Read Chang Naga WEJAKBÜ 25 Bible Online

WEJAKBÜ 25 - Chang Naga bible

WEJAKBÜ 25

¹Ladang Israelbü shuong Shittima kikei, kheijinei mütshuongei Moabbü yaksa to pejapelala khangkei.

²Aishanga haoenei mütshuong kho haoenei lembüsabü haitishang to ngakei, hoba mütshuongei lembüsabü phe shaukei, hoba haoeneibü mühghaü thedanga khüpetkei.

³Hobaje Israelbüei Peora Baal to jaman apbei; hibü Israel khulimbo BUNYUBOU khauangkei.

⁴Hobaje BUNYUBOUei Mosa to laukei, “Mütli leiyeibü shuong pendou leishaian Israel ka BUNYUBOU khauang maangpok yaangbü lotbü sepeinyu ngaila shanga haoen BUNYUBOU shanga chaloua phenetnyu haitiashi.”

⁵Hobaje Mosaei Israelbü matjembü shuong to laukei, “Aoyou Peorbü Baal to homan ki, khübü müt weko kanei haitiashi.”

⁶Hobaje chühashi, haoen kamshang neichem koukhüna haoen haapbo kijinei, Israelbü shousi yoa cheei jembü jaisinasi shuong jungto Midianbü yaksa che leian loukei.

⁷Hobaje ladang Aron ungshedboueibü shi Eleazareibü shou Finehasei kho hapbei, hao shuong ka longkei hoba haoeibü ika aubu che jungkei;

⁸hoba Israelbü kho phaito popchem to semjung atkei, hoba Israelbou si yaksanyu kho shimung paiko haosi ham kho suettikei. Kho tegü Israel shousi ka lim kho thakkei.

⁹Kheinyu yingsikei limei haibü shuong kho hajar saoto lei kikei.

¹⁰BUNYUBOUei Mosa to laukei,

¹¹Aron ungshedboueibü shi Eleazareibü shou Finehasei ngei khambü tegü haoen yoa maangshatei Israelbü thonan üpti.

¹²Hibü ho lenashi, chühashi, ngei hao la ngeibü sangmai theyolanyobü kuda,

¹³kho hao shanga hoba hao ka pakbü shuong shanga ponpen ungshed kümsilei shanga theyolanyobü kilabü; aieilausi haoei haoeibü Mühghaü shanga dühko kikei, hoba Israel shousi shuong shanga shabü ngean apla kümbei.

¹⁴Tou haitibou Israelbü ao Midian sao yoa haitikei, haoeibü nyen Simeon chung leiyeibou Salueibü shou Zimri kikei.

¹⁵Hobaje haitibü Midian saoeibü nyen kho Zureibü nouyangnyu Kozbi kikei; Zur kho Midiana haoeneibü chunga leiyeibou che kikei.

¹⁶BUNYUBOUei Mosa to laukei,

¹⁷“Midianbü to wapyo khangashi, hoba haoen shiashi;

¹⁸aishanga Peorbü laüa Midianbü leiyeibou cheeibü nouyangnyu Kozbi laüa hoba ao Peor haangjung lima haitikei.”