Read Chang Naga AMOS 9 Bible Online

AMOS 9 - Chang Naga bible

AMOS 9

¹Ngei lemshang nyangko BUNYUBOU loan hapbei, hoba haoei laukei: “Koukhüm nyaakeilabü lele thaonyu sembunga ngümashi. Haoen pendoueibü khua netla yeiko lottiashi. Joubü shuong kho ngei inei haitilabü, hoba aokei asatenlabü.

²Haoen yemkhüna sühko thujung atsi dogokei khün ka ngeibü ikei haoen senenlabü, hoba haoen müh to angsikei, khüka ngei haoen senletlabü.

³Hobaje haoen Karmel hotena husikei ngei haoen lamenlabü, hoba khüka haoen leibalabü, hoba haoen kü thenyek ka yungnyu haübüa huasikei khüka ngei pinyu la sakkulabü hoba haoei haoen to püplabü.

⁴Hobaje haoen dangbou labou thedang ka thüngshang to hauasikei khünei ngei in la sakkulabü, hoba khoei haoen wapettilabü. Haü, ngei haoen thükto maibü shanga aying, amaibü shanga ngei nyek hautilabü.”

⁵Aishanga BUNYUBOU lakjaibü Mühghaü, haoei kaonyek to meitia longa tühnyinda; hoba khünei kibü pendouei mang haaplabü, hoba kho Nail tegü anglabü; hoba Ijepa Nail tegü hapjung ngailabü.

⁶Müha popchem küman kaoa mühyou tenan kümbou kho hao ki; dei ngashaian kaothea khüpan jinkubou kho hao; haoeibü nyen BUNYUBOU ki!

⁷“O Israel shousi shuong, kü thedanga kan Ethiopiabü tegü aying lo? dogo BUNYUBOUei lauda. Ijep kaodak ka ngei Israel tokei Kaftor ka hoba Filistiabü, hoba Siriabü Kira aleiyen lo?

⁸Chühashi, BUNYUBOU Mühghaüeibü nyek shabü sangle thüka kia; hoba kho khei kaothe ka mautilabü; lausikei Jakob chemdangje ngei lemailela amautilabü, dogo BUNYUBOUei lauda.

⁹Aishanga ditashi, ngei sakkulabü hoba onyishoua ang nyiletbü tegü ngei Israel chemdang phang pendou yoa nyiletlabü; khei yingasikei, youshou hanbüshou khokei kaoa üatlabü.

¹⁰Kü mütli shabü shuong pendou aoyouei ‘Amaibüei sen alaphetlabü ayingsi sen athangetlabü,’ dogo lauda, haoen inei hailabü.”

¹¹“Kho chaloua Dawideibü lemshang neichem tuongan kibü ngei phonlabü, hoba kho leilubü thipetlabü hoba hao leilubü ngei phonngaikulabü hoba shangied kibü tegü ngei kho danglabü;

¹²khei haoenei Edom jouletbü hoba kü nyena ngabü phang pendou lela shanga,” dogo kho kümbou BUNYUBOUei lauda.

¹³“Chühashi, sek shapbouei youlatbou, hoba semlüh kebouei nakbou leilabü chalou shuong louada,” dogo BUNYUBOUei lauda. “Shonghnyuei ih teibü koutilabü, hoba shonghshou pendou khoei nyakko koulabü.

¹⁴Hobaje ngei kü mütli Israelbü langsenbü ka nyibou leian loulabü. Haoenei leilubü sangnyu shuong kümetlabü, hoba khünei kilabü; hoba haoenei semlühlaak lelabü; hoba khoeibü ih yunglabü, hoba haoenei balaak lelabü, hoba khübü buhek shaulabü.

¹⁵Hobaje ngei Israel jembü kaodaka kean pholabü, hoba ngei haoen la kubü haoeneibü kaodak ka touje ladangkei apheilanglabü,” dogo BUNYUBOU Mühghaüei lauda.