Read Chang Naga WEJAKBÜ 21 Bible Online

WEJAKBÜ 21 - Chang Naga bible

WEJAKBÜ 21

¹Ladang yungküka kibü Aradbü choba Israelbü shuong Atharimbüeibü lam to louda dogo laubü ditkei, hoba haoei Israelbü khulimbo wapyokei, hoba at lapbei,

²kheijinei Israelbüei BUNYUBOU to theletbü che theletko laukei, “Nyi tükde habü mütshuong ngeibü ikto khümbo kualonga, kheijinei ngei haoeneibü sangnyu shuong lemailela shemtikulabü.”

³BUNYUBOUei Israelbü to ngüha lekukei, hoba Kananbü khümbo kukei; hoba haoenei lemailela haoen hoba haoeneibü sangnyu shuong shemtikei; hoba ho kaonyek to Horma dogo laukei.

⁴Kheijinei haoen Hor shongh ka Saklangbü Yungnyu aeto Edom kaiko haukei; lausikei mütshuongei lama anatenko apbei.

⁵Hobaje mütshuongei Mühghaü si Mosa khulimbo ngüh angko laukei, “Aila kanei kün yama haitilabü lele Ijep ka leian loukei? aieilausi shausiyung aki, deikei aki; hoba ho lejim akibü wentekei kün oda.”

⁶Kheijinei BUNYUBOUei hatlamoklabü pinyu mütshuong yoto hautikei, hoba khübü khoei müt to püpbei, hoba Israelbü juong haikei.

⁷Hobaje mütshuong Mosa jungto louan laukei, “Künei shabü shona, aishanga künei BUNYUBOU hoba kakhu limbo laua;” hoba Mosaei mütshuong shanga welaukukei.

⁸BUNYUBOUei Mosa to laukei: Chisak namei sekbülakbü pinyu che kümashi, hoba kho phodonga lonan phoashi, hoba kho phaia ao to ong püpbei haoei chühsi lang kilabü.

⁹Hibü Mosaei chisak namei pinyu che kümbei, hoba kho phodonga lonan phokei, hoba pinyuei müt atto püpsi haoei chisak nam pinyu khüto chühjinei hao lang kikei.

¹⁰Hobaje Israelbü shuong meimeijung haukei, hoba Obota otkei.

¹¹Hobaje haoen Obot ka meimeijung hauan Iye Abarima Moab thedanga kibü yama chaangbou aenei shaikei,

¹²kho ka haoen meimeijung haukei hoba Zered pholia shaikei.

¹³Kho ka haoen meimeijung haukei, hoba Amorbü leilang ka longjinei yama Arnon napheinei shaikei, (aishanga Arnon kho Moab si Amor kanglanga leilang ki.)

¹⁴Kho khei yingbüei BUNYUBOUeibü wapyobü lea hai lauda, “Waheb, Sufa, hoba Arnon pholi shuong.

¹⁵Hobaje pholi anglek Ar kibü aenei yeian hoba Moab leilang thüka nongan.”

¹⁶Khüka haoen Beeri to meimeikei; ho BUNYUBOUei Mosa to, “Mütshuong liko yoshaitiashi, hoba ngei haoen la dei kulabü dogo laubü deikhün kho ki.”

¹⁷Kheijinei Israelbüei ho chia laukei: “Ongjung longashi, O deikhün, kanei ho shangabü chia atkushi;

¹⁸Sonenbü shuongei thubü deikhün, Yaangenbü choba shousi shuongei thuatlangbü; Chobaeibü ju hoba juloei.” Hobaje yamlamang ka haoen Mahana to haukei;

¹⁹hoba Ma- hana ka Nahaliel hoba Nahaliel ka Bamoth;

²⁰hoba Bamoth ka Moab kaonyeka kibü pholi to loukei, laobou Pisga khuaenei nyangko phetsen kaodak to chühan yantida.

²¹Kheijinei Israelbüei Amorbü Choba jungto ngühlang künbü hautiko laukei,

²²“Kaibü kaonyek danko ngo hautikai; künei sek aeto, ayingsi semlühlaak aeto asepeilabü, künei deikhün ka dei ayunglabü, kaibü leikhüm adanshongko kün Chobaeibü khongnyu lama haulabü.”

²³Lausikei Sihon chobaei haoeibü leikhüm danko Israelbü haula asakku; hoba tokei hao mütshuong pendou leishaikei, hoba Israelbü khulimbo yamlamang to haukei, hoba Jahaz to loukei, hoba Israelbü khulimbo wapyokei.

²⁴Lausikei Israelbüei haoeneibü in maeei haoen thükkei hoba haoeneibü kaonyek Arnon ka Jabok sühko, khei Amonbü sühko lekei, aishanga Amonbü la ba leilang aeibou kaangan kikei.

²⁵Hobaje Israelbüei khübü sangnyu pendou lekei, hoba Amonbü sangnyu pendoua Heshbona hoba khübü sang pendoua Israelbü kikei.

²⁶Aishanga Heshbon kho Amorbü choba Sihon sangnyu kikei, aoei shaangbü Moab Choba khulimbo wapyokei hoba hao ka kaonyek pendou Arnon sühko sokei.

²⁷Khei yingbüei ong Tetenbü ngühei hai lauda: “Kan Heshbon to kaiya! kho kümetngaitiashi; hoba longeitiashi.

²⁸Aishanga Heshbon ka wan, Sihon sangnyu ka wanlong longa, Khoei Moaba Ar hoba Arnon shongha bunyubou shuong suia.

²⁹O Moab, ka shanga ügütü! Kan akisap, Khemoshbü mütshuong; haoei haoeibü shousi shuong lintibü la yeitiko Amorbü choba Sihon ikto kukei.

³⁰Hibü haoeneibü shousi shuong Heshbon ka Dibon sühko mautikei; Medeba nyangko Nashim ka Nofa sühko wan sapbua.”

³¹Hibü Israelbü Amorbü kaonyeka kikei.

³²Hobaje Mosaei Jazer pheian chühla hautikei; hoba haoenei khübü sangnyu shuong komlepbei; hoba khünei kibü Amorbü shian sattikei.

³³Hobaje haoen sepeikei hoba Bashan ae lamnyu to sepeian angkei; hoba Bashanbü choba Ogei haoen khulimbo hao hoba haoeibü mütshuong pendou Edreia wapyola longkei.

³⁴Hobaje BUNYUBOUei Mosa to laukei, “Hao to tehüt, aishanga ngei hao hoba haoeibü mütshuong pendou hoba haoeibü kaonyek ka la khümbo kua; hoba nyi Heshbona kibü Amorbü choba Sihon to kümbü tegü hao to kümashi.”

³⁵Hibü haoenei hao la aikei aphoku shongko hao hoba haoeibü shousi shuong hoba haoeibü mütshuong haitikei.