Read Chang Naga AMOS 7 Bible Online

AMOS 7 - Chang Naga bible

AMOS 7

¹BUNYUBOU Mühghaüei kü la hai lenkei, hoba chühashi, phaila longbü kesiong yembo kijinei haoei koksüng longtikei, hoba ditashi, kho Chobaeibü kesiong sungan phaia kikei.

²Hobaje ladang khongthua haoenei sang shaukhümbei, kheijinei ngei laukei, “O BUNYUBOU Mühghaü, ka mütli la amai apbushi dogo ngei ka to sudajada! Jakob lai loenla? Aishanga hao hanbüshou ki!”

³Kho shanga BUNYUBOUei maangpon sepeikei hoba laukei, “Ho khei ayinglabü,” dogo BUNYUBOUei laukei.

⁴BUNYUBOU Mühghaüei kü la hai lenkei, hoba chühashi, BUNYUBOU Mühghaüei wanei matjemla ngakei, hoba khoei yungnyu yaangbü lonkei, hoba kaodak lonla khangko kikei.

⁵Kheijinei ngei laukei, “O BUNYUBOU Mühghaü, ngei ka to sudajada, khüai leshi. Jakobei lai loenla? Aishanga hao hanbüshou ki!”

⁶Kho shanga BUNYUBOUei maangpon sepeikei, hoba laukei, “Ho khei ayinglabü,” dogo BUNYUBOU Mühghaüei laukei.

⁷Haoei kü la ho tegü lenkei, hoba chühashi, takbü janglühei kümbü, kümthang che nyangko BUNYUBOUei takbü janglüh che haoeibü ika jungan lokei.

⁸Hobaje BUNYUBOUei kü to laukei, “Amos, nyi ai hapda?” Hobaje ngei laukei, “Takbü janglüh che.” Kheijinei BUNYUBOUei laukei, “Chühashi, kü mütli Israelbü yoa ngei takbü janglüh che pholabü; ngei touje haoen khei aphokulabü.

⁹Hobaje Isakeibü thensileneibü shongha lembü sangliphanga kilabü hoba Israelbüeibü lemshang inletkulabü hoba Jeroboam chemdang khulimbo ngei in tonlabü.

¹⁰Kheijinei Bethel kabü Amaziaei Israelbü Choba Jeroboam jungto ho lenko hautikei, “Israelbü chemdang yoa no khulimbo Amosei huon amaibü takda; haoeibü ngüh pendou kaodakei atinda.

¹¹Aishanga Amosei lauda, ‘Jeroboam inei hailabü, hoba kheijinei kaonyek ka Israel langsenbü to laplangbü.’ ”

¹²Tokei Amaziaei Amos to laukei, “O no thuseibou, satashi. Jihuda kaodak to satan apashi, hoba khünei shiang lamashi hoba thusei ngüh lauashi.

¹³Lausikei touje Bethelaje thusei ngüh telau; aishanga ho Chobaeibü lemshang ki, hoba ho mütlieibü lembüchem ki.”

¹⁴Kheijinei Amosei jongaiko Amazia to laukei, “Ngo thuseibü aying, ayingsi thuseibüeibü shoukei aying, lausikei ngo sekmoubü hoba bhuklaak moubü müt ki.

¹⁵Hobaje san lomshang ka BUNYUBOUei ngo leilangkei, hoba BUNYUBOUei kü to laukei, ‘Hauashi, kü mütli Israelbü la thusei ngüh lenashi.’

¹⁶Hibü tou nyi BUNYUBOUeibü ngüh ditashi: Nyi lauda, ‘Israelbü khulimbo thusei ngüh telau, hoba Isak chemdang khulimbo song telen.’

¹⁷Hibü BUNYUBOU Mühghaüei lauda, ‘Kaibü yak sangnyua asangalan sao yeilabü, hoba kaibü jayang nouyang shuong inei hailabü; hoba no lolo asaopobü kaodaka hailabü; hoba Israel chemdang jembü kao ka maimaitham langsenbü la yeian leilanglabü.’ ”