Read Chang Naga WEJAKBÜ 22 Bible Online

WEJAKBÜ 22 - Chang Naga bible

WEJAKBÜ 22

¹Kheijinei Israelbü shuong meimeijung haukei, hoba Jordan yungko thena Moab pholi Jerikhoa shaikei.

²Tou Ziporeibü shou Balakei Amorbü to Israelbüei kümbü pendou hapbei.

³Hobaje Moabüei mütshuong to aeibou hatko kikei; aieilausi haoen juong kikei, hoba Moabei Israel shousi shuong hapan hatjihatko kikei.

⁴Hobaje Moabei Midianbü jaishou shuong to laukei, “Masu pongsuei khongthua sang jepbü tegü ho tan hoei sen kaijembo pendou sean künlabü, hoba kho chaloua Zipor shou Balak Moaba Choba kikei.”

⁵Hobaje Eufrates Shumang nyangko Pethora Beoreibü shou Balaam jungto ngühlang künbü haoen mütshuong hautiko laukei, “Chüh- ashi, Ijep ka longbü mütshuong hanei kia; chühashi, haoen kaothe shenko hoba ngeibü thea khulimbo kia.

⁶Hibü tou kaiya, hoba habü mütshuong to kü shanga khükku uokkuashi; kü shanga haoen juongsapbei; aingean ngei haoen thüklabü hoba kaonyek ka haoen shian apenlabü yingkei; aieilausi ngei ngekei nyi ao haükulaje haoei haüda, hoba nyi ao to khükdauokda hao shedsikhau bauda.”

⁷Hobaje Moab si Midianbü jaishou shuong haoenei seibü yaübü mu jungan meimeikei, hoba Balaam jungto louan haoenei Balakeibü ngühlang lenkei.

⁸Hobaje haoei haoen to laukei, “Tao hanei otshi, BUNYUBOUei kü to joyobü tegü ngei kan jungto ngühlang sungbakulabü.” Hobaje Moabbü jaishou shuong Balaam yoa sühkei.

⁹Kheijinei Balaam jungto Mühghaü louan laukei, “Ka yoa kibü kho aoyou?”

¹⁰Balaamei Mühghaü to laukei, “Moabbü Choba Zipporeibü shou Balakei kü jungto hai lauko ngühlang künan hautikei,

¹¹‘Chüh- ashi, Ijep ka loubü mütshuong hanei kao the shenko kia, tou kaiya, hoba kü shanga haoen to khükku uokkushi; aingean ngo haoen to wapyoan thükan shian sattienlep yingkei.’ ”

¹²Hobaje Mühghaüei Balaam to laukei, “No haoen yoa ohaujan, nyi mütshuong to akhük auokjan; aieilausi haoen haükuakei.”

¹³Hibü nyibounyet ngeyang Balaam pienan Balakeibü jaishou shuong to laukei, “Kan lulu kishang to ngaiashi; aieilausi ngo shiletda.”

¹⁴Hibü Moabbü jaishou shuong sepeinyu ngaian Balak to laukei, “Balaam kün yoa tohaukho dogo lauda.”

¹⁵Kheijinei Balakei haoen to juongbou hoba nyenshen mütshuong nyibou hautikei,

¹⁶hoba Balaam jungto louan haoenei hao to laukei, “Zippor shou Balakei hai lauda, ‘Sanoudambo no kü jungto loula aieikei tethangetti.

¹⁷Aishanga ngei no nyenhaang yaangei pailettilabü, hoba nyi lauda, kho ngei kümlabü. Hibü ngei ka to sudajada, habü mütshuong to kü shanga khükku uokkushima.’ ”

¹⁸Lausikei Balaamei jongaiko Balakeibü khangenbü shuong to laukei, “Balakei haoeibü Choba chem chandinam hoba honei shenko kü la kua tegükei, BUNYUBOU ngeibü Mühghaüeibü ngüh to limbo ayingsi ngei aonko ai kümla athük.

¹⁹Hibü tou BUNYUBOUei toukei kü la ai lenlaje kho ngela shanga tao kan hanei otngaiashi dogo ngei kan to sudajada.”

²⁰Khüyou Mühghaü Balaam jungto louan laukei, “No ngala khübü mütshuong loualonga, haoen yoa meimeijung hauashi, lausikei ai ngüh ngei ka to joyolaje, kho ong nyi lenjan.”

