Read Chang Naga AMOS 3 Bible Online

AMOS 3 - Chang Naga bible

AMOS 3

¹O Israelbü, kan khulimbo, Ijep kaodak ka ngei leiyenbü chung khümbo khulimbo BUNYUBOUei laubü ngüh ho ditashi:

²“Kaodak chung pendou apyoan ngei kan to thounoukei, hibü kaneibü shedbü shabü pendou ngei pean chühlabü.”

³Maangpon apaplep longa müt nyi liko pailep lo?

⁴Yama taketlabü meisiau akijinei molosaonyuei ngühda si? Molosaonyu paangshouei laang- poba denche sungbaan akilonga wilep si?

⁵Hao shanga kaoa autin asanku longa au kho tina minlep si? Ai aminnyu tinkung kho shemlep si?

⁶Sangnyua teklaang metsi mütshuong alühda lo? Sangnyu chenei denche amaibü loushedsi kho BUNYUBOUei kümbü aying lo?

⁷Maimaitham BUNYUBOU Mühghaüei haoeibü khangenbü thuseibü shuong to haoeibü kümsilei tang khitko alenko haoei ai akümlabü.

⁸Molosaonyuei ngüha, aoei ühütla? BUNYUBOU Mühghaüei laua, aoei tetenbü ngüh alauko kienla?

⁹“Ashdod Choba hoba Ijep Chobaeibü chema ngekletashi hoba lenashi. Samaria shongha kan lolo kamshaiashi, hoba khünei oyolemen latetche ki chühashi.

¹⁰Habü mütshuongei haoeneibü thanchema ik shatyobü hoba sobakokpabü thanshaida, hoba haoenei janbü kümla angekei” dogo BUNYUBOU Mühghaüei lauda.

¹¹Hibü BUNYUBOU Mühghaüei hai lauda, “Dangbouei kaonyek komleplabü, hoba ka ka haoei hau sungan apbulabü, hoba kaibü thanchem shuong aaklangtilabü.”

¹²BUNYUBOU Mühghaüei hai lauda, “Sanlombouei molosaonyu haken ka you nyi ayingsi nou che sungngaibü tegü, tou ongayasebü shena lengan kibü Samariabü mütshuong shijo ong khümenlabü.”

¹³“Kanei ditashi, hoba Jakob chemdang khulimbo aukabü kuashi” dogo BUNYUBOU Mühghaü, lakjaibü tan Mühghaüei lauda.

¹⁴“Aishanga Israelei ngühkhüm lulimbü shieinangei chaloua ngei tokei Bethel lemshangkei shieinangeilabü, hoba lemshang laangshong wapan apbulabü, hoba kao to attilabü.

¹⁵Hobaje poang chem hoba sulang chem penyi ham ngei mautikulabü, hoba thunyu hauhei dangbü chem mautikulabü, hoba chemsibung juong maushangdanglabü” dogo BUNYUBOU Mühghaüei lauda.