Read Chang Naga WEJAKBÜ 33 Bible Online

WEJAKBÜ 33 - Chang Naga bible

WEJAKBÜ 33

¹Mosa si Aronei leian Israelbü Ijep kaodak ka wakou paijinei haoen tan thüngko thüngko haubü shaishang kaoen nyen habü ho ki.

²Hobaje BUNYUBOUei sakkubüa Mosaei haoen meimeishang kaoen che ka che to haubü dokei, hoba khübü kho hanei che phaia che dogo kia.

³Hobaje shaangbü lit, chalou anthük ngaoboubüa haoenei Rameses ka meimeikei; Püetbü lem danan nyibounyet kho Israelbüei thük hapan Ijep khümbo limchühngaiko,

⁴BUNYUBOUei haitibü shaang bukbü bousu shou shuong pendou khünko kijinei meimeijung satkei; tokei BUNYUBOUei haoeneibü mühghaü shuong shieikoekei.

⁵Hobaje Rameses apyoan Israelbü Sukkota shaikei.

⁶Hobaje Sukkot apyoan yamlamang thona haoen Ethama shaikei.

⁷Hobaje Etham apyoan, haoen Baal Zefon chaangbou ae Piharot to sepeikei, hoba haoen Migdola shaikei.

⁸Hobaje Hahirot apyoan, haoen yungnyu danko yamlamang to haukei, hoba Etham yamlamang danko chalou sem lam paian Maraa shaikei.

⁹Hobaje Mara apyoan, haoen Elim sühkei; khünei Elima deikük shushou anthüknyi hoba pünglong anjinlei kikei, khünei haoen shaikei.

¹⁰Hobaje Elim apyoan haoen Saklangbü Yungnyu nyangko shaikei.

¹¹Saklangbü Yungnyu apyoan haoen Sin yamlamanga shaikei.

¹²Hobaje Sin yamlamang apyoan haoen Dofkaa shaikei.

¹³Dofka apyoan haoen Alusha shaikei,

¹⁴Alush apyoan haoen Refidima shaikei, khünei mütshuongei yunglabü dei ühüpen.

¹⁵Hobaje Refidim apyoan haoen Sinai yamlamanga shaikei.

¹⁶Sinai yamlamang apyoan haoen Kibroth Hattaavaa shaikei

¹⁷Kibroth Hataava apyoan haoen Hazerotha shaikei.

¹⁸Hazeroth apyoan haoen Rithmaa shaikei.

¹⁹Rithma apyoan haoen Rimmon Pereza shaikei,

²⁰Rimmon Perez apyoan haoen Libnaa shaikei.

²¹Libna apyoan haoen Rissaa shaikei.

²²Rissa apyoan haoen Kehelathaa shaikei.

²³Kehelatha apyoan haoen Shefer shongha shaikei.

²⁴Shefer shongh apyoan haoen Haradaa shaikei.

²⁵Harada apyoan haoen Makhelota shaikei.

²⁶Makhelot apyoan haoen Tahata shaikei.

²⁷Tahat apyoan haoen Teraa shaikei.

²⁸Tera apyoan haoen Mithkaa shaikei.

²⁹Mithka apyoan haoen Hashmonaa shaikei.

³⁰Hashmona apyoan haoen Moserota shaikei.

³¹Moserot apyoan haoen Bene Jaakana shaikei.

³²Bene Jaakan apyoan haoen Hor Haggidgada shaikei

³³Horhaggidgad apyoan haoen Jotbathaa shaikei.

³⁴Jotbatha apyoan haoen Abronaa shaikei.

³⁵Abrona apyoan haoen Ezion Gebera shaikei.

³⁶Ezion Geber apyoan haoen Zin yamlamanga shaikei (kho Kadesh)

³⁷Kadesh apyoan Edom kaonyek thonbü Hor Shongha shaikei.

³⁸Hobaje BUNYUBOUei ngabüei Aron ungshedbou Hor shongh to angan khünei haikei. Kho Israelbüei Ijep kaodak apyoan po saonyi boubü lit ngaoboubü shaangbounyet kikei.

³⁹Hobaje Hor shongha Aron haijinei hao po saolakto sem jai lean kikei.

⁴⁰Hobaje Kananbü Aratbü choba ao Kanan kaodaka Negeba kikei, haoei Israelbü loubü shangabü ditkei.

⁴¹Hobaje Hor shongh apyoan haoen Zalmona to loukei,

⁴²Zalmona apyoan haoen Punona shaikei,

⁴³Punon apyoan haoen Obot to loukei,

⁴⁴Obot apyoan haoen Moab leilanga Iye Abarim to loukei,

⁴⁵Iye Abarim apyoan haoen Dibon Gad to loukei;

⁴⁶Dibon Gad apyoan haoen Almondiblathaima shaikei.

⁴⁷Almon Diblathaim ap- yoan haoen Nebo nyangko Abraim shongha shaikei.

⁴⁸Abraim shongh apyoan haoen Jordan nyangko Jerikhoa Moab pholia shaikei.

⁴⁹Hobaje haoen shaishang khünei Moab pholia Jordan peiko Bethjeshimot ka Abelshittim sühko kikei.

⁵⁰Hobaje Jordan nyangko Jerikhoa Moab pholia BUNYUBOUei Mosa to laukei,

⁵¹“Israelbü shousi to lenashi, ladang kanei Jordan nyangko Kanan kaodak to atlaje,

⁵²kaonyek ka khünei kibü mütshuong pendou shian apjan, haoeneibü laangeibü si nameibü heangsho shuong kanei netla yeiko leilukujan hoba haoeneibü shuibao shonghkhu kabü lemshang pendou leilukujan;

⁵³kho phaia kaonyek kho leashi hoba khünei kishi; aishanga kan shangabü ngei kho kan la kua.

⁵⁴Hobaje phaangpakbüei chung chung weko kanei kaodak kho phet phanlabü; chung juongbü la juongbü; shibü la shibü dogo phet jankushi; mütpem weko phaang pakbüei ai penlaje kho hao shangabü kilabü; chung chung janbüei phet phanlabü.

⁵⁵Lausikei kanei kaonyek ka khünei kibü shuong shian asattilonga, aoyou kanei khünei kila sakkulaje haoen kho kaneibü nyeka odnepbü tegü ayingsi kaneibü hipa jak ngütbü tegü kan kishanga kan hongeilabü.

⁵⁶Hobaje ngei haoen to lai jungeilabü ki kho tegü ngei kan to jungeilabü.”