Read Chang Naga WEJAKBÜ 14 Bible Online

WEJAKBÜ 14 - Chang Naga bible

WEJAKBÜ 14

¹Kheijinei mütshuong pendouei ngüh angko ngekkei, hoba khüyou mütshuong haapbei.

²Hobaje Israel shousi pendouei Mosa si Aron khulimbo nyamnyambei hoba shuong pendouei haosi to laukei, “Mühghaüei kün Ijep kaodaka haitian kikei yingma! ayingsi kho lamanga haitikei tegüje maikhoulabü!

³Aila kün inei tuongtila Mühghaüei leian loukei? Küneibü yaksi hoba shousi shuong haitilabü lele yeilabü kün shanga Ijep to sepeian ngaibü maibou aying lo?”

⁴Hobaje haoen cheei che to laukei, “Senei lajamleibou che pienan Ijep to sepeinyu ngaikho.”

⁵Kheijinei mütshuong pendou kaman kibü thedanga Mosa si Aron haosi ham the khüman apbei.

⁶Hobaje kaonyek saabü to haubü yoa Naneibü shou Joshuaei si Jefuneeibü shou Kaleb haosi hamei jembü neisimei jitnyinkei,

⁷hoba Israel shousi pendou to haosiei laukei, “Kaonyek laobou shuchühko künei danjung haukei kho kao maibü ki.

⁸BUNYUBOUei sen to maang shikalanga haoei kho kaodak to sen leian haulabü hoba sendei si naodei kouko kibü kaodak kho sen la kulabü.

⁹BUNYUBOU khulimbo ong temeimei ayingsi kaonyeka kibü mütshuong to kan tehütma; aishanga khübü kho sen shanga shausiyung ong yinglabü, haoen püetlabü hau haoen ka sungngaia, hoba BUNYUBOU sen yoa kia; haoen to tehütma.”

¹⁰Lausikei shuong pendouei haosi to laangei tetla lauyokei, kheijinei BUNYUBOU soneikangbü kamshang neichema Israel shousi pendou thüka longkei.

¹¹BUNYUBOUei Mosa to laukei, “Habü mütshuongei kü la lalokche nyikula? Haoen yoa ngei tetsida pendou kümasikei lalok- che haoenei kü to maialemla?

¹²Ngei haoen limeilangei shemtilabü hoba haoenei phet aphantilabü, hoba haoen toje ka ka phang yaangbü hoba yaangenbü yeitilabü.”

¹³Hobaje Mosaei BUNYUBOU to laukei, “Khei yingalonga Ijepbüei kho ditlabü, aishanga haoen yo ka kaibü hauei nyi habü mütshuong leiyenkei;

¹⁴hoba kho haoenei kho kaonyeka kibü shuong to lenlabü. No BUNYUBOU habü mütli yoa kia dogo haoenei dida. Aishanga no BUNYUBOU theshuok hapda hoba kaibü sangmei haoen thüka loda, hoba changea sangmei thaonyua hoba nangnak wan thaonyua no haoen thedanga hauda.

¹⁵“Tou nyi habü mütshuong müt che tegü haitikho laualonga kheijinei kaibü nyenhaang ditbü phangshuongei,

¹⁶‘BUNYUBOUei haoen la thekubü kaodak to haubü haoei leian loula athük, hibü haoei haoen yama haitikei’ dogo laulabü.

¹⁷Hobaje tou ngei ka to sudajada, ‘BUNYUBOU khauang longla apanteida hoba üeisanoua souetnyu, shabü shonbü hoba ngühkhüm lulimbü shed apbuda, khoei shedbü kaakbü aieikei asaopoenkuda; nyusibousiei shed shonbü shanga shisi shousi thükto sembou leiboubü meten sühko peanchühda,’

¹⁸dogo nyi laubü tegü BUNYUBOUeibü hau yaangbou.

¹⁹Ngei ka to sudajada, kaibü üeisanou yaangbü tegü habü mütshuongei shed shonbü, hoba Ijep ka tou sühko habü mütshuong la shed apbubü tegü shedbü apbushima.”

²⁰Hobaje BUNYUBOUei laukei, “Kaibü ngüh tegü ngei shedbü apbuda,

²¹lausikei ngo tükde lang kibü hoba kaodak pendou ngeibü soneikangbüei shenlabü;

²²aieilausi ngei Ijepa hoba yama kümbü hapbü shuongei toukei tou hoei anboubü ngo takteia hoba ngeibü ngüha ale.

