Read Chang Naga WEJAKBÜ 15 Bible Online

WEJAKBÜ 15 - Chang Naga bible

WEJAKBÜ 15

¹BUNYUBOUei Mosa to laukei,

²Israel shousi shuong to lenashi, Ladang ngei kan la kubü kan jembü kaonyek to louan kilaje,

³hoba BUNYUBOU la lembü kulaje, juokbü lembü ayingsi haitibü lembü ayingsi maangmai lembü ayingsi masu si sanlon tan ka BUNYUBOU shanga ponlem hilabü kanei hangang leko kibü lema theletbü haüthükla shanga lemlaje,

⁴kheijinei aoei lembü kulaje, onang hin che phejan leiboubü yoa wen inyaibü efa chea anboubü phejan kheiyoan shausiyung lembü BUNYUBOU shanga kujan.

⁶Ayingsi sanlon paang che shanga shausiyung lembü penyi lamlela shanga wen inyaibü efa che anboubü phejan penyi yoa onang hin che semboubü phejan kheiyoan nyi lemjan.

⁷Hobaje yunglabü lembü shanga ih hin che phejan semboubü ponlem maibü shanga BUNYUBOU to nyi lemashi.

⁸Hobaje juokbü lembü ayingsi phangche takletbü loushedtila haitian lembü ayingsi sangmai lembü shanga BUNYUBOU shanga nyi masu pongsu kujan.

⁹Haoei masu pongsu yoa shausiyung lembü wen inyaibü efa an phejana semthüng onang hin thoche yoa lemjan.

¹⁰Hobaje BUNYUBOU shanga ponlemhibü wanei lembü ih hin che tho yunglabü lembü shanga nyi lemjan.

¹¹Kho tegü masu pongsu weko, sanlon weko, sanlon paang weko, hoba lonshou weko shanga kümjan.

¹²Kanei lajuche lemlaje kho weko shanga kho tegü khübü lühbak thüng kanei kümjan.

¹³BUNYUBOU la ponlem maibü shanga lembü kujinei sangbüshou wekoei ho tegü kümjan.

¹⁴Hobaje yenbou che ka yoa kialonga, ayingsi kan yoa ponpen kibü yingasikei, haoei BUNYUBOU la ponlem maibü lemmang sühalonga, haoei tükde kanei kümbü tegü kümjan.

¹⁵Mütshang pendou shanga hoba yenbou shanga ngühkhüm deikhüm che ong kijan, kan meten sünga lole ngühkhüm yenbou hoba kan BUNYUBOU junga jetei kilabü.

¹⁶Kan hoba kan yoa kibü yenbou shanga ngühkhüm deikhüm che ong kilabü.

¹⁷BUNYUBOUei Mosa to laukei,

¹⁸Israelbü to lenashi: Ngei kan leian loulabü kaodak to kan ladang atlaje,

¹⁹kheijinei kaonyek kabü shausiyung kanei shaujinei kanei BUNYUBOU to lemjan.

²⁰Shaangla wen kümbü jihsi- phaia amshang ka heshaibü tegü lulu phoan kanei wentek che lemla shanga kujan.

²¹Kanei shaangla wen kümbü ka kan meten sünga BUNYUBOU la phejan che kuashi.

²²Hobaje ladang BUNYUBOUei Mosa la kubü habü ngühkhüm ajungeiko mashiklaje,

²³khei Mosa danko BUNYUBOUei kan la sakkubü pendou BUNYUBOUei ngühkhüm kubü chalou ka, hoba kaneibü meten sünga;

²⁴kheijinei kho shuongei angeko mashikan kümsi ngühkhüm tegü shausiyung lembü yoa yunglabü lembü yoa, hoba shabü lembü shanga lonpaang che, BUNYUBOU la ponlem maibü shanga noknyüh pendouei masu pongsu che juokbü lembü shanga lemjan.

²⁵Hobaje Israel shousi shuong shanga ungshedbouei shabü debü kümsilei kümjan, hoba haoen la shedbü apbulabü, aishanga kho mashikbü kikei, hoba BUNYUBOU to wanei lembü, haoenei lulueibü lembü sungba hoba haoenei mashikbü shanga BUNYUBOU jungto lembü junga,

²⁶hoba Israel shousi khümbo hoba haoen yoa kibü yenboula shedbü apbulabü, aishanga müt pendouei alemlele mashikkei.

²⁷Hobaje müt cheei mashikan shabü shonalonga, kheijinei shabü lembü shanga haoei po cheeibü shou lon saoen cheei lemjan.

²⁸Hobaje mashikbü müt shanga ungshedbouei shabü debü kümsilei kümjan, ladang haoei BUNYUBOU thedanga angeko shabü shonlaje, hao shanga shabü hangan apbulabü, hoba hao la shedbü apbulabü.

²⁹Israelbü yoa kaonyek kabü sangbüshou yingsikei ayingsi kan yoa küksithang yingasikei, aoei angeko denche kümlaje hao shanga ngühkhüm che kijan.

³⁰Lausikei aaomüt aoei ngean shabü shonlaje, hao kaonyeka bukmüt yingasikei, yenbou yingasikei haoei BUNYUBOU khulimbo aweasüngda, hibü hao mütli ka wapan aplabü.

³¹Aieilausi kho BUNYUBOUeibü ngüh haoei aweasüngda, hoba haoei sakkubü haoei leilukuda, kho müt kho saopotham wapan aplabü, haoei shonbü shedbü hao to kilabü.

³²Hobaje Israel shousi shuong yamlamanga kijinei haoenei müt che Nounyet bu lakko hapbei.

³³Hobaje aoyouei hao bu lakko hapbei haoenei hao Mosa, Aron hoba shuong pendou jungto leian loukei.

³⁴Hobaje haoenei hao thüngshanga phokei, aieilausi hao to ai kümla hao la angetiko kikei.

³⁵Hobaje BUNYUBOUei Mosa to laukei, “Müt kho tükde haitijan; shaishang khongaenei noknyühei hao to laangei tetlabü.”

³⁶BUNYUBOUei Mosa to laubü tegü, noknyühei hao shaishang ka leian longan laangei hao to tetkei hoba hao haikei.

³⁷BUNYUBOUei Mosa to laukei,

³⁸Israel shousi shuong to lenashi, hoba haoen to haoen meten sünga nei-ikshobü wekoa pi leithonei phenan haoen shanga nei-ik haoenei kümjan dogo lenshi.

³⁹Hobaje nei-ik kho kan shanga kanei chühlabü hoba BUNYUBOUei sakkubü pendou damenlabü hoba khübü kho kümlabü; hoba laobou phaito pejapelako haukei, kho phai kan lulueibü maangpon hoba kan jembü nyek ohautila shanga kho kilabü.

⁴⁰Khei ngeibü ngühkhüm pendou kanei damenko khübü kümla hoba kaneibü Mühghaü shanga saüenan kila shanga.

⁴¹Ngo BUNYUBOU kaneibü Mühghaü ki; ngo kaneibü BUNYUBOU yingla shanga ngei kan Ijep ka leibakei. Ngo BUNYUBOU ki.