Read Chang Naga AMOS 6 Bible Online

AMOS 6 - Chang Naga bible

AMOS 6

¹Ziona ongayasetham kibü shanga hoba Samaria shongha maangleman kibü shanga, kongnyu phang yo ka yaangenbü shanga aoyou jungto Israelbü chung loukei haoen shanga ügütü!

²Kalne danko hauashi hoba chühashi, hoba kho ka yaangenbou Hamata jungto hauashi, kho phaia Filistiaa Gat to yanashi! Haoen khübü sangle to maibou sai?

³O kan amaibü chalou saabüa aptimang sühbü shuong, hoba ik shatyobü setshang nyangko loutimang sühbü shuong.

⁴“Thunyu hauh yepshanga phetetnyu lengbü shuong, hoba haoen lolo khümsoka shingetnyu kibü shuong, hoba sanshuong ka san shoushou hoba masu chem ka masu shoushou shaubü shuong, ügütü!

⁵Kongkina peksekyoko chia laubü, hoba Dawid tegü chia kongkin jembü shanga kümenda.

⁶Thunga ih yungda hoba haoen lolo onang maibüei naangbü shuong; lausikei Josef khonsakbü shanga haoenei maangpon nou kuko aki.

⁷Hibü, tou shaangboubü langsenbü shuong yoa haoen langsenbü to haulabü hoba shingetnyu lengan lem liyoko dankhümlabü.”

⁸BUNYUBOU Mühghaüei hao lolo thekeilankei dogo BUNYUBOU Mühghaüei hai lauda, “Ngei Jakob lilisese mangsenda, hoba haoeibü lapheishon shuong mangsenda, hibü sangnyu hoba khünei kibü pendou yoa ngei khümbo kuan aplabü.”

⁹Hobaje ho loushedlabü, chem chenei müt an kialonga haoen hailabü.

¹⁰Kheijinei haibou chem- pen, aoei hao juokda, chem ka lo sungbatila shanga haoei hao leibalabü hoba aoyou chem maangkaboua kilaje, kho to laulabü, “Ka yoa tokei at kilao ma?” Hobaje haoei laulabü, “Ao aki,” hoba haoei laulabü, “Ngüh tüang, aishanga senei BUNYUBOUeibü nyen alaueilabü.”

¹¹Aishanga chühashi, BUNYUBOUei sengkuda hoba chem yaangbü netla yeiko leilulabü hoba chem haanbü saknyinlabü.

¹²Koliei laangdaka langenlep lo? Yungnyua masu pongsuei sek shaplep lo? Khei yingasikei kanei ngühmai khauekbü, hoba saopobü buhek kom la yeitia.

¹³Kanei amlangbüa yonglam- yoda hoba lauda, “Senei Karnaim sunglabü lele sen la hau kia.”

¹⁴Aieilausi chühashi, “O Israel mütli, ngei kan khulimbo phang che longtilabü,” dogo BUNYUBOU lakjaibou Mühghaüei lauda; “hoba Hamat to atshang lam ka Araba shumang sühko haoenei kan shieinangeilabü.”