²³Kheijinei ngei haoeneibü nyusibousi la thekubü kaodak haoenei ühüplabü, ayingsi kü la nyikubü cheei ongkei kho ühüplabü;

²⁴lausikei ngo khangenbou Kaleb to soushou phangche kisije hao haubü kaonyek khüto ngei hao leian loulabü, hoba haoeibü shousi shuongei kho lelabü.

²⁵Tou Amalekbü si Kananbü pholia kisije ngiet kan sepeiashi, hoba Saklangbü Yungnyu ae yam khüto atashi.”

²⁶BUNYUBOUei Mosa si Aron to laukei,

²⁷“Lalokche ngo khulimbo nyamnyambü habü amaibü dan to ngei aman apla? Israel shousi shuongei nyamnyambü laobou haoenei ngo khulimbo lauyokei kho ngei dida.

²⁸Haoen to lenashi, BUNYUBOUei lauda, Ngo lang kisije, maimaitham kanei ngei ditko lauyobü tegü, kho tegü ngei kan to kümlabü.

²⁹Kaneibü haibü mang ho yamlamanga nyaüan aplabü, hoba kaneibü lühbaka yobü dan khümbo po saoche ka thükae aoyouei ngo khulimbo nyamnyambei,

³⁰maimaitham Jefuneeibü shou Kaleb hoba Naneibü shou Joshua to liman, laobou kaodak shanga kan kitila ngei ngeibü ik tuokkei, khüto kan aloulabü.

³¹Lausikei kan nashou hanbü shuong, aoyou haitila shanga kilabü dogo kanei laukei, haoen ngei leian loulabü, hoba kanei asungletbü kaodak kho ngelabü.

³²Lausikei kan shangaje kaneibü mang nyaüan aplabü.

³³Hobaje kaneibü shousi shuong yama po saonyi sanlombou la yeian kilabü, hoba yama kaneibü mang anyaület shongko kan pejapelabü on kanei künlabü.

³⁴Kanei kaonyek saabü chalou tetan, khei chalou saonyi, chalou che che kho po che che, khei po saonyi, kanei shonshaibü shedbü kanei künlabü, hoba kanei kü ka thangetbü ngejung loulabü.

³⁵Ngo BUNYUBOUei lauan apa, ngo khulimbo yoshaian kibü amaibü dan pendou maimaitham ngei kümlabü; ho yama haoen hailabü, hoba khünei haoen hailabü.”

³⁶Hobaje Mosaei kaonyek shu- chühla hautibü sepeinyu longeibü mütshuong, aoyouei kaonyek khulimbo ngühlang amaibü künan loubüei shuong pendouei hao khulimbo nyamnyamtikei,

³⁷khei kaonyek shangabü ngühlang amaibü sungbabü shuong BUNYUBOU thedanga limei haitikei.

³⁸Lausikei kaonyek shuchühla haubü shuong yoa Naneibü shou Joshua hoba Jefuneeibü shou Kaleb lang joukei.

³⁹Ladang Mosaei Israel shousi shuong pendou to habü ngüh laukei, haoen pendou khauko mang haapbei.

⁴⁰Hobaje haoen pian ngeyang shongh to angan laukei, “BUNYUBOUei lenbü kaonyek to angla kün hanei kia; aishanga künei shabü shona.”

⁴¹Lausikei Mosaei laukei, “Thük ühüplabü dogo kan lolo chühenan aila BUNYUBOUei sakkubü ngüha aleko hauda?

⁴²Kaneibü dangbou thedanga kan haitisi amaibüla tüang, aishanga BUNYUBOU kan yoa aki.

⁴³Aishanga kan thedanga Kananbü si Amalekbü kia, hoba haoeneibü inei kan tuonglabü; aieilausi kanei BUNYUBOU phai asembo sepeinyu ngaikei, hibü BUNYUBOU kan yoa aki.”

⁴⁴Lausikei haoenei ü dogo tukosekko shongh to angkei; khei yingsikei BUNYUBOU thebülanbü ngühkhüm Busen hoba Mosa shaishang ka ameimei.

⁴⁵Kheijinei Amalekbü si kho shongha kibü Kananbü louyenkei, hoba haoen to wapyokei, hoba Horma sühko haoen shikei.