Read Chang Naga AMOS 4 Bible Online

AMOS 4 - Chang Naga bible

AMOS 4

¹“Ho ditashi, kan Bashan kabü masu shuong, kan Samariaa kibü yaksi shuong, kanei shalebü shieikoeda, athükaminbü nakan yantida, hoba haoeneibü laosi to, ‘Sungba, senei yungkho!’ dogo lauda.

²Haoenei kan anjinei senlanglabü hoba kan joubü shuong kho ngau yaüjinei senlabü, khübü chalou ka jungto louada dogo BUNYUBOU Mühghaüei hao saopobüei thekolanko lauda.

³Hobaje kan mütpem weko tangshaitham sao thedanga leilubü kishang khüto anglabü hoba kan lolo Harmona jinkulabü,” dogo BUNYUBOUei lauda.

⁴“Bethel to kaiya hoba ngühkhüm lulimashi; Gilgal to kaiya, hoba ngühkhüm lulimbü juong yeiashi, kaneibü juokbü lembü ngeyang weko, hoba kaneibü an phejan sembounyet weko sungba;

⁵hoba nyensang kubü lembü, tokai ajinbü wentek juokko kuashi hoba maangmai lembü ngekletashi hoba khübü kho ngetiashi, aishanga O Israel, kanei kho mangsühda!” dogo BUNYUBOUei lauda.

⁶“Hobaje ngei kan la shaula akibü ka shikonglopkong hoba kan kishang pendoua uangmuang kukei; khei yingasikei kan kü jungto sepeinyu alongei,” dogo BUNYUBOUei lauda.

⁷“Hobaje youlatla lit sem kian ngei tokei kan ka lang senetkei; ngei sangnyu che thükto lang loutikei hoba lubü sangnyu che thüktoje lang alouti; sek che thükto lang loukei, lausikei sek laoboua lang alou kho liman apbei.

⁸Hibü sangnyu penyi sem sangnyu che jungto dei hiyungla loukei, hoba senyühashem; khei yingsi dogokei kan kü jungto asepei,” dogo BUNYUBOUei lauda.

⁹“Ngei kan shatsinyat hoba mousisouei sühtikei, kaneibü bamang shuong hoba kaneibü semlühlaak shuong hoba kaneibü bhuklong shuong hoba kaneibü oliv bulong shuong koksüngei shaukhümbukei; khei yingasikei kan kü jungto asepei,” dogo BUNYUBOUei lauda.

¹⁰“Ngei kan jungto Ijepbü jungto hautibü tegü shatlim hautikei; kaneibü heshou shuong ngei inei haitikei, kaneibü koli shuong ngei nanglangkei hoba kaneibü shenyou shalümei kaneibü kung sühko ngei longtikei; khei yingasikei kan kü jungto se- peinyu alongei,” dogo BUNYUBOUei lauda.

¹¹“Mühghaüei Sodom si Gomora apbubü tegü ngei kan yoa atje apbua hoba wan longan kibü ka lungaibü wanted tegü kan kü jungto asepei,” dogo BUNYUBOUei lauda.

¹²“Hibü, O Israel, ngei kan to hai kümlabü, aishanga ngei ka to hai kümla kiabü, kaibü Mühghaü to haüyola lamleashi, O Israel!”

¹³Aishanga ditashi, aoei shongh shuong yeitikei, hoba yei kümbei; aoei müt to haoeibü dambü shuong ai ki kho lenda; hoba change kho nangnak la yeitida, hoba kaodaka shongh shuong yeitikei, haoeibü nyen kho BUNYUBOU Thükenbou Mühghaü ki!