Read Chang Naga WEJAKBÜ 18 Bible Online

WEJAKBÜ 18 - Chang Naga bible

WEJAKBÜ 18

¹BUNYUBOUei Aron to laukei, “Lemshanga shed shonbü shanga no hoba kaibü shousi shuongei kaibü chungkei yoan onat künlabü, hoba kaibü ungshed kümaleia shed shonbü shanga no hoba ka yoa kaibü shousi shuongei onat künlabü.

²Hobaje toukei kaibü jaisinasi shuong, Levibü shuong, kho kaibü bousi shuong chung haoen ka yolabü, no khangenlabü, nyi haoen ka jungto nyangko leian loushi; lausikei no hoba ka yoa kaibü shousi shuong ngühkhüm Busen neichem thedanga kijan.

³Haoenei no hoba neichem pendou thounoulabü; haoenkei kankei ühaila shanga haoen ong lemshanga peisilei hoba lembü kushang nyangko aloujan.

⁴Hobaje haoenei neichem kümsilei pendou shanga kamshang nei- chem chühlabü; hoba küksithang kan jungto nyangko telouti.

⁵Hobaje Israel shousi thük to touje khauang lotbü akila shanga kanei lemshang hoba lembü kushang chühlabü.

⁶Hobaje chühashi, ngo boushou, ngei kaibü jaisinasi Levibü Israel shousi yo ka piena; ka shanga haoen kho BUNYUBOU to kamshang neichem kümsilei kümla kubü jongsak ki.

⁷Hobaje no hoba kaibü shousi shuongei lembü kushanga ajanjan kümsilei hoba thangtet nei maang aenei ungshed kümsilei kümlabü, hoba khübü kho kanei chühlabü; ngei kan la ungshed kümsilei kho jongsak kümsilei tegü kubü ki; hoba küksithang ao nyangko loulaje haitilabü.”

⁸Kheijinei BUNYUBOUei Aron to laukei, “Chühashi, ka shangaje lembü thüka ikjai lela ngei ka la kuda; Israel saopobü jongsak pendou shanga ngei khübü kho kaibü phejan hoba kaibü shousi shuong la ponpen phejan yingla kuda.

⁹Wana ajuokko jouletbü saopoboutham peiseilei shuong kaibü yinglabü; haoeneibü lembü weko hoba haoeneibü shausiyung lembü weko, hoba haoeneibü shabü lembü weko laobou haoenei kü la kuda, ka shanga hoba kaibü shousi shuong shanga saopoboutham kilabü.

¹⁰Pendou to saopobou tegütham nyi kho shaulabü; bousu phaiei kho shaulabü; kho ka shanga saopobü kilabü.

¹¹“Hobaje kho ka shangabü lembü jongsak, khei Israel shousi jipbü lembü pendou; khübü kho ngei ka la, hoba kaibü shousi, hoba ka yoa kibü kaibü nou- yangnyu shuong la ponpen phejan kua; kaibü chung hinseitham kibü wekoei kho shaulabü.

¹²“Onang maiboutham pendou hoba ih hoba youshou maiboutham pendou shaangbü buhek laobou haoenei BUNYUBOU la kuda, kho ka la kua.

¹³Haoeneibü kaonyeka shaang libü buhek, laobou haoenei BUNYUBOU la sungbada, ka shangabü kilabü; kaibü chema hinseian kibü mütpem wekoei kho shaulabü.

¹⁴“Israelbüei khümbo meiko kubü saüenbü peisilei pendou ka shangabü.

¹⁵“Ajanjan pendou büngbü nasetshang ipbü BUNYUBOU la kubü meisiau pendou müt yingsikei meisiau yingasikei, ka shangabü. Khei yingasikei, shaangla bukbü müt nyi angngaijan hoba chebou sitbü asaopobü meisiau paang shuong nyi angngaijan.

¹⁶Hobaje angngaila kibü shuong kho lit che jailebü ka nyi khübü munam lemshanga kibü shekel tegütham nam shekel ngao nyi lolo lenenbüei angngaijan (kho gera saoche).

¹⁷Lausikei shaangla shatbü masu ayingsi shaangla shatbü sanlon, ayingsi lon nyi üangngaijan; haoen saopobü ki; haoeneibü sii nyi lemshanga lakkulabü, hoba BUNYUBOU shanga ponlem maibü shanga wanei lembü haoeneibü haabü juokjan.

¹⁸Lausikei haoeneibü phe kan shanga yingjan; jipbü senlang hoba maeae youshi kho ka shangabü kilabü.

¹⁹“Saopobü peisilei lembü pendou laobou Israel shousi shuongei BUNYUBOU to lemda kho ka la hoba kaibü shousi hoba ka yoa kibü nouyangnyu la ponpen phejan shanga ngei kua; Ho BUNYUBOU thedanga ponpen aleilulabü no hoba ka yoa kibü kaibü chempen shanga theyolanyobü ki.”

²⁰Hobaje BUNYUBOUei Aron to laukei, “Haoeneibü kaonyeka no ai phetphan akilabü, ayingsi haoen yoa no ai phejan akilabü; Israel shousi yoa kaibü phejan hoba kaibü phetphan ngo kia.”

²¹Hobaje BUNYUBOUei laukei, “Ngei Levi shousi shuong la khei kamshang neichema haoenei khangenbü kümsilei mu, Israelbüeibü an phejan pendou phet- phanla kua.

²²Hobaje tou ka jaüan Israel shousi shuongei haoenei shabü shonan ühaila shanga kamshang neichem nyangko aloujan.

²³Lausikei Levi shuongei kamshang neichem kümsilei kümlabü, hoba haoenei luluei shed shonbü künlabü, hoba haoen meten sünga kho ponpen shanga kho ngühkhüm kilabü, hoba Israel shousi shuong yoa haoen phetphan akilabü.

²⁴Aishanga Israel shousi shuongeibü an phejan laobou haoenei BUNYUBOU la lembü kuda, kho ngei Levibü shuong la phetphan shanga kua, hibü ngei haoen to lena, Israelbü yoa haoen phet- phan akilabü.”

²⁵BUNYUBOUei Mosa to laukei,

²⁶“Nyi Levibü shuong to lenshi, ladang kanei Israel shousi shuong ka ngei kan la kaneibü phetphan shanga haoen ka an phejan lelaje, kheijinei BUNYUBOU shanga an phejan ka an phejan lemla kujan.

²⁷Hobaje kan shanga lembü kho amshanga youshou kibü tegütham hoba semlühhek nitshang ka longbü semlühdei tegü weeilabü.

²⁸Kho tegü kanei Israel shousi shuong ka hapbü kaneibü an phejan pendou ka BUNYUBOU la tokei lembü kujan; hoba BUNYUBOUeibü lembü kho Aron ungshedbou la kanei kujan.

²⁹BUNYUBOU shanga lembü weko kanei jongsak pendou ka khübü maiboutham khei kho ka saopobü phejan kanei lemjan.

³⁰Hibü nyi haoen to laulabü, ‘Ladang kanei maiboutham lemlaje, kheijinei Levi shuong shanga amshang ka hapbü tegü, hoba semlüh nitshang ka hapbü tegü kho weeilabü.

³¹Hobaje kho kanei pendou aenei kan hoba kan chempenei shaulabü; aishanga kamshang neichema kaneibü kümsilei shanga hapmaibü kan shanga pailetbü ki.

³²Hobaje kho ka maiboutham kanei sungan phoan phaiaje kho danko kan aikei shabü akilabü; lausikei kan ühaila shanga kanei Israel shousi shuongeibü saopobü peisilei ashatikujan.’”