Read Chang Naga WEJAKBÜ 3 Bible Online

WEJAKBÜ 3 - Chang Naga bible

WEJAKBÜ 3

¹Tou Sinai shongha BUNYUBOUei Mosa si Aron to joyobü meten habü ho ki:

²Habü ho Aroneibü shousi shuong nyen ki; Jaishoubou Nadab si Abihu, Eleazar si Ithamar.

³Habü ho Aroneibü shousi shuong, onang naangkuko pienbü ungshedbou shuong ki; haoei haoen ungshed kümaleia khangenla khümbo kukei.

⁴Hobaje Sinai lamanga BUNYUBOU thedanga Nadab si Abihu, haosiei ajan ayingbü wanei lembüei BUNYUBOU thedanga haikei hoba haoenei shousi akitei; hoba Eleazar si Ithamar, haosiei haoeneibü bou Aron lang kijinei ungshed kümsilei kümbo khangenkei.

⁵BUNYUBOUei Mosa to laukei,

⁶“Levi phang nyangko leijung louan Aron ungshedbou khangenla shanga hao thedanga haoen phokushi.

⁷Hobaje lemshang nei- chem kümsilei kümla shanga kamshang neichema haoenei hao shanga hoba shuong pendou shanga kümsilei kümlabü.

⁸Hobaje haoenei lemshang neichem kümsilei kümlabü hoba Israel shousi pendou chühlabü hoba kamshang neichema peisilei jemlasanglabü.

⁹Hobaje nyi Levibü kho Aron si haoeibü shousi la kuashi; Israel shousi yo ka haoen hao shanga khümbo kuda.

¹⁰Aron hoba haoeibü shousi shuong ungshed kümsilei kümla nyi pienashi; lubü ao nyangko loulaje haoje haitilabü.”

¹¹BUNYUBOUei Mosa to laukei,

¹²“Chühashi, Israel shousi yo ka jaishoubou phai pendou jeiko Israel shousi yo ka ngei Levi shuong heena; hoba Levi shuong ngeibü. Aishanga jaishoubou phai pendou ngeibü; Ijep kaodaka ngei jaishoubou phai pendou haitibü chaloua Israela jaishoubou müt hoba meisiau pendou kü shanga pienkei; haoen kü shangabü yinglabü; ngo BUNYUBOU ki.”

¹³

¹⁴BUNYUBOUei Sinai shongha Mosa to laukei,

¹⁵Levi ka pakbü chempen chempen weanchühashi; bousu shuong mütpem weko lit che jai onbü ka jaüan thükae nyi haoen lühbak weashi.

¹⁶Hibü Mosaei hao la sakkubü tegü haoen pakkei.

¹⁷Hobaje habü ho Levi shousi shuong haoen nyen kikei; Gershon, Kohat hoba Merari.

¹⁸Hobaje habü ho Gershomeibü shousi shuong haoen phang ki; Libni hoba Shimei.

¹⁹Hobaje Kohateibü shousi shuong haoeneibü phang nyen Amram hoba Izhar, Hebron hoba Uzziel.

²⁰Merarieibü shousi shuong haoeneibü nyen Mahli si Mushi. Habü ho haoen phang tegü Levi chempen shuong ki.

²¹Libnibü phang si chung hoba Shimeibü chung kho Gershon ka kikei; habü ho Gershonbü chung shuong kikei.

²²Aoyou lit che onbü ka thükae pakkei, bousu pendou lühbakei khei aoyou pakkei khübü kho hajar nyetto saongao ngao kikei.

²³Gershon chung shuong kho lemshon na- pheinei chanep aepheinei sühtilabü kikei.

²⁴Hobaje Gershoneibü chung leiyeibou Laeleibü shou Eliasaf kikei.

²⁵Hobaje kamshang neichema Gershoneibü shousi shuongei lemshang nei- chem hoba neichem kho yuklepbü nei hoba kamshang neichem koukhün shanga thangtetbü chühjan;

²⁶hoba khongaenei thangtetbü shuong, lemshang neichem hoba lemshon yoan, khongaeto atshang koukhün thangtetbü kho shanga jolüh hoba kho kümsilei shangabü pendou chühjan.

²⁷Kohat ka Amrambü chung, Izharbü chung, Hebronbü chung, hoba Uzzielbü chung ki; habü ho Kohat chung ki.

