Read Chang Naga WEJAKBÜ 32 Bible Online

WEJAKBÜ 32 - Chang Naga bible

WEJAKBÜ 32

¹Tou Reuben si Gadeibü shousi shuongei samkeisamuk langkeibü meisiau juong kikei; hoba ladang haoenei Jazer kaonyek hoba Gilead kaonyek hapbei, chühashi, kho shatsinam samkeisamuk shanga paplepbü kaoen kikei.

²Hibü Gad si Reuben shousi shuongei Mosa, Eleazar ungshedbou hoba tan leiyeibü shuong to laukei,

³“Atarot, Dibon, Jazer, Nimra, Heshbon, Eleale, Sebam, Nebo, hoba Beon,

⁴laobou kaonyek BUNYUBOUei Israelbü tan thedanga yantian phokukei, samkeisamuk shanga paplepbü hoba kaibü sambü shuongeibü samkeisamuk shangakei maibü.”

⁵Hobaje haoenei laukei, “Nyi kün to onoukho laualonga ho kaonyek ho no khangenbou la phetphan kushi; Jordan danko kün leian tohauma.”

⁶Hobaje Mosaei Gad si Reubeneibü shousi shuong to laukei, “Kaneibü jaisinasi shuong wapyola haujinei kanje hanei setan kila se?

⁷Aila BUNYUBOUei Israel shousi shuong la kubü kaodak to haula kanei haoeneibü maang hantida?

⁸Kaonyek chühla shanga Kadesh-Barnea ka ngei haoen hautijinei kaneibü bousi shuongei hai kümbei.

⁹Aieilausi haoen Eshkol pholi to angan kaonyek kho limchühkei, BUNYUBOUei Israel shousi la kubü kaonyek khüto Israel shousi shuong ohaujan dogo haoen maang koutikei.

¹⁰Hobaje kho chaloua BUNYUBOU khau angkei; hoba haoei theyolanyoko laukei,

¹¹‘Maimaitham ngei Abraham la Isak la hoba Jakob la thekubü kaodak kho Ijep ka longbü po saoche ka thükaeei ühüplabü; aieilausi haoenei küphai khümboje asem.’

¹²Khei Kenizbü Jefuneeibü shou Kaleb hoba Naneibü shou Joshua to limbo; aieilausi haosieije küphai khümbomeiko kuan sembei.

¹³Hobaje Israelbü khulimbo BUNYUBOU khau angkei hoba BUNYUBOU thedanga amaibü kümbü meten pendou amau shongko haoei haoen ang louyan dogo po saonyi sühko yama shoongaitikei.

¹⁴Hobaje chühashi, Israel khulimbo BUNYUBOUei hatlamoklabü khauang longbü aei longentilabü lele hanei kaneibü bousi shuong jeiko meten haanbü shabü tan haako kan longakei.

¹⁵Aishanga hao phai asembo kan sepeinyu ngaialonga haoei nyibou haoen yama apyolabü.”

¹⁶Hobaje haoenei hao jungto nyangko louan laukei, “Samkeisamuk shanga künei hanei chem danglabü hoba nashou yaksa shanga sangnyu kümbho;

¹⁷lausikei haoen jembü kishang to aloushongko kün lolo Israel shousi shuong thedang aeto haula insiaubu lamlean kilabü, hoba kaonyek kabü müt ka khümenan kila küneibü shousi shuong künei sangnyu banyu maanga kitilabü.

¹⁸Israel shousi mütpem weko haoei phet aphan shongko kün jembü chem to angailabü.

¹⁹Aishanga Jordan thiaenei hoba uthinei künei haoen yoa phet aphanlabü; aieilausi kün shangabü phetphanlabü Jordan hiphainei chaangbou aenei kia.”

