Read Chang Naga AMOS 8 Bible Online

AMOS 8 - Chang Naga bible

AMOS 8

¹BUNYUBOU Mühghaüei kü to hai lenkei, hoba chühashi, sulang buhek kam che haptikei.

²Hobaje haoei phekei, “Amos, nyi ai hapda?” Ngei laukei, “Sulang buhek kam che.” Kheijinei BUNYUBOUei kü to laukei, “Kü mütli Israel shanga thonbü loua, ngo touje haoen junga anyangkulabü.

³Kho chaloua lembü chema chia laubü kho lemenbü ngühlang la yeilabü, dogo BUNYUBOU Mühghaüei lauda. Haibü mang juong kilabü, kaoen juonga haoen ngüh üangko tektek sousou kilabü.”

⁴Ho ditashi, O kan athükaminbü suibü shuong, hoba kaonyeka athükamin haptibü shuong.

⁵“Efa shibou hoba munamje aei yeitiko hoba seret amlangbüei lepbolangko senei yakenlabü shanga ladang ong hangi yakla lit haanbü hoba youshou yakla shanga Nounyet danlama?

⁶Khei senei chandinam lu shalebü hoba nguok youdang che lu shale jonglebü jekla hoba youshou monbü yakla?” dogo kanei lauda.

⁷Jakob to sanoubüei ong BUNYUBOUei hai thekeilankei, “Maimaitham ngei haoeneibü kümsilei che ongkei ladangkei amaalabü.

⁸Kho shanga kaoei alühlabü hoba khünei kibü müt- pem wekoei mang ühaaplabü lo? Haü, kaonyu pendou Nail tegü anglabü, hoba kho Ijepa Nail tegü dei jonglabü hoba nyibou hapngailabü.

⁹Hobaje kho chaloua chanyu chajihboua chanyu neptilabü hoba changea ngei kaodak nakthühtham aptilabü, dogo BUNYUBOU Mühghaüei lauda.

¹⁰Hobaje kaneibü lemsilangei manghaapbü yeitilabü, hoba kaneibü chia pendou waangbü chia yeitilabü, hoba kaneibü shenjanga ngei senounei shentilabü, mütpem weko khüng khetilabü hoba bousushou tetche ong kibü shanga manghaapbü tegü, hoba kho thonbü kho khauekbü chalou tegü ngei yeitilabü.

¹¹“Chühashi, kaonyeka mühsinou che, khei nyak akibü ayingsi deilabü lim che aying, lausikei Mühghaü ngüh aditbü lim che ngei hautila chalou shuong louada, dogo BUNYUBOU Mühghaüei lauda.

¹²Hobaje haoen yungnyu ka yungnyu sühko hoba yungkük ka khei chanyu angbü sühko shoongailabü; haoen hau ngai dogo laangyolabü, lausikei kho ühüplabü.

¹³Kho chaloua hemai saomai medei shuong hoba heshou shuong deilaei semthetlabü.

¹⁴Aoyouei Samariabü heangshoei thekolanko lauda, O Dan, ka mühghaü lang kisije, hoba Beersheba heangsho lang kisije, khei haoen tuonglabü, hoba ladangkei nyibou alakseplabü.”