Read Chang Naga WEJAKBÜ 24 Bible Online

WEJAKBÜ 24 - Chang Naga bible

WEJAKBÜ 24

¹Ladang BUNYUBOUei Israel haükula olinda dogo Balaamei chühenkei, lubü jihsi- phaia tegütham haoei tetenbü ngüh lamla ohau, lausikei haoei haoeibü thenyek yam aeto se- peikei,

²hoba Balaamei haoeibü nyekei chühan angtikei hoba Israel chung shuong shaibü hapbei; hoba Mühghaü soushou hao jungto loukei,

³hoba haoei khübü ngühphatbü sungbaan laukei, “Beoreibü shou Balaamei lauda: Hobaje nyek longan kibü mütei lauda;

⁴Mühghaüeibü ngüh aoei ditda haoei lauda, aoei pendou thükenbou mangsang hapda, khüpetda lausikei nyek longda;

⁵O Jakob, kaibü neichem lai maikei, O Israel, no kishang lai maikei,

⁶Yosiyang nyünglo nyüngan kibü phatko, shumang nyangko kibü bamang phatko, BUNYUBOUei kebü phoulo bu phatko shumang nyangko cedar bunyu kibü phatko,

⁷haoeibü meisok ka dei koulabü. Haoeneibü jemdei juong kilabü. Haoeneibü Choba Agag tokei thükkabou yeilabü. Hobaje haoeneibü songle tonenlabü.

⁸Mühghaüei haoen Ijep ka leiyenan haoen la mühghaü ngoueibü laang tegü kia. Haoeneibü dangbou phangshuong haoenei suilabü. Hobaje haoeneibü lo netla yeitikulabü. Hobaje haoeneibü laujinei paiko kiplabü.

⁹Hao khüpetkei, hao molosaonyu tegü yepbei, hoba molosaonyu pi phatko; aoei hao phonla, aoei kan haükuda, haoen pendou haübou yingshi. Aoei kan to khükdauokda haoen pendou khüksiuok yingshi.”

¹⁰Kheijinei Balakei Balaam to maangpokkei hoba haoei ik ipbo laukei, “Ngeibü dangbou to khüklauokla ngei no ngakei, hoba nyi shangashatko semnei haoen haükua.

¹¹Hibü no tou kaibü chem to hali ngaiashi; ngei no nyen- hang yaangei tonenla dambei, lausikei chühashi, BUNYUBOUei no nyenhang ka senetan phokei.”

¹²Hobaje Balaamei Balak to laukei, “Nyi kü jungto ngühlang künan hautibou to ngei ho hai alau lo?

¹³Balakei tou haoeibü chem chandinamei shenko kuasikei BUNYUBOUei maibü ayingsi amaibü kümla sakkubü to liman ngei ngo lolo leilula athük, BUNYUBOUei ai lenda kho ong ngei lenla thükkei.”

¹⁴Tou chühashi, ngo ngeibü mütli jungto ngaida; kaiya, loulabü chaloua habü mütshuongei kaibü mütli to ai kümla kho ngei ka la lenkho.

¹⁵Hobaje haoei haoeibü ngühphatbü sungjung louan laukei, “Beoreibü shou Balaamei lauda:

¹⁶Mühghaü ngüh aoei ditda haoei lauda, Aoei pendou Thükenbou mangsang hapda, khüpetda lausikei nyek longda.

¹⁷Ngei hao to chühda lausikei nyangbüa aying; Jakob ka khanshoulitshou che longlabü, hoba Israel ka Chobaeibü julo che longlabü; hoba Moab kaodak sühko jangnyinkulabü; hoba Seth shousi pendou shemtikulabü.

¹⁸Hobaje Israelei hau kiko kümjinei Edom lean aplabü. Tokei haoeibü dangbou kibü Seir lean aplabü.

¹⁹Hobaje Jakob ka choba sangle longlabü, hoba sangnyu ka joubü mautilabü.”

²⁰Hobaje haoei Amalekbü to chühkei, hoba ngühphatbü sungbaan laukei, “Phang yoa shaangbou kho Amalekbü kikei, Lausikei thonla hao mautikulabü.”

²¹Hobaje haoei Kenbü to chühan, haoeibü ngühphatbü sungbaan laukei: “No kishang kaangko sekkotham kia, kaibü hap laanga kümakei.

²²Khei yingasikei Ken lemailela mautilabü, lalokche Ashurei no thüngbou la yeitila?”

²³Kho phaia haoei haoeibü ngühphatbü sungbaan laukei: “ügütü, Mühghaüei hai kümjinei ao lang kila?

²⁴Lausikei Kittim ka long shuong loulabü, hoba khübü khoei Ashur khonsaktilabü, hoba Eber khonsaktilabü, hoba haokei maubüei sühlabü.”

²⁵Kheijinei Balaam meimeijung hao kishang to ngaikei, hoba Balakkei haoeibü lam to haukei.