponpen kilabü, hoba Jerusalem meten meten kilabü.

²¹Hobaje haoeneibü sii ngei phok lamlabü; ngei kho ashiakoeko üpyolabü, aishanga BUNYUBOU Ziona kida.”