Read Chang Naga WEJAKBÜ 17 Bible Online

WEJAKBÜ 17 - Chang Naga bible

WEJAKBÜ 17

¹Kheijinei BUNYUBOUei Mosa to laukei,

²“Israel shousi shuong to lenshi; hoba haoen chung weko ka julo che che sungbashi, haoen chung leiyeibü ka pendouei anthüknyi, mütpem wekoeibü juloa lulueibü nyen nyi doashi,

³hoba Levieibü juloa Aroneibü nyen nyi dojan; aishanga haoen chung leiyeibü weko julo che che kilabü.

⁴Hobaje kamshang neichem ainei ngo ka to haüyoda khünei Ngühkhüm Busen junga nyi khübü kho phokushi.

⁵Hobaje müt ao ngei pienlaje haoeibü juloa tonglabü, hoba Israelbü nyamnyambü laobou haoenei ka khulimbo nyamnyamda, kho ngei lolo thaktilabü.”

⁶Hibü Mosaei Israel shousi shuong to joyokei, hoba haoeneibü leiyeibü pendouei hao la julo kukei; haoen chung chung leiyeibü wekoei che che khei julo anthüknyi, hoba haoeneibü julo yoa Aroneibü julo kikei.

⁷Hobaje Mosaei Ngühkhüm Busen neichema BUNYUBOU junga julo shuong kho phokukei.

⁸Hobaje nyibounyet kho Mosa ngühkhüm Busen neichem to atkei, hoba chühashi, Aroneibü julo Levi chung shangabü tongan kikei, hoba tongbü kho pungkei, hoba almond hek sembü hekkei.

⁹Hobaje BUNYUBOU jungka Mosaei julo shuong kho Israel shousi shuong jungto jungan longkei, hoba haoenei chühko mütpem wekoei lulueibü julo sungkei.

¹⁰Hobaje BUNYUBOUei Mosa to laukei, “Ngühkhüm Busen junga Aroneibü julo kho khulimbü shanga tetsida lela sepeian phoashi; khei haoen ühaila shanga ngo khulimbo haoenei nyamnyambü nyi thontilabü.”

¹¹Kho tegü Mosaei BUNYUBOUei hao la sakkubü tegütham haoei kümbei.

¹²Hobaje Israel shousi shuongei Mosa to laukei, “Chüh- ashi, kün shemda, kün mauda, kün akisap.

¹³BUNYUBOUeibü lemshang nyangko loubü mütpem weko hailabü. Kün pendou hailep lo?”