Read Chang Naga WEJAKBÜ 27 Bible Online

WEJAKBÜ 27 - Chang Naga bible

WEJAKBÜ 27

¹Kheijinei Josefeibü shou Manasse chung ka Manasseeibü shou Makir hoba haoeibü shou Gileadeibü shou Hefereibü shou Zelofehadeibü yaksa shousi shuong thedang to loukei, hoba habü ho haoeibü yaksa shousi shuong ki: Mahla, Noa, Hogla, Milka hoba Tirza.

²Hobaje haoenei Mosa thedanga hoba Eleazar ungshedbou thedanga hoba leiyeibü shuong thedanga hoba noknyüh pendou thedanga kamshang neichem koukhüna loan laukei,

³“Küneibü bou yama haikei, hoba BUNYUBOU khulimbo haoen lolo takshatan shuong yoa Koraeibü tan yoa ayo; lausikei hao haoeibü shabüa haikei, hoba haoei bousushou akitei.

⁴Haoei bousushou akisikei, aila haoeibü chempen yoka aboueibü nyen apbukei? Aboueibü jaisina yoa kün la phet labü.”

⁵Mosaei haoeneibü mat BUNYUBOU thedangto sungbakei,

⁶hoba BUNYUBOUei Mosa to laukei,

⁷“Zelofehadeibü yaksa shousi shuongei laubü kho tükde lauda, maimaitham nyi haoeneibü boueibü chempen yoa phet kho kujan; hoba nyi haoeneibü boueibü phet haoen jungto hautikushi.

⁸Hobaje nyi Israel shousi shuong to lenashi, ‘Müt che bousushou akiko haisi kheijinei kanei haoeibü phet kho haoeibü nouyangnyu jungto hautikushi.

⁹Hobaje haoeibü nouyangnyu akisikei haoeibü phet haoeibü jailanala kanei kujan.

¹⁰Hobaje jaisina akilonga, kheijinei kanei haoboueibü jaisina la haoeibü phet kuashi.

¹¹Hobaje haoboueibü jaisina akilonga kheijinei kanei haoeibü chempen thenboulenbou nyangbou la haoeibü phet kujan, hoba haoei kho lelabü. Hobaje BUNYUBOUei Mosa la sakkubü tegü ho Israel shousi shuong shanga ponpen jungeibü ngühkhüm kilabü.’ ”

¹²Kheijinei BUNYUBOUei Mosa to laukei, “No Abarim shongh to kaiyang hoba ngei Israelbü la kubü kaonyek chühashi.

¹³Hobaje ladang nyi kho haplaje, nokei kaibü jai Aron tegü jembü himshuong yoa yolabü;

¹⁴aieilausi deia haoen thedanga kü la hanglenlabü shangabüa Zin yamlamanga shuongei khulimbo meimeijinei kanei ngeibü ngühkhüm laangdak khuliman apbei.” (Khübü kho Zin yamlamanga Kadesh si Meriba dei shuong ki.)

¹⁵Hobaje Mosaei BUNYUBOU to laukei,

¹⁶“BUNYUBOU khunak shousi pendoueibü soushou Mühghaü, shuong thüka müt che pienkushima.

¹⁷BUNYUBOUeibü tan sanlombü akibü tegü ayingla shanga hao haoen thea haula hoba loula, hoba haoei haoen leian haulabü hoba leian loulabü.”

¹⁸Hobaje BUNYUBOUei Mosa to laukei, “Naneibü shou Joshua aoto soushou ki, nyi hao leashi hoba kaibü ikei hao to shanget- ashi;

¹⁹hoba Eleazar ungshedbü thedanga hao lotiashi; hoba haoenei hapbo hao la khümbo kuashi.

²⁰Hobaje Israel shousi tan pendouei ngüha lelabü lele nyi kaibü hau hao thüka phokushi.

²¹Hobaje hao Eleazar ungshedbou thedanga lolabü hoba ungshedbouei hao shanga BUNYUBOU thedanga Urimei janenla phelabü; haoeibü ngühei haoen haulabü, hoba haoeibü ngühei haoen loulabü, khei hao hoba Israelbü pendou, tan pendou khümbo.

²²Hobaje BUNYUBOUei hao la sakkubü tegü Mosaei kümbei; hoba haoei Joshua leian louan Eleazar ungshedbou thedanga hoba tan pendou thedanga lotikei.

²³Hobaje haoei hao to ikei shangetkei, hoba BUNYUBOUei Mosa danko joyobü tegü hao la khümbo kukei.”