Read Chang Naga WEJAKBÜ 31 Bible Online

WEJAKBÜ 31 - Chang Naga bible

WEJAKBÜ 31

²“Israel shousi shuongei Midianbü to phok lamlabü; hoba kho phaia no hailabü.”

³Hobaje Mosaei mütshuong to laukei, “Midianbü to BUNYUBOUeibü phoklambü kan yoa Midianbü khulimbo hauan wapyola shanga kan bousu shuong insiaubu lamleashi.

⁴Israelbü chung pendou ka chung weko ka hajar che che kanei wapyola hautilabü.”

⁵Hibü Israelbü hajar juong ka chung weko ka hajar che bang hean hajar anthüknyi wapyola lamlekei.

⁶Kheijinei Mosaei haoen, Eleazar ungshedboueibü shou Finehas yoan, chung weko ka hajar che bang lemshang kabü chaksiam hoba laphangla shanga haoeibü ika teklaang jungan hautikei.

⁷Hobaje BUNYUBOUei Mosa la sakkubü tegü haoenei Midianbü to wapyokei, hoba haoen bousu phai pendou haitikei;

⁸hoba joubü haitibü yoa haoenei Midianbü choba shuong haitikei, Evi, Rekem, Zur, Hur, hoba Reba Midianbü choba ngao; tokei Beoreibü shou Balaamkei haoenei inei haitikei.

⁹Hobaje Israelbü shuongei Midianbü sao hoba haoeneibü shousi shuong pendou lapshaikei, hoba masu dan pendou hoba haoeneibü sanlon shuong shuonga hoba haoeneibü peisilei pendou haoenei soan sungkei.

¹⁰Hobaje haoen kibü sangnyu pendou hoba haoen kishang pendou haoenei wanei thean apbukei.

¹¹Hobaje haoenei sangshibü ka soletbü pendou müt si meisiau ham lekei.

¹²Hobaje haoenei langsenbü shuong hoba soletbü peisilei Mosa si Eleazar ungshedbou jungto hoba Israelbü tan pendou jungto Jordan nyangko Jerikhoa Moab pholi to sungbakei.

¹³Mosa, Eleazar hoba tan leiyeibü pendou shaishang khong aeto haoen shuokla haukei.

¹⁴Hobaje lakjaibü dan leiyeibü shuong, hajar thüka lajam leibou hoba saongao thüka lajam leibou wapyobü ka longeibü shuong to Mosa khau angkei.

¹⁵Mosaei haoen to phekei, “Kanei yaksa pendou lang leakei sai?

¹⁶Chüh- ashi, habü hoei Israel shousi shuongei Balaameibü ngühsidei danko BUNYUBOU khulimbo Peora Israelbü shuong ayingbü to sepeitian, khoei BUNYUBOUeibü mütshuong yoto limsilang loutikei.

¹⁷Hibü tou hanbü shuong yoa bousu phai haitiashi, hoba bousu to jambü yaksa pendou haitiashi.

¹⁸Lausikei bousu to ajambü yaksa pendou kan jembü shanga lang phoshi.

¹⁹Hobaje kan shaishang khong aenei chalou nyet kishi; aoyouei müt at haitikei, hoba aoyouei haibü mang at to meitikei, kan lolo sembounyet hoba nyetbounyet saüenashi.

²⁰Hobaje neisimei weko hoba phekhonei kümbü pendou hoba buei kümbü peisilei pendou kanei kan lolo saüenashi.”

²¹Hobaje Eleazar ungshedbouei lason to haubü mütshuong to laukei, “BUNYUBOUei Mosa la sakkuko ngühkhüm yeikubü kho ho.

²²Khei yingsikei, hon, chandinam, chinam, namkung, tin hoba sishai,

²³wanei alonbü peisilei phai kanei wana jinkujan.

²⁴Hobaje nyetbounyet kaneibü neisimei sakjan hoba kan saopoan kilabü, kho phaia kan shaishang to loulabü.”

²⁵BUNYUBOUei Mosa to laukei,

²⁶“Müt si meisiau ham soletbü weanchühashi, Eleazar ungshedbou kasi hoba tan leiyeibü shuong;

²⁷hoba peisilei kho penyi la yeiko lason to haubü lakjaibü hoba tan pendou yoa janashi.

²⁸BUNYUBOU shanga lason to haubü phejan ka khüm heashi; müt, masu, gadu hoba sanlon tan tan ka saongao phejana che che,

²⁹kho haoeneibü phei ka helabü, hoba BUNYUBOU to lemla shanga Eleazar ungshedbou la kulabü.

³⁰Israelbü la janletkubü ka nyi müt, masu, gadu, hoba sanlon anjinsem bang weko ka che che sungenlabü, hoba BUNYUBOU lemshang neichema ikjaibü Levi shuong la kulabü.”

³¹Hobaje BUNYUBOUei Mosa la sakkubü tegü Mosaei Eleazar ungshedbouei kümbei.

³²Tou soletbü, lakjaibü shuongei sungbü yoshaibü kho sanlon hajar 675,000,

³³masu hajar 72,000,

³⁴gadu hajar 61,000,

³⁵hoba bousu to ajambü yaksa medei hajar 32,000.

³⁶Lason to haubü phejan phei kho sanlon hajar 337,500,

³⁷hoba sanlon khüka BUNYUBOU la khüm 675 kikei.

³⁸Hobaje masu hajar 36,000 ka BUNYUBOU la khüm 72.

³⁹Hobaje gadu hajar 30,500 ka BUNYUBOU la khüm 61,

⁴⁰Hobaje müt hajar 16,000 ka BUNYUBOU la khüm müt 32,

⁴¹Hobaje BUNYUBOUei Mosa la sakkubü tegü Mosaei BUNYUBOUeibü kho Eleazar ungshedbou la kukei.

⁴²Hobaje Israel shousieibü phejan jamde lakjaibü shuong la Mosaei jankubü ka,

⁴³tou shuong shangabü jamde kho sanlon hajar 337,500,

⁴⁴masu hajar 36,000

⁴⁵gadu hajar 30,500,

⁴⁶hoba müt hajar 16,000

⁴⁷Israelbü phejan jamde müt si meisiau ham ka anjinsem bang weko ka sungkei, hoba BUNYUBOUei Mosa la sakkubü tegü BUNYUBOU lemshang neichem ikjaibü shuong Levibü la khübü kho kukei.

⁴⁸Kheijinei sepai hajar juong janbüa yaangbü shuong hajar che janbü thüka lajamleibou hoba saongao thüka lajamleibou Mosa jungto haukei, hoba Mosa to laukei,

⁴⁹“No khangenbü shuongei küneibü ika kibü lakjaibü shuong künei weanchüha, hoba kün che ongkei amaukei.

⁵⁰BUNYUBOU thedanga kün jembü shanga shabü dela shanga mütpem wekoei jungan loubü lembü, hon, khüngkhap, chinyu, ikjikhap, chimen, ashenjang, khübü kho sungbakei.”

⁵¹Hibü Mosa si Eleazar ungshedbouei haoen ka hon hoba lubü peisilei pendou lekei,

⁵²hoba hajar hoba saongao janbü thüka lajamleibou shuongei BUNYUBOU la kubü hon pendouei shekel hajar 16,750.

⁵³Aishanga lakjaibü shuongei soletbü peisilei jembü shanga luluei lekei.

⁵⁴Ladang Mosa hoba Eleazar ungshedbouei hajar hoba saongao janbü thüka lajam leiboueibü ka hon kho sungkei, haoenei kho Israelbü shanga BUNYUBOU thedanga damenla shanga kamshang neichem to sungbakei.