Read Chang Naga WEJAKBÜ 16 Bible Online

WEJAKBÜ 16 - Chang Naga bible

WEJAKBÜ 16

¹Tou Levi ka pakbü Kohateibü shou Izhareibü shou Kora, Reuben ka pakbü Peleteibü shou Eliab hoba Oneibü shou Dathan hoba Abiram yoan,

²haoenei Israel mütshuong yoa at yoan nyenshen müt tan ka pienan tan leiyeibü 250ei Mosa khulimbo meimeikei;

³hoba Mosa khulimbo, hoba Aron khulimbo haoen takshatkei hoba haosi to laukei, “Ho yongko limshanga; aishanga tan pendou khei müt weko saopobü ki; khülonga aila kanei BUNYUBOUeibü tan thüka kan lolo yaangenda?”

⁴Mosaei kho ditjinei hao the khümbei;

⁵kho phaia haoei Kora hoba haoeibü tan pendou to lenkei: “Ngeyang BUNYUBOUeibü ao haoeibü, hoba ao saopobü ki kho lenlabü, hoba hao kho hao nyangko loutilabü;

⁶Ho kümashi, Kora hoba haoeibü tan pendouei wankak suokjin phau jungashi;

⁷hoba khünei wan jinashi; hoba ngiet BUNYUBOU junga jen jinashi, hoba BUNYUBOUei ao pienlaje hao saopobü kilabü. Kan Levi shousi shuong yongko dansepa!”

⁸Hobaje Mosaei Kora to laukei, “Tou ditashi, kan Levi shousi shuong;

⁹Israelbü shuong yo ka kan ong khanan pian sungan hao nyangko loutibü, BUNYUBOUeibü lemshang neichema khangenlabü, hoba shuong thedanga loan haoen khangenlabü;

¹⁰hoba haoei no hao nyangko loutilabü, hoba ka yoa kaibü jaisina Levi shousi pendou hao nyangko loutibü, ho kan shanga takübü kümsilei sai? hoba kanei ungshed kümsileikei lamda sai?

¹¹Khei yingsije khoei no hoba kaibü phaisembü pendou chela takshatbü ho BUNYUBOU khulimbo ki; hoba kanei Aron khulimbo nyamnyamlabü lele haoei ai kümbei?”

¹²Hobaje Mosaei Eliabeibü shou Dathan si Abiram ngala hautikei; hoba haosiei kün alonglabü dogo laukei.

¹³“Sendei hoba naodei kouko kibü kaonyek ka nyi kün leian louan yama haitila, hoba kün thüka no lolo leiyeibü lela ho takübü che ong sai?

¹⁴Tokei nyi sendei hoba naodei kouko kibü kaonyek to kün leian alou, ayingsi kün la sek ayingsi semlühlaak phetphanla aku; habü mütshuongeibü nyek nyi thutikulep sai? Kün alonglabü.”

¹⁵Kheijinei Mosa aeibou khau- angkei, hoba BUNYUBOU to laukei, “Haoeneibü lembü tesunglet ngei haoen ka gadu che ongkei alekei, ayingsi haoen aotokei ai amaibükei aküm.”

¹⁶Hobaje Mosaei Kora to laukei, “Ngiet no hoba kaibü tan pendou BUNYUBOU thedangto loujan, no hoba haoen hoba Aron;

¹⁷hoba kan müt wekoei lulueibü wanphau junglabü, kho wanphau 250 kilabü; no hoba Aron kasikei lulueibü wanphau jungashi.”

¹⁸Hobaje haoen mütpem wekoei lulueibü wanphau jungkei, hoba khünei wan jinkei hoba khünei jen phokei, hoba kamshang neichem koukhüna Mosa hoba Aron yoa lokei.

¹⁹Hobaje Koraei haoen khulimbo kamshang nei- chem koukhüna mütshuong pendou kamshaitikei; hoba BUNYUBOU soneikangbü tan pendou thükto longkei.

²⁰Hobaje BUNYUBOUei Mosa si Aron to laukei,

²¹“Haoen lepde mautilabü lele kan ho tan ka bangashi.”

²²Lausikei Mosa si Aron haosi lolo the khümbei hoba laukei, “O Mühghaü, khunak shousi soushou pendou thükkabü Mühghaü, müt cheei ong shabü shonbü shanga ho tan khümbo thükto khau anglep lo?”

²³Hibü BUNYUBOUei Mosa to laukei,

²⁴“Shuong to lenashi, Kora, Dathan hoba Abiram lan ki, kho nyangko ka kukashi.”

²⁵Kheijinei Mosa meimeian Kora, Dathan hoba Abiram jungto haukei, hoba Israelbü jaishou hao phai sembei.

²⁶Kheijinei haoei shuong to laukei, “Habü müt amaibüeibü neichem ka kukashi, hoba haoeneibü peisilei aitokei temeiti; khei ayinglonga haoeneibü shabü pendou yoa nokei yoan kujung satlabü.”

