Read Chang Naga WEJAKBÜ 1 Bible Online

WEJAKBÜ 1 - Chang Naga bible

WEJAKBÜ 1

¹Nyiboubü lit shaangbou nyet Ijep kaodak ka haoen longan nyibou poa Sinai lamanga kamshang neichema BUNYUBOUei Mosa to joyokei.

²“Israel shousi shuong pendou chung, chempen, lulu müt wean chühashi, bousu phai lühbak longashi;

³po saoche thükae, Israelbü yoa wapyola hauenlabü shuong pendou Aron kasiei haoen tan wean chühjan.

⁴Phang weko ka müt che bang, khei chempen yoa khuleibü wekoei ka to thuijan.”

⁵Habü mütshuong ho kümsilei shanga mütli yo ka pienbü lulu phang leiyeibü shuong ki: [Phang] — [Chunga leiyeibou] Reuben — Shedeur shou Elizur Simeon — Zurishadai shou Shelumiel Jihuda — Aminadab shou Nashon Issakar — Zuar shou Nethanel Zebulun — Helon shou Eliab Efraim — Aminhud shou Elishama Manasse — Pedazur shou Gamaliel Benjamin — Gideon shou Abidan Dan — Amishadai shou Ahiezer Asher — Okhran shou Pagiel Gad — Deuel shou Eliasaf Naftali — Enan shou Ahira.

¹⁷Mosa si Aronei haoen lulu nyenei ngabü müt habü ho lekei.

¹⁸Hobaje haoen tan pendou liko nyiboubü lit shaangboua kamshaikei hoba khuleibouei leian po saoche ka thükae pendou mütpem weko chung hoba chempen nyen shenko dotikei.

¹⁹BUNYUBOUei Mosa la sakkubü tegü haoei Sinai lamanga wean chühkei.

²⁰Hobaje Israeleibü shou jaishoubou Reuben ka pakbü chung chung chempen chempen khuleibouei leian wapyola haula thükbü bousu weko po saoche thükae nyen dokei. [Phang] — [Lühbak] Reuben — 46,500 Simeon — 59,300 Gad — 45,650 Jihuda — 74,600 Issakar — 54,400 Zebulun — 57,400 Efraim — 40,500 Manasse — 32,200 Benjamin — 35,400 Dan — 62,700 Asher — 41,500 Naftali — 53,400 Pendouei — 603,550

⁴⁴Mosa si Aronei weanchühbü habü yoa Israelbü leiyeibü müt anthüknyi yoan habü ho kikei; haoen mütpem weko kho jembü chung si phang shanga kikei.

⁴⁵Hibü Israel shousi shuong pendou chempen chempen webü po saoche thüka wapyola haula thükbü pendou Israelbü,

⁴⁶khei haoen pendou wean chühbü hajar saosemto lak hoba saongao ngaoto anjinsem.

⁴⁷Levi ka pakbüje haoen yoa lühbaka ayo.

⁴⁸Aishanga BUNYUBOUei Mosa to laukei,

⁴⁹“Levi chemdangje nyi lühbaka ajinlabü, ayingsi Israel shousi yoa nyi haoen lühbak pendou wean ajinlabü.

⁵⁰Lausikei lemshang neichema ngühkhüm busen hoba peisilei pendou thüka hoba kho shanga pendou thüka ikjaibü shuong Levibü nyi pienshi; haoenei lemshang neichem hoba khoeibü peisilei pendou künlabü kho haoenei thounoulabü hoba lemshang neichem kaijembo shailabü.

⁵¹Hobaje ladang ong lemshang neichem kukjung satlaje Levi shuongei kho sunglabü; hoba ladang ong lemshang neichem danglaje Levi shuongei kho dangjan, lubü ao nyangko loulaje kho haitilabü.

⁵²Hobaje Israel shousi shuongei haoeneibü neichem mütpem weko lulueibü sühshang hoba tan tan lakjaibü tan tegü thenei thenko dangjan.

⁵³Lausikei Israel shousi shuong yoa khauang longbü akila shanga Levi shuongei ngühkhüm busen kishang lemshang neichema ngühkhüm busen kho thounoujan.”

⁵⁴Kho tegü BUNYUBOUei Mosa la sakkubü pendou tegütham Israel shousi shuongei kho tegü kümbei.