Read Chang Naga WEJAKBÜ 20 Bible Online

WEJAKBÜ 20 - Chang Naga bible

WEJAKBÜ 20

¹Kheijinei shaangbou lita Israelbü tan khümbo Zin yam sühkei, hoba mütshuong haoen lolo Kadesha kikei; hoba khünei Miriam haikei, hoba khünei khünkei.

²Hobaje shuong shanga khünei dei akitei; hoba haoen liko haoen lolo Mosa si Aron khulimbo takshatkei.

³Hobaje mütshuongei Mosa to tokyoko laukei, “BUNYUBOU thedanga küneibü jaisinasi haijinei künkei Mühghaüei haitian kiteikei yingma!

⁴Hobaje aila BUNYUBOUeibü tan, kün hoba meisiau haitila ho yam to kanei leian loukei?

⁵Kaonyek ho youshou, ayingsi bhuk, semlüh, chilang, ayingsi ai yunglabü dei akishang kaonyek haang alongbü hato leian loula aila Ijep ka kanei kün leian loukei?”

⁶Hobaje Mosa si Aron haosi hamei takshatan kibü shuong thedang ka kukan kamshang neichem koukhün to atan haosieibü the khümbei hoba BUNYUBOU soneikangbü haosi thükto longkei.

⁷Hobaje BUNYUBOUei Mosa to laukei,

⁸“Julo kho sungashi, hoba shuong kamtiashi, hoba kaibü jai Aron kasiei haoen thedanga kasiei laang to dei longtila joyoashi, hoba nyi haoen shanga laang ka dei longtilabü; kho tegü nyi shuong hoba haoeneibü meisiau la yunglabü kulabü.”

⁹Hobaje haoei sakkubü tegü Mosaei BUNYUBOU thedang ka julo sungkei.

¹⁰Mosa si Aronei laang thedanga shuong kamtikei, hoba haoei haoen to laukei, “Kan khulimbo lobü shuong; tou ditashi; küsiei ho laang ka dei longtikulabü.”

¹¹Hobaje Mosaei haoeibü ik shingan haoeibü juloei laang to nyinei ngümbei; hoba dei juongnyu longkei, hoba mütshuongei hoba haoeneibü meisiauei yungkei.

¹²Lausikei BUNYUBOUei Mosa si Aron to laukei, “Israel shousi thedanga kanei ngo saopotham phola kü to maangalemsije ngei haoen la kubü kaonyek to kasiei ho tan leian aloulabü.”

¹³Habü ho Meriba dei shuong ki; aieilausi Israel shousi shuongei BUNYUBOU to tokyokei, hoba haoei haoen lolo haoen yoa saüenkei.

¹⁴Mosaei Kadesh ka Edombü choba jungto ngühlang künbü hautikei; hoba laukei, “Hai kaibü jaisina Israelei lauda, kü to haüthükbü khonsak pendou nyi ngeakei;

¹⁵laobou küneibü pisibousi shuong Ijep to louyenkei, hoba kün Ijepa jih lounyu kikei, hoba Ijepbüei kün hoba küneibü pisibousi shuong to amaiko jungeikei;

¹⁶hoba ladang künei BUNYUBOU to ngekkei, haoei küneibü ngühlang ditkei hoba Ijep ka kün leiyenkei, hoba chühashi, kaibü leilang thonbüa kibü Kadesh sangnyua kün kia.

¹⁷Ngei ka to sudajada, kaibü kaonyek danko kün dantikaima; kün sek danko, ayingsi semlühlaak danko ohaulabü, ayingsi deikhün ka künei dei ayunglabü, kün chobaeibü khongtang lam ae to haulabü, künei kaibü leilang adankhüm shongko maeae ayingsi nanaeto asepeilabü.”

¹⁸Lausikei Edombüei hao to laukei, “Kakhu limbo ngo in yoan longakei, no ngo danko adanlabü.”

¹⁹Hobaje Israel shousi shuongei hao to laukei, “Kün kaoyaülam to anglabü; hoba künei kaibü dei, ngo hoba ngeibü samkeisamuk shuongei yungalonga munam kulabü. Kü to khei ai amaibü akümbo ngeibü youei dantikaima.”

²⁰Lausikei haoei laukei, “No adanlabü.” Hobaje Edombüei hao khulimbo müt juong yoan hoba sekbülakbü dan yoa longkei.

²¹Kho tegü Edombüei haoeibü leilang aiko Israelbü la lam aku; khünei Israelbü hao ka sepeinyu ngaikei.

²²Israelbü mütshang pendou Kadesh ka meimeijung haukei. Hobaje Israel shousi shuong khei tan pendou, Hor shongh to loukei.

²³Hobaje Hor shongha Edom kaodak leilang nyangko BUNYUBOUei Mosa si Aron to laukei,

²⁴“Aron jembü mütshuong yoa yolabü, aishanga ngei Israel shousi shuong la kubü kaonyek to hao aloulabü; aieilausi Meriba dei shanga kasiei ngeibü ngüh khulimbo lokei.”

²⁵Aron hoba haoeibü shou Eleazarei leian Hor shongh sühkei,

²⁶hoba Aronei haoeibü neisimei hangletashi hoba haoeibü shou Eleazar la khübü kho yukkuashi; hoba Aron haoeibü mütshuong yoa yolabü, hoba khünei hailabü.

²⁷Hobaje BUNYUBOUei sakkubü tegü Mosaei kümbei, hoba shuong pendouei hapbo haoen shongh to angkei.

²⁸Hobaje Mosaei Aroneibü neisimei kekletan hao shou Eleazar la lekukei, hoba khünei shongh khua Aron haikei; hoba Mosa si Eleazar haosi ham shongh ka louyenkei.

²⁹Hobaje ladang shuong pendouei Aron haibü hapbei, Aron shanga haoenei chalou khujin khei Israel chung pendou haapbei.