Read Chang Naga WEJAKBÜ 23 Bible Online

WEJAKBÜ 23 - Chang Naga bible

WEJAKBÜ 23

¹Kheijinei Balaamei laukei, “Hanei kü la lemshang che kümbü, hoba hanei kü la masu pongsu nyet hoba sanlon paang nyet lamlebu.”

²Kheijinei Balaamei laubü tegü Balakei kümbei; hoba Balak si Balaamei lemshang wekoa masu pongsu che che hoba sanlon paang che che lembei.

³Kheijinei Balaamei Balak to laukei, “Kaibü lembü nyangko loan kiteishi; ngo kukkho, aingenyu kü to haüyola BUNYUBOU loulep yinglabü; ai ong haoei kü la tang khittikulaje, ngei ka la lenlabü.” Hobaje hao shongh khu suokbü che to angkei.

⁴Hobaje Mühghaü hao to haüyokei hoba Balaamei laukei, “Ngei lemshang nyet kho lamlea, hoba lemshang wekoa masu pongsu che che hoba sanlon paang che cheei lema.”

⁵Kheijinei BUNYUBOUei Balaameibü sembunga ngüh che jinkukei hoba laukei, “Balak jungto sepeiashi hoba kho tegü nyi joyojan.”

⁶Hibü hao hao jungto sepeinyu ngaikei, hoba Moabbü jaishou shuong pendou yoa liko hao juokbü lembü nyangko hao loan hapbei.

⁷Hobaje haoei haoeibü ngühphatbü sungbaan laukei, “Balakei ngo Aram ka leian loukei, Chaang aephei ka Moabbü chobaei, ‘Kaiya, kü shanga Jakob to khükku uokkuashi, hoba kaiya Israel khulimbo huiletkuashi.’

⁸Mühghaüei akhükuokbü ngei lai khüklauokla? Hobaje Mühghaüei ahuiletbü ngei lai huiletla?

⁹Aishanga laangshong thüka ngei hao hapda, hoba shongh ka ngei hao to chühda; Lo, ho boushou kibü phang che ki. Hobaje phang yoa pakan ajinlabü.

¹⁰Aoei Jakobeibü thamngu wela thükla, ayingsi phejan leia che weenla? Ngühmaanglanbü shuong haibü tegü ngo haitishi. Ngeibü thonbü haoen tegü kitishi.”

¹¹Kheijinei Balakei Balaam to laukei, “Nyi kü to lai jungeikei?, hoba chühashi nyi haoen ong haükua!”

¹²Hobaje haoei jongaikei, “BUNYUBOUei ngeibü sembunga ai jinkukei kho ngei alaulep si?”

¹³Kheijinei Balakei hao to laukei, “Haoen pendou ayingsikei, ka junga nyangko kibü shuong ongkei nyi haoen hapenlabü lele sanoudambo no kü yoa kaoen che to kai; khüka kü shanga haoen to khükku uokkushi.”

¹⁴Hibü haoei hao Zofim khongthu to leian, Pisga shongh khu to angkei, lan haoei lemshang nyet kümbei hoba lemshang wekoa masu pongsu che che hoba sanlon paang che che lemla kukei.

¹⁵“Thinei ngo BUNYUBOU to haüyola haujinei kaibü juokbü lembü nyangko no hanei kishi,” dogo haoei Balak to laukei.

¹⁶Kheijinei BUNYUBOU Balaam to haüyola loukei hoba haoeibü sembunga ngüh che jinkuko laukei: Balak jungto sepeiashi, hoba nyi hao to hai laulabü.

¹⁷Hibü hao jungto hao sepeinyu longeikei, hoba Moabbü jaishou shuong yoa liko hao juokbü lembü nyangko loan hapbei. BUNYUBOUei ai laukei? dogo Balakei hao ka phekei.

¹⁸Kheijinei haoei haoeibü thusei ngüh lenkei. “Kaiya, Balak hoba ditashi, Zipor shou, kü to nou haangashi.

¹⁹Mühghaü kho jembü ngüh leilulabü lele müt tegü aying. Haoei lauan, kho haoei akümlep lo? Ayingsi haoei joyoan kho haoei ühaüthüklep lo?

²⁰Chühashi, haükulabü shanga ngei sakkubü sungletakei, hoba haoei haükua, Ngei kho jeila athük.

²¹Jakob to shedbü achühen, ayingsi khonsak aikei Israel to ühüplabü; BUNYUBOU haoeibü Mühghaü hao yoa kia. Hobaje chobaei ngekbü haoen yoa kia.

²²Mühghaüei haoen Ijep ka leiyenkei, Hao to mühghaü ngoueibü laang yemakei.

²³Aishanga Jakob khulimbo khüksiuok ngüh aki; hoba Israel khulimbo tetenbü ngüh aki, Mühghaüei latetche kümbei dogo ong Jakob si Israel shanga laulabü.

²⁴Chühashi, molosaonyu pi laksepbü tegü, müt tan che kia. Khei molosaonyu tegü jembü lolo pida. Haitilabü meisiau asui shongko, hoba haitibü sii ayung shongko ladangkei lengan akida.”

²⁵Kheijinei Balakei Balaam to laukei, “Kholongaje haoen to aikei tekhüktuok hoba haükei tehaüku.”

²⁶Lausikei Balaamei Balak to jongaiko laukei, “BUNYUBOUei ai ong lenlaje ngei kho kümlabü dogo ngei ka to alen lo?”

²⁷Kheijinei Balakei Balaam to laukei, “Kaiya, ngei no kaoen che to leian haukho; aingenyu khükaje nyi kü shanga haoen to khüklauokla muko haplep yingkei.”

²⁸Hibü Balakei Balaam Peor shongh khu laobou ka phetsen kaodak to chühan yantida, khüto leian haukei.

²⁹Hobaje Balaamei Balak to laukei, “Kü shanga lemshang nyet hanei kümbuashi, hoba kü shanga masu pongsu nyet hoba sanlon paang nyetei lemashi.”

³⁰Balaamei lenbü tegü Balakei kümbei, haoei lemshang wekoa masu pongsu che che hoba sanlon paang che cheei lembei.