Read Chang Naga WEJAKBÜ 11 Bible Online

WEJAKBÜ 11 - Chang Naga bible

WEJAKBÜ 11

¹Tou mütshuongei BUNYUBOUei ditko amaibü lauko nyamnyambei, hoba kho BUNYUBOUei ditsi hao khauangkei; hoba BUNYUBOUeibü wan haoen yoa longkei, hoba shaishang nongbü at juokkei.

²Hobaje mütshuongei Mosa to ngekkei, hoba Mosaei BUNYUBOU to welaukei, hoba wan kho nyetkei.

³Hobaje kho kaoen la Tabera dogo nyenkukei, aieilausi BUNYUBOUeibü wan kho haoen yoa longkei.

⁴Hobaje haoen yoa kheiyobü danei phe mühkei, hoba Israel shousi shuongeikei nyibou haapbo laukei, “Aoei kün la shaulabü phe kula?

⁵Ijepa künei phe apsileko shaubü, simo, chilimo, leilangaudei, lasüng, hoba ishepaudei damenda;

⁶lausikei tou kün mühei haida, ai aki, mana to liman künei ai aki.”

⁷Mana kho koriander son tegü chühla senyak phatan kikei.

⁸Mütshuongei hauan kho yoshaiko paikei, hoba kho laanga ngünan ayingsi shema shikei, hoba kho chaka ngouan khoei wentek kümbei hoba kho shaula onang yoan wen on ngoubü tegü kikei.

⁹Shaishanga nin lenjinei kho thüka mana kho atkei.

¹⁰Hobaje Mosaei eikshuong chemdang weko lulueibü neichem koukhüna haapbo ditkei, hoba BUNYUBOU khau aeibou angkei, hoba Mosa maangto shatko kikei.

¹¹Hobaje Mosaei BUNYUBOU to laukei, “Aila no khangenbou thüka nyi hai kaangko jungeida? Nyi habü mütshuongeibü on pendou kü la küntilabü lele ka junga ngei onou ühüp lo?

¹²Ngei habü mütshuong pendou shia künkei sai? Ayingsi haoen ngeibü khukua tonan nanubüei senyopbü nashou leibü tegütham nyi haoeneibü pisi shuong to theyolanyoko theletbü kaonyek khüto leian hauashi dogo kü to nyi lenlabü lele ngei haoen bukkei sai?

¹³Ngei habü mütshuong pendou la lakabü phe sungbakula? Aishanga, ‘Künei shaula kün la phe labü’, dogo haapbo haoenei kü to lauda.

¹⁴Kü mütpemei habü mütshuong pendoueibü on künla athük, aieilausi ho kü shanga yongko atshaiakei.

¹⁵Ho tegü nyi kü to jungeialonga, ngo lepde haitian apashi, dogo ngei ka to sudajada; ka thedanga ngei onou hapalonga kü la touje ngeibü khonsak tehüpti.”

¹⁶Hobaje BUNYUBOUei Mosa to laukei, “Israelbü jaishou anjinlei noknyüh yoa jaishou shuong, hoba haoen thüka jaishou dogo nyi ngebü shuong kü jungto yoshaitiashi hoba haoen kamshang neichem jungto khünei ka yoa lola shanga leiba.

¹⁷Hobaje ngo louyenlabü hoba khünei ka to joyolabü hoba ka to kibü soushou at sungan haoen thüka phokulabü, hoba müt shuongeibü on ka mütpemei aying haoenei kho ka to janyoko künlabü.

¹⁸Hobaje nyi mütshuong to laushi: Kanei phe shaula shanga kan lolo ngiet shanga saüenashi; aishanga, ‘Aoei künla shaula shanga phe kula aishanga Ijepaje kün lemseko kikei’, dogo kan haapbei hoba BUNYUBOUei ditkua; hibü BUNYUBOUei kan la phe kulabü, hoba kanei shaulabü.

¹⁹Kanei chalou che ayingsi nyinyet ayingsi ngaonyet ayingsi annyet ayingsi saochenyet ong ashaulabü.

²⁰Lausikei lit onko kungkhün ka longeiko oko shaulabü, aishanga kan yoa kibü BUNYUBOU kanei asunglet, hoba hao thedanga aila kün Ijep ka longkei dogo haapbo laukei.”

²¹Hobaje Mosaei laukei, “Noknyüh aoyou yoa ngo ki, youei paibü hajar saongaolak kia, hoba nyi laukei, ‘Haoenei lit onko shaula ngei haoen la phe kulabü.’

²²Haoen souko haoen shanga san shuong hoba masu shuong haitilep sai? Ayingsi yungnyua ngao pendou haoen shanga lapsikei khoei haoen soulep si?”

²³BUNYUBOUei Mosa to laukei, “BUNYUBOUeibü ik kheinyu tuikei lo? Ngeibü ngüh haüthüklasi ühaüthüklaje tou nyi haplabü.”

²⁴Hobaje Mosaei hauan BUNYUBOUeibü ngüh noknyüh to lenkei, hoba noknyüh yo ka jaishou anjinlei haoei kamtikei, hoba neichem kaijembo lotikei.

²⁵Hobaje sangmeia BUNYUBOU louyenan hao to joyokei hoba hao thüka kibü soushou at sungan jaishou anjinlei thüka phokukei; hoba ladang soushou kho haoen thüka kikei, haoenei tetenbü ngüh joyokei.

²⁶Lausi shaishanga müt nyi, müt cheeibü nyen Eldad hoba lubü cheeibü nyen Medad kikei, hoba haoen thükto Soushou lotkei, hoba haoeneibü nyen doan jinkei, lausikei neichem ka üang; hoba haoenei shaishanga thusei ngüh laukei.

²⁷Hobaje heshou che laangjung hauan Mosa to laukei, “Eldad si Medad haosiei shaishanga thusei ngüh lauda.”

²⁸Hobaje haoei pienbü yoa che, Mosa khangenbou Naneibü shou Joshuaei laukei, “Ngeibü bunyubou Mosa, haosi thaktiashi!”

²⁹Lausikei Mosaei hao to laukei, “Nyi kü hangshong nyekto shatda sai? BUNYUBOUei haoeibü soushou haoen la jinkuko BUNYUBOUei noknyüh pendou thuseibü la yeitikua tegükei maikhoulabü!”

³⁰Hobaje Mosa si Israelbü jaishou shuong shaishang to ngaikei.

³¹Hobaje BUNYUBOU ka yei che hautikukei hoba yungnyu ka aupi soubakukei. Hobaje khübü kho shaishang nyangko jijinei chalou che thüng lam shaishang kaijembo tanga iknop penyi thüng shangko attikei.

³²Hobaje khünyet kho mütshuong yepbü laksepan lang- yang pendou hoba nyibounyetkei chaseko aupi heshaikei; pendou to shibou yoshaiboueikei homer an yoshaikei; hoba haoenei shaishang kaijembo khübü kho seknyinan phokei.

³³Tokei phe kho anyaiko hauh kanglanga kijinei BUNYUBOU khauang noknyüh khulimbo longkei, hoba BUNYUBOUei lim yaangbü cheei mütshuong to ik shatkei.

³⁴Hobaje kaoen khüto Kibroth Hattaava dogo laukei; aieilausi haoenei khünei phe mühbü shuong khünan phokukei.

³⁵Kibroth Hattaava ka mütshuong Hazeroth to meimeijung haukei, hoba haoen Hazerotha shaikei.