Read Chang Naga AMOS 5 Bible Online

AMOS 5 - Chang Naga bible

AMOS 5

¹O Israel mütli, ka shanga ngo manghaapbü ngüh kanei ditashi.

²Saosüngbü Israel medei tuonga, Sao ladangkei alakseplabü! Sao kaokonga apyoakei; Hobaje sao phonla ao aki.

³Aishanga BUNYUBOU Mühghaüei hai lauda, “Hajar che hautibü sangnyua saongao ong joulabü, hoba laobou ka saongao hautikei, Israel chemdang shang- a an ong joulabü.”

⁴Aishanga Israel mütli to BUNYUBOUei hai lauda, “Ngo lamashi, hoba lang kiashi;

⁵lausikei Bethel telam, ayingsi Gilgal to tüt, hoba Beersheba danko tohau; aishanga maimaitham Gilgal lang senlabü, hoba Bethel jim akiko aplabü.”

⁶BUNYUBOU lamashi hoba kan lang kilabü, khei ayinglonga Bethela aoeikei anyettienlabü lele haoei Josef chemdanga wan longbü tegü hao longan suian aplabü.

⁷Kanei ngühmai khauekbü yeitida, hoba saopobü kaoa tekan apda!

⁸Aoei Pleiads hoba Orion kümbei; haoei daomao ka ngeyang yeitida; hoba change ka nangnak nakthüh yeitida. Haoei yungnyu dei ngashaida; hoba kho kaonyu thükto jonan jinkuda; haoeibü nyen BUNYUBOU ki.

⁹Haoei hauki yaangkibü thükto hakde mauthu sungbada, hoba lapheishon thükto leilubü longtida.

¹⁰Bakhüna hakbü müt to haoenei mangsenda, hoba ngühmai hoba ngühmai laubü müt to haoenei mangsenda.

¹¹Kanei shalebü to nakkei hoba hao ka youshou sungshaukei; yingsije, kanei laang jakenan chem dangasikei, kan khünei akilabü, kanei semlühlaak maibü leasikei kanei khübü ih ayungoulabü.

¹²Aishanga kanei ngühkhüm leilubü juong hoba shabü laobou yaangbü, kho ngei ngeakei; kanei shedbü akakbü khonkutida hoba besa leda hoba athükaminbü bakhüna nangletda.

¹³Khei yingbüka, ao ngühmaanglanbü ki kho tegübü jiha ngüh üangko kilabü; aishanga ho jihsiphai amaibü ki!.

¹⁴Kan lang kimang sühalonga maibü lamshi, hoba amaibü aying; khei yingalonga BUNYUBOUeibü hangangbü Mühghaü kanei laubü tegü kan yoa kilabü.

¹⁵Amaibü kho mangsenashi, hoba maibü kho sanouashi hoba bakhüna ngühmai kümshi; aingenyu BUNYUBOU lakjaibü Mühghaüei Josef joubü to onoulakei kilabü.

¹⁶Hibü BUNYUBOU lakjaibou Mühghaüei hai lauda, “Lambhek pendoua haapyoko kilabü, khongnyu pendoua haoenei laulabü, ‘Ügütü! Ügütü!’ hoba sekmoubü to, hoba mang waangko chia laubü dan haoenei manghaapla ngalabü.

¹⁷Hobaje semlühlaak pendoua haapbü kilabü, aishanga ka jungka ngo danlabü,” dogo BUNYUBOUei lauda.

¹⁸BUNYUBOU chalou haiyeibü shuong, kan shanga ügütü! BUNYUBOUeibü chalou kanei aila mangsühda? Kho nakthühbü ki, ngesakbü aying.

¹⁹Ho müt che molosaonyu ka satensi sap che haüyobü jam! Ayingsi chem to ngaian haoeibü ik kümthang to nongyolangsi pinyuei püpbü jam!

²⁰BUNYUBOU chalou kho ngesakbü jiko nakthühbü aying lo? Khonei sonlailai ayingko nakthüh ong kilep aying lo?

²¹Ngei mangsenda, ngei kaneibü lemsilang nyikuda. Kanei saopobü thangyen kambüa ngo aolinda.

²²Haü, kanei kü la juokbü lembü hoba shausiyung lembü kuasikei ngei khübü asungletlabü, kaneibü netthembü nyensang lembü shuong ngei aweeilabü.

²³Kanei kü ka kaneibü chia laubü ngailangashi, aishanga kaneibü kongkin ngüh ngei aditlabü.

²⁴Lausikei dei tegü ngühmai nujung louyantiashi, hoba saopobü shuong sopbo koutiashi.

²⁵“O Israel mütli, yama po saonyi kijinei kanei kü jungto meisiau lembü shausiyung lembü sungbakei sai?

²⁶Lausikei kanei kaneibü Choba Sakkut hoba kaneibü khanshoulitshou mühghaü Kaiwan noksa laobou kan shanga kümbei kanei pejan.

²⁷Hibü kan Damaska danko langsenbü to ngei kan hautilabü,” dogo BUNYUBOU, aoeibü nyen Lakjaibou Mühghaü ki, haoei lauda.