Read Chang Naga WEJAKBÜ 35 Bible Online

WEJAKBÜ 35 - Chang Naga bible

WEJAKBÜ 35

¹Tou Jordan nyangko Jerikhoa Moab pholia BUNYUBOUei Mosa to laukei,

²“Israelbü to haoenei phetphanbü kao ka Levibü la kishang sangnyu kula sakkuashi; tokei nyi Levibü la sangnyu kaijembo lamshaushang kao kujan.

³Haoen kishang shanga sangnyu shuong hoba lamshaushang kao khoei haoeneibü samkeisamuk haoeneibü nyaksinam hoba shatsinam pendou khangenlabü.

⁴Nyi Levibü la kubü to khangyoko lamshaushang kao kho sangnyu banyu thük pendou ae kaijembo iknop hajar che kilabü.

⁵Hobaje sangnyu thükae chaangbou shanga iknop hajar penyi takletashi, hoba yungkük shanga iknop hajar penyi hoba chanep shanga iknop hajar penyi hoba yungthang shanga iknop hajar penyi hoba sangnyu kho jenyua kilabü. Haoeneibü sangnyu shuong shanga habü ho lamshaushang kao yinglabü.

⁶Hobaje kanei Levibü la kubü sangnyu kho satenshang sangnyu lak kilabü; laobou kanei müt haitibü la satenshang shanga kulabü; hoba khübü to limbo kanei sangnyu saonyito nyi kulabü.

⁷Kanei Levibü la kubü sangnyu pendouei saonyito set yinglabü, khübü kho lamshaushang yoan kulabü.

⁸Hobaje sangnyu shuong shanga, laobou kanei Israel shousi shuong shangabü ka kulaje, juongbü la juongbü, shibü la shibü kuashi; juongbü ka juongbü hoba shibü ka shibü sungashi; chung wekoei luluei hapbü phet thüng sangnyu shuong kho Levibü la kulabü.”

⁹BUNYUBOUei Mosa to laukei,

¹⁰“Israel shousi shuong to lenashi: Ladang kan Jordan danko Kanan kaodak to atlaje,

¹¹Kheijinei müt atei mashikan haitisi, müt haitibou khünei satenla shanga kanei kan shanga satenshang sangnyu pienashi.

¹²Hobaje kan shanga sangnyu shuong kho phoklambü ka satenshang shanga kilabú, khei müt haitibou kho shuong thea matjemla alo shongko ühaiko kila shanga.

¹³Hobaje kanei kubü sangnyu shuong kho kan shanga satenshang sangnyu lak kilabü.

¹⁴Kanei Jordan danan sangnyu sem kulabü, hoba sangnyu sem kanei Kanan kaodaka kujan; khübü kho satenshang sangnyu kilabü.

¹⁵Israel shousi shuong shanga, küksithang shanga, hoba haoen yoa homan kibü shuong shanga khübü sangnyu lak satenshang shanga kilabü, khei müt aoei mashikan müt at haitilaje khünei satenla shanga.

¹⁶“Lausikei haoenei namkung atei hao to ngüman kho tegü hao haialonga hao müt haitibou ki, müt haitibou kho maimaitham haitijan.

¹⁷Hobaje haoeibü ikei müt haitilabü hele laang che jungan hao to tetalonga, hoba hao haialonga hao müt haitibou; müt haitibou kho tükde haitijan.

¹⁸Hobaje haoeibü ika kibü buei hailabü lele ngümalonga, hoba hao haialonga, hao müt haitibou, müt haitibou kho maimaitham haitijan.

¹⁹Siiei phoklambüei jembü lolo müt haitibou kho haitilabü.

²⁰“Hobaje mangsenbüei hao jaangan koutialonga, ayingsi thoan hao to tetalonga hoba hao haialonga;

²¹ayingsi theshat maangshatei haoei haoeibü ikei ngümalonga hoba haian apsi, aoei hao to ngümbei, maimaitham hao haitilabü, hao müt haitibou ki. Siiei phoklambouei ladang hao haüyolaje müt haitibou kho haoei haitilabü.

²²“Lausikei theshat maangshat akiko ong mangde hao to thangkutialonga, ayingsi athoko dencheei hao to mülanglimde tetousi

²³ayingsi hao ühüpbo müt haitilabü lele laang atei hao to tetousi, hoba hao haian apsi hoba haoeibü dangbou ayingsi hao to amaibü kümla alam;

²⁴kheijinei habü songei ngümbou müt hoba phoklambou müt kanglanga shuongei mat jemlabü.

²⁵Hobaje siiei phoklambou müteibü ik ka shuongei müt haitibou kho leiyenlabü, hoba hao satbü satenshang sangnyu khüto shuongei hao leiyetan phokulabü, hoba saopobü onangei naangkubü thükkabou ungshedbou ühaishongko hao khünei kilabü;

²⁶lausikei hao satshang satenshang sangnyu leilang danko müt haitibou kho ladang satlaje,

²⁷hoba haiboueibü chempenei hao hapan haitialonga, kho phoklambü kümsilei kho hao khulimbo haitibü shedbü akilabü.

²⁸Müt haitibou shedbou kho thükkabou ungshedbou kho ühaishongko hao satenshang sangnyua kijan kikei, lausikei thükkabou ungshedbou haian phaia müt haitibou kho jembü phet phanshang to ngailabü.

²⁹Habü kümsilei kan meten sünga kan kishang pendoua ponpen song kilabü.

³⁰“Aoyouei müt haitilaje, müt haitibou kho aukabü shuong sembung danko hao haitilabü; lausikei müt aokhu limbokei aukabü che kubüei hao ühaitilabü.

³¹Khüto liman haila mubü müt haitilabou shanga kanei angnam alelabü; lausikei hao haitijan.

³²Hobaje thükkabou ungshedbou ühaijineitham ao satenshang sangnyua satenan ki, hao nyibou longeian kaonyeka kila shanga kanei angnam ai alejan.

³³Hibü kanei kan kishang ashatijan, aishanga kaonyek shatibü kho sii ki; aoeibü sii apbei kho sii to limbo kaonyeka sii phinbü shanga shabü debü aikei akümjan.

³⁴Hobaje kan kibü kaodak nyi ashatijan, kho yoa ngo kia, aishanga ngo BUNYUBOU Israel shousi yoa kida.”