²⁷Hibü Kora, Dathan hoba Abiram haoeneibü yaksi, shousi, hoba hanbü shuong yoan longan haoeneibü neichem koukhüna lokei.

²⁸Hobaje Mosaei laukei, “Habü ho ngei maangei kümda aying, habü kümsilei pendou kümla BUNYUBOUei ngo hautikei dogo kanei ngelabü.

²⁹Habü mütshuong, pendou haibü tegü haialonga, ayingsi müt pendou haangei haibü tegü haialonga, khei yingalonga BUNYUBOUei ngo ohauti.

³⁰Lausikei BUNYUBOUei den che haanbü kümalonga hoba kaoei jembü sembung ipan haoenei kibü pendou yoan haoen suialonga hoba haoen lang kian Sheol to yanalonga kheijinei kanei habü mütshuongei BUNYUBOU ekla lea dogo ngelabü.”

³¹Kheijinei habü ngüh pendou laukhümjinei, haoen phanga kao kho paknyinkei;

³²hoba kaoei sembung kaakei hoba haoen pendou hoba haoeneibü peisilei pendou suikei.

³³Hibü haoen hoba haoen yoa yobü pendou Sheol to lang ong yankei, hoba kaoei haoen thüka küplepbei, hoba shuong yo ka haoen maukei.

³⁴Kheijinei haoen kaijembo kibü Israelbü pendou haoenei ngekjinei, “Hali khou! Senkei kaoei suisi amailabü,” dogo lauko satyokei.

³⁵Hobaje BUNYUBOU ka wan longan jen lembü müt 250 kho lonshembei.

³⁶Kheijinei BUNYUBOUei Mosa to laukei,

³⁷“Aron ungshedboueibü shou Eleazar to, longan kibü wan kho phaua yoshaishi dogo lenshi, hoba nyi wan kho pendou aeto saabü to phinan apyoshi, aieilausi phau shuong kho saopobü ki.

³⁸Aishanga habü shabü mütei haoeneibü langkeiei mubü habü wan phau saopobü yeitia. Hibü Israelbü shanga tetlatalabü yeila shanga lemshang shanga küpjinla lela khübü kho sheletham apbo jangjan, aishanga khübü kho BUNYUBOU junga haoenei lembei, hibü khübü kho saopobü la yeian kia.”

³⁹Hobaje Eleazar ungshedbouei chinam wanphau laobou juoketbü shuongei lembei, haoenei kho lemshang küpjin shanga jangkei.

⁴⁰Kho tetlabü Aron shousi to liman lubü aokei BUNYUBOU thedanga jen juokla shanga lemshon to loula athük dogo Israel shousi shuong la maangsangla lenbü ki. Khei ayingalonga haokei Kora si haophai sembü shuong tegütham shemlabü. Khübü pendou BUNYUBOUei Mosa danko Eleazar la sakkubü tegü kümbei.

⁴¹Lausikei nyibounyet Israel shousi shuong pendouei Mosa si Aron khulimbo nyamnyambo laukei, “Kanei BUNYUBOUeibü eikshuong haitia.”

⁴²Hobaje ladang mütshuongei Mosa si Aron khulimbo takshatko kikei, haoenei kamshang neichem naphei to chühkei, hoba chühashi, sangmeiei kho yuklepbei, hoba BUNYUBOU soneikangbü longkei.

⁴³Hobaje Mosa si Aron kamshang neichem thedang aeto loukei.

⁴⁴Hobaje BUNYUBOUei Mosa to laukei,

⁴⁵“Ngei haoen lepde mautila shanga shuong yo ka kukashi, hoba haoen the khüman apbei.”

⁴⁶Hobaje Mosaei Aron to laukei, “Kaibü wan phau sungjung louan lemshang ka khünei wan jinashi, hoba kho thüka jenjuokbü denan phokushi, hoba kho shuong yoto hali jungan haushi, hoba haoen shanga shabü debü kümsilei kümashi; aishanga BUNYUBOU ka khauang longan apa; limsilang khanga.”

⁴⁷Hobaje Mosaei laubü tegü Aronei jungkei hoba kamshaian kibü jenyu to laangjung atkei, hoba chühashi, müt yoa lim kho khangan kiteikei; hoba haoei jenjuokbü kho phokukei hoba mütshuong shanga shabü apbula haoei kho kümbei.

⁴⁸Hobaje hao haibü si langkeibü kanglanga lokei, hoba lim kho thakkei.

⁴⁹Tou limei haibü kho, Koraeibü kümsilei shanga haibü ayoko hajar 14,700 kikei.

⁵⁰Hobaje Aron kamshang neichem ka Mosa jungto sepeinyu ngaikei hoba lim kho thakkei.