Read Chang Naga WEJAKBÜ 19 Bible Online

WEJAKBÜ 19 - Chang Naga bible

WEJAKBÜ 19

¹BUNYUBOUei Mosa si Aron to laukei,

²“Ho BUNYUBOUei sakkubü song ngühkhüm ki; Israel shousi shuongei kap anakbü hoba nali athebü, hoba ladangkei buleng jinan achühbü masu pi saklangbü che ka jungto sungba dogo lenshi;

³hoba kanei kho Eleazar ungshedbou la kulabü, hoba haoei shaishang khoongaeto kho leijung angan hao thedanga haitilabü;

⁴hoba Eleazar ungshedbouei khoeibü sii kho haoeibü ikjishoua sungbalabü, hoba kamshang neichem thedang aenei sii kho nyetnei laklabü;

⁵hoba hao thedanga müt cheei masu pi kho juoklabü.

⁶Kheijinei ungshedbouei cedar bu hoba hisop hoba nakthüngan sakbü peisilei sungan kho masu pi jikbü jenyu to jinkulabü.

⁷Kho phaia ungshedbouei haoeibü neisimei saklabü, hoba kho phaia hao shaishang neichem to atlabü, hoba ungshedbou kho chasem sühko asaopoko kilabü.

⁸Hobaje aoei kho jiklaje, haoei haoeibü neisimei saklabü, hoba hao mang yulabü, hoba chasem sühko asao- poko kilabü.

⁹Hobaje saüenan kibü müt cheei masu jikbü tap kho yoshaian shaishang khong- aenei sakteibü kaoena pholabü, hoba kho Israel shousi dan shanga asaopobü dei shanga pholabü; ho shabü lembü ki.

¹⁰Hobaje aoei masueibü tap kho yoshailaje jembü neisimei saklabü, hoba chasem sühko asaopoko kilabü, hoba kho Israel shousi shuong hoba küksithang haoen yoa kibü shanga ponpen shanga song kilabü.”

¹¹Aoei müt at haibümang to meitilaje chalou nyet sühko asaopoko kilabü.

¹²Chalou semnyet hoba nyetbounyet haoei jembü lolo dei khoei shabü ka saüenlabü; lausikei haoei sembounyet hoba nyetbounyet hao lolo asaüenlonga, hao ihinseilabü.

¹³Aoei ong haibümang, khei müt haibü manga meitilaje, hoba jembü lolo ahinseiko kilaje hoba BUNYUBOUeibü lemshang neichem shatida, kho müt Israel ka wapan aplabü; aieilausi hinseibü dei kho hao to alakkei, hao ihinseiko kilabü, hao asaopobü kho toukei hao to kia.

¹⁴Neichema haijinei ho ngühkhüm kia; neichem to atbü mütpem weko chalou nyet asao- poko kilabü.

¹⁵Hobaje ipan kibü chaksiam laoboua küpjin ayoko ki, asaopoko kilabü.

¹⁶Hobaje ao- youei tangakhonga haitian kibü to ayingsi haibümang to ayingsi müt ateibü lo to ayingsi heea meitilaje chalou nyet asaopoko kilabü.

¹⁷Hobaje asaopobü shanga haoenei shabü juokbü tap sunglabü hoba dei haanbü khünei chak chenei jinlabü.

¹⁸Hobaje hinseian kibü müt cheei hisop sungan kho deia shemlabü, hoba neichem thüka hoba chaksiam pendou thüka hoba khünei kibü müt to ayingsi haitian kibü to ayingsi haibü, ayingsi hee to meitibü la lakkulabü.

¹⁹Hobaje saüenbü müt khoei asaopobü khola sembounyet hoba nyetbounyet haoei hao saüenkulabü, hoba haoei haoeibü neisimei saklabü, hoba hao lolo mang yulabü, hoba chasem hao saüenan kilabü.

²⁰Lausikei müt ao asaopoko kilaje, hoba jembü lolo asaüenda kho mütshuong yo ka wapan aplabü, aieilausi haoei BUNYUBOUeibü lemshang shatia; hinseibü dei hao la alakkukei; hoba hao toukei ihinseikei.

²¹Hobaje haoen shanga kho ponpen song kilabü; hoba aoei asaopobü dei kho lakkulaje haoeibü neisimei sakjan; hoba aoei asaopobü dei to meitilaje, chasem sühko asaopoko kilabü;

²²hoba asaopobü mütei ai ong meitilaje asaopoko kilabü; hoba müt aoei khüto meitilaje chasem sühko asaopoko kilabü.