Read Chang Naga JONA 1 Bible Online

JONA 1 - Chang Naga bible

JONA 1

¹Tou Amittaieibü shou Jona jungto BUNYUBOUeibü ngüh ho hai lenko loukei.

²“Meimeiashi, sangnyu yaangbü Ninevi khüto hauashi, hoba kho khulimbo ngekashi, aishanga haoen amaibü kü jungto longa.”

³Lausikei BUNYUBOU thedang ka Tarshish to satla Jona meimeikei, hoba hao Joppa to yankei hoba Tarshish to haulabü longchem che hapbei; hibü haoei mu kukei, hoba haoen yoto Tarshish to BUNYUBOU jungka bangjung haula khonei yankei.

⁴Lausikei BUNYUBOUei yeithuyeinak yaangbü yungnyu to hautikukei hoba yungnyua yeishik yaangbü che kikei, hibü longchem kho leilula tegü yeikei.

⁵Kheijinei longchema kümbüleibü shuong hatkei hoba mütpem wekoei lulueibü mühghaü to ngekkei hoba kho songoktila shanga haoenei longchem kabü peisilei sonan apbei. Lausikei Jona je longchem maangto atan kikei, hoba hao yepbei, hoba maangamaiko nyeket shian kikei.

⁶Hibü longchem leiyeibou kho hao jungto loukei, hoba hao to laukei, “No ho ai tetlabü, O nyeket shibou? Piashi, kaibü mühghaü to ngaashi! Aingenyu, haoei sen ashemtilabü lele denche dambulabü.”

⁷Hobaje haoen si haoen joyoko laukei, “Kaiya, ao laüa ho thushed ho sen jungto loudaje kho senei ngela phaang pakkho.” Hibü haoenei phaang pakkei, hoba kho Jona to shatkei.

⁸Kheijinei haoenei hao to laukei, “Lenshima, ao laüa ho thushed sen thükto louda, kün la lenbü. Kaibü kümsilei ai hoba no laka louda? Kaibü kaodak ai hoba no laobou mütli ka?”

⁹Kheijinei haoei haoen to laukei, “Ngo Ibribü, yungnyu si kaolin kümbou BUNYUBOU khuthük Mühghaü to ngei lemda.”

¹⁰Kheijinei mütshuong kho aeibou hatkei hoba hao to laukei, “Nyi ho ai kümbei?” Aishanga hao BUNYUBOU jungka satda dogo mütshuongei ngekei; aieilausi haoei haoen to lenan apbei.

¹¹Kheijinei haoenei hao to laukei, “Yungnyu kho sen shanga küpjembo yeitila shanga künei ka to ai kümla?” Aishanga yungnyu deishou kho aei aei ong amaibou yeikei.

¹²Hobaje haoei haoen to laukei, “Ngo baman sungashi hoba yungnyu to tekan jinashi, khoei kan shanga yungnyu sangsemlabü, aishanga ho deishou yaangbü kü laüa kan thüka kia dogo ngei ngekei.”

¹³Khei yingasikei mütshuongei haoen sepeian kao sühla haujembo longchem leikei, lausikei haoenei athük, aishanga haoen limbo deishou aei aei ong longkei.

¹⁴Hibü haoenei BUNYUBOU to ngekkei, hoba laukei, “O BUNYUBOU, künei ka to sudajada, ho müteibü langkei shanga kün temautima, hoba shed akibü sii kün thükto tejinkuma, aishanga O BUNYUBOU, nyi maangangbü tegü kho küma.”

¹⁵Hibü haoenei Jona leibakei hoba yungnyua hao baman jinkukei, hoba yungnyu jembü khauang ka thakkei.

¹⁶Kheijinei mütshuongei BUNYUBOU to aeibou hatkei, hoba haoenei BUNYUBOU la haitibü lembü kukei, hoba theyolanyokei.

¹⁷Hobaje BUNYUBOUei Jona suitila ngaoyaang che lamlekei hoba ngaoeibü shimunga Jona chalou sem hoba langyang sem kikei.