Read Chang Naga WEJAKBÜ 34 Bible Online

WEJAKBÜ 34 - Chang Naga bible

WEJAKBÜ 34

¹BUNYUBOUei Mosa la ngühkhüm kuko laukei,

²“Ladang kan Kanan kaodak to atlaje (kanei phet phanlabü kaonyek kho ho ki, khei Kanan latetcheje khütetche kho khümbo)

³Kaneibü yungkük ae leilang kho Zin yamlamang ka Edom aedang sühko; kaneibü yungkük ae leilang kho Jemdei Yungnyu phangae thonbü ka chaangbou ae,

⁴hoba kaneibü leilang kho Akrabbim anglek yungthang aeto sepeilabü, hoba Zin lamnyu aeto haulabü, hoba Kadesh Barnea yungthanga thonlabü, kho Hazar Addar sühko haulabü;

⁵hoba Azmona leilang kho Ijep Shumang aeto sepeilabü, hoba yungnyua thonlabü.

⁶“Chanep leilang shanga yungnyu yaangbü kho yungko yoan kilabü, kho kaneibü chanep kilabü.

⁷“Habü ho kaneibü yungkük leilang kilabü; Yungnyu Yaangbü ka Hor shongh sühko kanei shenla ngelabü kümashi, hoba leilang kho Zedaa thonlabü;

⁸hoba Hor Shongh ka nyi Hamath to jenshuoklabü hoba leilang thonbü kho Zedada kilabü.

⁹kho phaia leilang kho Zifron aeto haulabü, hoba Hazar Enana thonlabü. Ho kaneibü chanep leilang.

¹⁰“Chaangbou leilang shanga kanei Hazar Enan ka Shefam sühko tetsida kümashi,

¹¹hoba Shefam ka Ain chaangbou Ribla sühko leilang yanlabü; hoba kho phaia leilang kho Kinneret yungnyu shonghyoua meiyouko chaangbou sühko yanlabü;

¹²kho phaia leilang kho Jordan sühko yanan Jemdei yungnyua thonlabü. “Leilang den luluei kaijeman kanei lelabü kaonyek kho ho ki.”

¹³Hibü Mosaei Israelbü to sakkuko laukei, “Chung gü tho mütli che la BUNYUBOUei kula sakkubü kan yoa phaang pakko janlabü kaonyek kho ho ki;

¹⁴aishanga Reubeneibü chung shanga chempen chempen hoba Gad chung shanga chempen chempen hoba Manasse chung jamde shanga haoenei haoeneibü phet sungan apa;

¹⁵phang nyi tho khoei Jordan khatan chaangbou Jerikho sühko chaang ae haoenei phet phanlanga.”

¹⁶BUNYUBOUei Mosa to laukei,

¹⁷“Kan shanga kaonyek janlabü müt nyen habü ho ki. Ungshedbou Eleazar, hoba Naneibü shou Joshua,

¹⁸tokei kaonyek phejan janletla shanga chung weko ka leiyeibü che che lejan”

¹⁹Habü ho BUNYUBOUei pienbü mütshuong ki: [Chung] — [Leiyeibou] Jihuda — Jefunne shou Kaleb Simeon — Ammihud shou Shelumiel Benjamin — Kislon shou Elidad Dan — Jogli shou Bukki Manasse — Efod shou Hanniel Efraim — Shiftan shou Kemuel Zebulun — Parnakh shou Elizafan Issakar — Azzan shou Paltiel Asher — Shelomi shou Ahihud Naftali — Ammihud shou Pedahel

²⁹Kanan kaodaka phet phanla Israel phang aoyou to janyinbü lela BUNYUBOUei sakkukei kho habü mütshuong ki.