Read Chang Naga WEJAKBÜ 28 Bible Online

WEJAKBÜ 28 - Chang Naga bible

WEJAKBÜ 28

¹BUNYUBOUei Mosa to laukei,

²Israel shousi shuong la sakkuashi: Ngeibü lembü, kü la shausiyung lembü, wanei lembü kubü, kü shanga ponlem teibü, habü ho jih tükdea kü to lemla shanga kanei maangsangjan.

³Hobaje nyi haoen to laulabü: BUNYUBOU to kanei lemlabü wanei lembü ho ki, athakko juokbü lembü shanga sanlon paang nali athebü po cheeibü shou chalou angbüa penyi.

⁴Nyi ngeyang sanlon shoushou cheei hoba chasem lubü cheei;

⁵wen inyaibü efa anboubü phejan, oliv onang nitbü hin leiboubü phejan yoa lemlabü.

⁶Ho athakko juokbü lembü, laobou ponlem teibü shanga wanei BUNYUBOU shanga lembü Sinai shongha khangenbü ki.

⁷Hobaje yunglabü lembü kho sanlon shoushou wekoa hin che ka phejan leia phejan che yingjan. Saopobü lemshanga BUNYUBOU la nyi yunglabü kho jonkulabü.

⁸Lubü sanlon shou che kho nyi chasem lemashi, BUNYUBOU shanga ponlem teibü, wanei lembü yunglabü lembü tegü nyi kho ngeyang shausiyung lembü tegü lemjan.

⁹Hobaje po cheeibü shou sanlon nali athebü paang penyi hoba shausiyung lembü shanga wen inyaibü efa phejan ana nyiboubü, onang yoa kheiyoan lembü yoa,

¹⁰athakko juokbü lembü hoba yunglabü lembü to limbo ho Nounyet weko juokbü lembü ki.

¹¹Hobaje lita shaangbounyet kanei BUNYUBOU la juokbü lembü che kujan; masu paangshou penyi, sanlon penyi, sanlon paang che, po cheeibü shou nali athebü sanlon paang nyet;

¹²hoba shausiyung lembü shanga masu pongsu weko onang to kheiyoan, wen inyaibü efa che an phejana phejan sem; hoba shausiyung lembü shanga sanlon che shanga kho wen inyaibü phejan ana phejan penyi,

¹³hoba shausiyung lembü sanlon shoushou weko wen inyaibü yoa kheiyoan, efa anboubü phejan, BUNYUBOU shanga wanei lembü ponlem maibü shanga juokbü lembü.

¹⁴Hobaje haoeneibü yunglabü lembü kho masu pongsu che shanga ih hin thoche, hoba sanlon paang shanga kho hin phejan semboubü hoba sanlon shoushou che shanga hin che phejan leiboubü po kanglanga lit haanbü weko juokbü lembü kia.

¹⁵Hobaje BUNYUBOU la shabü lembü shanga lonpaang che, kho athakko juokbü lembü hoba yunglabü lembü to limbo lemjan.

¹⁶Kheijinei shaangbou lit anthükleiboubü kho BUNYUBOU shanga Püetbü lem ki.

¹⁷Hobaje ho lit anthükngao boubüa lem che kilabü, chalou nyet tokai ajinbü wentek shaulabü.

¹⁸Shaangbounyet saopobü kamshai che kilabü; kanei kümsilei kaangbüsekbü aikei akümlabü;

¹⁹lausikei wanei lembü che, juokbü lembü che BUNYUBOU la kanei lembü kuashi, masu paangshou penyi, hoba sanlon paangshou che, hoba po cheeibü shou sanlon paang nyet; khübü kho nali athebü yingjan.

²⁰Khübü shausiyung lembü wen inyaibü onang to kheiyoan efa phejan ana semboubü masu pongsu weko hoba sanlon paang shanga efa phejan ana penyi;

²¹sanlon shoushou pennyet weko shanga anboubü phejan nyi lemjan;

²²ka shanga shabü delabü shabü lembü shanga lon paang che.

²³ngeyang juokbü lembü laobou ponpen shanga juokbü lembü ki, kho to limbo nyi habü ho lemjan.

²⁴Kho tegü lembü shuong chalou nyet shanga, shausiyung wanei lembü, ponlem maibü BUNYUBOU shanga kho athakko juokbü lembü hoba yunglabü lembü to limbo lemlabü.

²⁵Hobaje chalou nyetbounyeta saopobü kambü che kilabü; kanei kümsilei kaangbüsekbü akümjan.

²⁶Tokei shaangbü langle shuokbü chaloua ladang shausi- yung lembü haanbü BUNYUBOU shanga kanei bale lema lembü kulaje, kanei saopobü kambü che kilabü.

²⁷Lausikei kanei ponlem maibü BUNYUBOU shanga juokbü lembü kujan; masu paangshou penyi, sanlon paangshou che, po cheeibü shou sanlon paang nyet;

²⁸hoba haoen shausiyung lembü wen inyaibü onang yoa kheiyoan, masu pongsu weko phejan ana phejan sem, sanlon paang che shanga phejan ana penyi,

²⁹sanlon shoushou nyet kho sanlon shoushou weko anboubü phejan;

³⁰kan shanga shabü dean apla shanga lonpaang che.

³¹Athakko juokbü lembü si shausiyung lembü to limbo kanei habü yunglabü lembüei lemjan. (Khübü kho kan shanga nali athebü kijan.)