Read Chang Naga WEJAKBÜ 30 Bible Online

WEJAKBÜ 30 - Chang Naga bible

WEJAKBÜ 30

¹Kheijinei Mosaei Israel shousi khuleibü shuong to laukei: BUNYUBOUei sakkubü kümsilei kho ho,

²Ladang müt cheei BUNYUBOU shanga thebülanbü che theletlaje ayingsi theletbü cheei theyolanyoko khühan kilaje haoei jembü ngüh aleilujan; haoei haoeibü sembung ka laubü tegü pendou kümjan.

³Tokei ladang yaksa cheei BUNYUBOU shanga den che takletlaje hoba saoei lolo theletbüei khühan kilaje sao toukei boueibü chema medeia kijinei hoba saoei theletbü shanga hoba laobou theletbüei sao lolo khühan ki,

⁴kho bouei didalonga, hoba bouei sao to ngüh üangko kialonga; kheijinei saoei theletbü ayingsi saoei theletbü laobouei sao khühan ki kho aleiluko kilabü.

⁵Lausikei bouei haoei ditbü chaloua sao la asakkulonga saoei theletbü ayingsi saoei takletbü laobouei sao khühan ki, aikei alelabü; hoba BUNYUBOUei sao la shedbü apbulabü; aieilausi bouei sao la asakku.

⁶Hobaje saoei takletan kibü jihsiphaia ayingsi damanchühko theletbü cheei sao to khühan kibü jiha sao chem kanalonga,

⁷hoba kho saoeibü laoei didalonga hoba haoei ditbü chaloua ngüh üangko kialonga, kheijineije saoei takletbü aleilulabü hoba theletbü laobouei sao lolo khühan ki kho aleilulabü.

⁸Lausikei haoei ditbü chaloua haoei kho asakkulonga kheijinei haoei sao to saoei takletan kibü kho hoba saoei damanchühko sao lolo theletbüei khühan kibü kho inletkulabü, hoba BUNYUBOUei sao la amai apbulabü.

⁹Lausikei latnyu ayingsi bangbü yaksa shangabüa aiei saoei sao lolo khühan ki, kho sao to khühan kilabü.

¹⁰Hobaje saoei saoeibü lao chema theletbü lealonga, ayingsi takletbüei sao khühan kialonga,

¹¹hoba saoeibü laoei kho didalonga hoba sao to ngüh üangko kialonga, hoba sao athangetlonga, kheijinei saoei takletbü pendou aleilulabü; hoba saoei sao lolo theletbüei sao khühbü pendou aleilulabü.

¹²Lausikei laoei kho ditbü chaloua khübü kho amai apbualonga; kheijinei saoeibü sembung ka ai ong theletbü shanga ayingsi saoei jembü lolo theletbü shanga longlaje kho alelabü, saoeibü laoei kho apbua, hoba BUNYUBOUei sao la shedbü apbulabü.

¹³Theletbü weko hoba ektokhuian theletbü weko laobouei jembü lolo khonsak leda kho jembü laoei kümbula thükkei, ayingsi amai apbula thükkei.

¹⁴Lausikei saoeibü laoei chalou angboua ngüh üangko kialonga, kheijinei saoei theletbü hoba sao to kibü theletbü pendou kümbulabü, aishanga haoei sao thedanga kho ditbü chaloua ngüh üangko kikei.

¹⁵Lausikei khübü kho haoei ditan phaia haoei akümtilonga, kheijineije haoei jembü yak shedbü künlabü.

¹⁶Bousubou si haoyak haosi kanglanga hoba bou si haoeibü nouyangnyueibü bou chema kibü medei jih haosi kanglanga BUNYUBOUei Mosa la sakkubü ngühkhüm habü ki.