²⁰Hobaje Mosaei haoen to laukei, “Kanei ho kümbo lausije, kanei BUNYUBOU junga thinei wapyola kan lolo lamleko laualonga,

²¹hoba haubü mütpem wekoei jembü thedang ka dangbou shian asatti shongko BUNYUBOU thedanga Jordan danko haukho lausije,

²²hoba BUNYUBOU thedanga kaonyek kho lekho lausije, kheijineije kan sepeinyu ngaian BUNYUBOU aenei hoba Israel aenei shedbü akilabü. Hobaje kho kaonyek kho BUNYUBOU junga kan shangabü kilabü.

²³Lausikei kanei khei akümlongaje, chühashi, kanei BUNYUBOU khulimbo shed shona; hoba kaneibü shabüei kan lamenlabü dogo ngeashi.

²⁴Kaneibü shousiyak shanga sangnyu hoba kaneibü samkeisamuk, shatsinam shanga chem dangashi, hoba kaneibü sembung ka longbü kho kümashi.”

²⁵Hobaje Gad si Reubeneibü mütliei Mosa to laukei, “No khangenbü shuongei ngeibü bunyubouei sakkubü tegü kümlabü.

²⁶Küneibü shousi yaksi shuong, küneibü samkeisamuk, shatsinam pendou Gilead sangnyu shuonga kilabü;

²⁷lausikei kün no khangenbü shuongei ngeibü bunyuei laubü tegü BUNYUBOU thedanga insiaubu jungan lason to wapyola haula shanga danjung haulabü.”

²⁸Hibü Mosaei Eleazar ungshedbou la hoba Naneibü shou Joshua la hoba Israel shousi chung leiyeibü la khübü phokukei.

²⁹Hobaje Mosaei haoen to laukei, “Gadeibü mütli shuong hoba Reubeneibü mütli shuong insiaubu jungbü pendouei BUNYUBOU thedanga Jordan danko laualonga kheijinei kanei kaonyek kho shian apashi, hoba haoen la Gilead letiashi;

³⁰lausikei haoenei kan yoa insiaubu jungan ohaulonga, khei yingsije haoenei Kanan kao kan yoa janletjan.”

³¹Hobaje Gilead si Reubeneibü mütli shuongei jongaiko laukei, “BUNYUBOUei no khangenbou to laubü tegü kho tegü künei kümlabü.

³²Künei insiaubu jungan BUNYUBOU jungka Kanan to atlabü, hoba Jordan chanyu angbou kaodak kho kün shangabü tegü kilabü.”

³³Kheijinei Mosaei haoen la khei Gad si Reubeneibü mütli Josefeibü shousi Manasse chung jamde la Amorbü choba Sidon sangle, hoba Bashana choba Og sangle, sangnyu shuong hoba haoen kaijembo kibü kaonyek khümbo kukei.

³⁴Hobaje Gadbü mütli shuongei Dibon, Atarot, Aroer,

³⁵Atroth Shofan, Jazer, Jogbeha, Beth Nimra hoba Beth Haran sangnyu kümbei,

³⁶hoba kümthang sangnyu hoba sanlon shanga chem dangkei.

³⁷Hobaje Reubeneibü mütliei Heshbon Eleale, hoba Kiriatham kümetkei.

³⁸Hobaje Nebo si Baalmeon (habü nyen jeiyoda), hoba Sibma kümetkei. Haoenei kümetbü sangnyu shuong la nyen lubü nyenkukei.

³⁹Hobaje Manasseeibü shou Makireibü chung Gilead to hauan, khünei kibü Amorbü ka kho soan lekei.

⁴⁰Hobaje Mosaei Manasseeibü shou Makir la Gilead kukei, hoba hao khünei kikei.

⁴¹Hobaje Manasseeibü shou Jair haukei hoba khübü sangnyu shian apbei, hoba khübü kho Haavoth Jair dogo nyenkei.

⁴²Nobaei Kenat hoba khünei kibü sangnyu shuong lekei, hoba haoeibü nyenphai ka Noba dogo nyenkei.