Read Chang Naga AMOS 2 Bible Online

AMOS 2 - Chang Naga bible

AMOS 2

¹BUNYUBOUei hai lauda, “Moabei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoei Edom Chobaeibü lo wanui la yeiko juokkei.

²Hibü Moab thükto ngei wan hautilabü, hoba khoei Keriot lapheishon lonshemlabü; hoba lemenbü, ngekbü hoba teklaang ngühlang yoa müt hailabü.

³Hobaje ngei Moab songdakbou si kaonyek kabü khuleibü shuong khümbo wapan aplabü.”

⁴BUNYUBOUei hai lauda, “Jihudaei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi BUNYUBOUeibü ngühkhüm haoenei ajungei hoba haoenei apho, hoba haoen yepeijawebüei haoen mashikkei, hoba haoeneibü pisibousi shuong phaito haoen paikei.

⁵Hibü ngei Jihuda thükto wan hautilabü, hoba khoei Jerusalem lapheishon lonshemlabü.”

⁶BUNYUBOUei hai lauda, “Israelbü ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoenei saopobü shuong chandinam lu yaakkei, hoba nguok youdang che lu akialebü yaakkei.

⁷Khei kaomang to atko shalebüeibü khua nakeida hoba jim akibüeibü lamnyu aüan apda, hoba ngeibü saopobü nyen shatiko müt che si haobou jeteibü medei jungto atda.

⁸Hobaje theletla lebü neisimei thüka lemshang weko nyangko haoen lolo lengda, hoba Mühghaü chema haoenei nyatbü ih yungda.

⁹“Khei yingasikei haoen thedanga ngei Amorbü mautilabü, aoeibü thong cedar bulong tegü hoba yembu tegü hau kibü yingasikei, ngei haoeibü li leilutikulabü.

¹⁰Tokei ngei hao Ijep kaodak ka leibakei, hoba Amor kaodak phetphanla yama po saonyi leiyeikei.

¹¹Hobaje kaneibü shousi shuong ka thuseibü heshou shuong ka Nazirit mütshuong, kho maimaitham aying lo? O Israel shousi shuong, dogo BUNYUBOUei lauda.

¹²“Lausikei Nazirit mütshuong lakei kanei ih yungtikei, hoba thuseibü shuong lakei ngühkhüm kuko, ‘Kanei thusei ngüh telau’ dogo laukei.

¹³“Chühashi, youmanei manan kibü kailong sanglepbü tegü ngei kan sangleplabü.

¹⁴Sekbülakbü shuongei asatenlabü hoba hauki yaangkibüei haoeneibü hau asungenlabü, ayingsi sekbülakbüei jembü lolo akhümenlabü.

¹⁵Aoei lau jungda hao aloenlabü, hoba ao you sokei, hao lolo akhümenlabü, ayingsi aoei kolia setda haoeibü langkei akhümenlabü.

¹⁶Hobaje sekbülakbü yoa ao maang kaangbü ki, khünyet mütkong satlabü,” dogo BUNYUBOUei lauda.