Read Chang Naga WEJAKBÜ 13 Bible Online

WEJAKBÜ 13 - Chang Naga bible

WEJAKBÜ 13

¹BUNYUBOUei Mosa to laukei,

²“Israelbü la ngei kula kibü Kanan kaodak shuchühla nyi müt hautiashi, ho bou chung weko ka müt che che hoba haoen yoa haoen mütpem weko kho leiyeibou che che yingjan.”

³Hobaje BUNYUBOUei sakkubü tegü, Mosaei Paran lamang ka haoen hautikei; haoen pendou Israel shousi leiyeibü shuong. Khübü kho haoeneibü nyen kikei: [Phang] — [Bou] — [Leibou] Reuben — Zakur — Shammua Simeon — Hori — Shafat Jihuda — Jeffune — Kaleb Issakar — Josef — Igal Efraim — Nan — Hoshea Benjamin — Palti — Rafu Zebulun — Sodi — Gadiel Manesse — Susi — Gadi Dan — Gemali — Amiel Asher — Mikhael — Sethur Naftali — Vofsi — Nabi Gad — Maki — Geuel

¹⁶Kaonyek pheila Mosaei hautibü mütshuong nyen habü ho ki.

¹⁷Hobaje Kanan kaodak pheila Mosaei haoen hautikei, hoba haoen to laukei, “Yungkük aeto atashi, hoba shongh to angashi,

¹⁸hoba kaonyek kho ailai tegübü, khünei kibü mütshuong hau kibü si akibü, haoen shisho si juong chühashi.

¹⁹Hobaje haoen kibü kaonyek kho ai tegübü maia si amai hoba haoen kishang sangnyu shuong kho ngasinyua si wetba phanga kida;

²⁰hoba kao kho lai tegübü haabü ki si kaolo ki, lamang yaangbü kilao? Hobaje maang kaangashi hoba kho kaodak kabü buhek sungba.” (Tou kho jihsiphai kho semlüh elibou sembü jihsiphai kiteikei.)

²¹Hibü haoen angkei, hoba Hamat ae Zin lamang ka Rehob sühko kaonyek kho shuchühkei.

²²Hobaje haoen yungkük aeto atkei, hoba Hebron to loukei; hoba khünei Anak shousi Ahiman, Sheshai, hoba Talmai kikei. (Tou Hebron kho Ijepa Zoan toje po nyet thedangto sangan kikei.)

²³Hobaje haoen Eshkol pholi to loukei hoba khünei semlüh shen che thonan wetan sungkei, hoba kho müt nyiei kaanga lengkei; tokei haoenei chilang hek si bhuk sungbakei.

²⁴Kho pholi kho to Eshkol dogo laukei, aieilausi Israel shousi shuongei khünei semlüh shen wetan sungkei.

²⁵Hobaje chalou saonyinyet kian phaia shuchühbü shuong kaonyek ka sepeinyu longeikei.

²⁶Hobaje Mosa, Aron hoba Kadesha Paran lamanga Israel shousi tan pendou jungto haoen longeikei; hoba haoen tan pendou jungto sepeinyu ngühlang sungbakei, hoba kaonyeka hekbü buhek kho haoen la lenkei.

²⁷Hobaje haoenei hao to laukei, “Nyi kün laito hautikei kho kaonyek to haukei, hoba khünei maimaitham sendei hoba naodei kouda, hoba khükabü buhek ho ki.

²⁸Khei yingasikei khünei kibü müt hau kibü hoba sangnyu shuong ba lelepan kia, hoba aeibou yaangkei, hoba khüto liman künei Anakbü shousi shuong khünei hapa.

²⁹Yungkük kaonyeka Amalekbü kia hoba Jebusbü hoba Amorbü kida; hoba Kananbü Yungko hoba Jordan yungkoa kida.”

³⁰Kheijinei Mosa thedanga Kalebei mütshuong ngüh üangtiko laukei, “Sen meimeijung angkho hoba kho kaonyek lekho aishanga senei kho thükenakei.”

³¹Lausikei hao yoa angbü shuongei laukei, “Aying, senei khübü mütshuong limbo angla athük, aishanga sen toje haoen hau kibou ki.”

³²Hobaje haoenei shuchühbü kaonyek shanga ngühlang amaibü sungbaan laukei, “Laobou kaonyek künei shuchühla haukei, kaonyeka kibü mütshuongei shauthüng ongkei langle kesiong alongda, hoba khünei künei hapbü mütshuong süngsilop loubü yaangbü ong ki.

³³Hobaje khünei Nefilim ka loubü Anak shousi shuong Nefilimbü künei hapbei, hoba kün koksüng tegü ong kikei, hoba kün haoen to takteisi khei ong kikei.”