²⁸Lit che jai onbü ka thükae sühko bousu pendou lühbakbüei hajar setto saongao lak lemshang kho chühkei.

²⁹Kohat shousi chung shuongei lemshang neichem yungkük ae- pheinei sühjan.

³⁰Hobaje Kohatbü phanga boueibü chemdang lei- yeibü Uzzieleibü shou Elizafan kilabü.

³¹Hobaje ngühkhüm busen, khümsok, wanthung denshang, hoba lemshang hoba haoenei jungeibü lemshang peisilei, hoba thangtetbü khübü shanga kümsilei pendou haoenei chühlabü.

³²Hobaje Levi shuong leiyeibü thüka Aron ungshedbou shou Eleazar kongnyu leiyeibou kilabü, hoba lemshang chühbou thüka ikjaibü kilabü.

³³Merari ka Mahli phang hoba Mushi phang pakkei; ho Merari chungsiphang shuong ki.

³⁴Hobaje lit che jai onbü thükae ka bousu phai lühbak kho hajar lakto saoan kikei.

³⁵Hobaje Merari chung leiyeibou Abihaileibü shou Zuriel kikei; lemshang neichem yungthang ae- pheinei haoen shailabü.

³⁶Hobaje lemshang neichema imlabü wa, hoba kho leithetlabü, hoba khoeibü thaonyu hoba kho hanleplabü hoba khübü peisilei pendou hoba khübü kümsilei pendou

³⁷hoba khongmaang kaiko thaonyu shuong hoba hanleplabü hoba kelabü shuong hoba khübü jolüh Merari shousi shuongei chühlabü.

³⁸Aoyou chanyu angbou kamshang neichem thedang chaangbou ae thedang yeian shaida, haoen kho Mosa si Aron hoba haoeibü shousi shuong yingjan; haoenei Israel shousi shuong kümsilei lemshang neichem chühla shanga; hoba aoyou nyangko louda, haoje haitilabü.

³⁹Hobaje lit che jai onbü hoba khoeibü thükae bousu pendou BUNYUBOUei sakkubüa Mosa si Aronei lühbak webü pendouei hajar saoto nyi kikei.

⁴⁰BUNYUBOUei Mosa to laukei, “Israel shousi jaishoubou shaang bukbü bousu lit che jai onbü thükae pendou lühbak weanchühashi, hoba haoen nyen weanchühashi. Hobaje Levi shuong kho kü shangabü, ngo BUNYUBOU kia. Israel shousi yoa shaang bukbü shou pendou jeiko leashi, hoba Israel shousi shuongeibü shaang shatbü meisiau weko Levi shuongeibü samkeisamuk nyi sungashi.”

⁴¹

⁴²Hobaje BUNYUBOUei hao la sakkubü tegü Mosaei Israel shousi yoa shaang bukbü shou pendou lühbak wekei.

⁴³Hobaje shaang bukbü shou bousu pendou lit che jai onbü hoba thükae haoen nyen lühbak weanchühbü kho hajar saoto nyi hoba saoanto anjinleito sem.

⁴⁴BUNYUBOUei Mosa to laukei,

⁴⁵“Israelbü shaang bukbü pendou jeiko Levi shuong, hoba haoeneibü samkeisamuk jeiko Levi shuongeibü samkeisamuk pienashi; hoba Levi shuong ngeibü kilabü; ngo BUNYUBOU ki.

⁴⁶Hobaje shaang bukbü shou Israel shousi shuong aoyou Levi shuong tokei juongbou hoba lühbak thükkabou ki, khei haoen saoanto anjinleito sem

⁴⁷nyi haoen mütpem weko shanga shekel lejan (shekel kho gera saoche).

⁴⁸Hobaje nam laobouei haoen lühbak aei angthetan ki, kho nyi Aron hoba haoeibü shousi la kujan.”

⁴⁹Hobaje Levi shuongei angthetbü aoyou lühbak aei kikei haoen ka angthetbü nam kho Mosaei lekei.

⁵⁰Israel shousi shaang bukbü shou ka haoei nam kho lekei, kho lemshona kibü shekel tegü hajar che saongao semto saosemto ngao.

⁵¹Hobaje BUNYUBOUei Mosa la sakkubü tegü Mosaei angnam hebü kho Aron si haoeibü shousi la kukei.