²¹Hobaje ngeyang Balaam pikei, hoba haoeibü gadua setan Moabbü jaishou shuong yoa haukei.

²²Hao haubü hangshong Mühghaü khauangkei, hoba hao haoeibü gadua setan haoeibü sambü müt nyiei hangan haujinei BUNYUBOUeibü hangangbü haoeibü lama hao khulimbo lokei.

²³Hobaje gadu khoei BUNYUBOUeibü khuthük hangangbü kho haoeibü ika in jungan lama hapjinei gaduei lam ka sepeikei, hoba yam to atkei, lausikei Balaamei gadu to lam to sepeitila ngümbei.

²⁴Kheijinei BUNYUBOUeibü khuthük hangangbü semlühlaak kanglanga jijihama ba kibüa lokei;

²⁵hoba gaduei BUNYUBOUeibü khuthük hangangbü hapjinei haoei hao lolo kümthang to uyolangkei, hoba Balaameibü you kümthanga kipan nitjinei haoei nyibou gadu to ngümbei.

²⁶Kheijinei BUNYUBOUeibü hangangbü longche haukei hoba nanae maeae sepeila akishanga nyunyembü kaoen chenei lokei;

²⁷hoba gaduei BUNYUBOUeibü hangangbü hapjinei haoei Balaameibü you phanga leketnyu yepbukei, hibü khoei Balaam khauangkei, hoba haoeibü juei gadu to sembei.

²⁸Kheijinei BUNYUBOUei gadueibü sembung ipbukei hoba saoei Balaam to laukei, “Nyi kü to hoei sembou sühko ngümlabü lele ngei ka to ai kümbei?”

²⁹Balaamei gadu to laukei, “Aieilausi nyi ngo louyola lekei, ngeibü ika in kikei tegüje ngei no haitian kikhoulabü.”

³⁰Gaduei Balaam to jongaikei, “Kaibü langkei sünga tat sühko no setbü kaibü gadu ngo aying lo? Ngei ho tegü ka to jungeian chühlao?” Haoei jongaikei, “Ajungei.”

³¹Kheijinei BUNYUBOUei Balaameibü nyek ipbukei, hoba BUNYUBOU khuthük hangangbü in jungan lama loan hapbei; khünei haoei haoeibü khu khüpjung yanan hao thedanga khüpetkei.

³²“Aila nyi kaibü gadu to semnei ngümbei,” dogo BUNYUBOU hangangbüei hao to laukei. “Chü- hashi, no thangetla loubou kho ngo kikei; aishanga kaibü lam kü thedanga maangto shatlabü kia;

³³hoba gaduei ngo hapbei, hoba semnei sühko kü jungka sepeikei, haoei kü jungka asepei tegüje ngei no tou haidangaje haitian kikhoulabü, lausikei gaduje lang kikhoulabü.”

³⁴Kheijinei Balaamei BUNYUBOU hangangbü to laukei, “Ngei shabü shona. Aishanga no ngo khulimbo lama loan kiteikei dogo ngei ange. Ngo ohaujan yingalonga haka sepeinyu ngaikho.”

³⁵Lausikei BUNYUBOU hangangbüei Balaam to laukei, “Mütshuong yoa hauashi, lausikei ngei ai laulaje kho ong nyi laujan.” Hibü Balaam Balakeibü jaishou shuong yoa haukei.

³⁶Ladang Balakei Balaam louada dogo ditkei Moab sangnyu sühko shuokla haukei, kho leilang thonbü Arnon leilanga kia.

³⁷“Ngei no ngala panteiko ohauti lo?” dogo Balakei Balaam to laukei. “Aila no kü jungto alou? Maimaitham ngei no yaangentila athüksi?”

³⁸Khünei Balaamei Balak to jongaikei, “Chühashi, ngo ka jungto louakeinai lo? Tou kü to denche ongkei hau kia si? Mühghaüei kü la sembunga jinkubü ngüh ong ngei laula thükkei.”

³⁹Kheijinei Balaam Balak yoa haukei, hoba haoen Kiriat Huzot to loukei.

⁴⁰Hobaje Balakei masu pongsu si sanlon haitikei, hoba at Balaam hoba hao yoa kibü jaishou shuong jungto hautikukei.

⁴¹Hobaje nyibounyet Balakei Bamoth Baal laobou ka nyangbou hapla thükla khüto hao leian angkei.