Read Chang Naga WEJAKBÜ 36 Bible Online

WEJAKBÜ 36 - Chang Naga bible

WEJAKBÜ 36

¹Hobaje Gilead shousi chemdang leiyeibü shuong, Makireibü shou, Josefeibü shousi shuong chempen, Manasseeibü shou, nyangko louan Mosa thedanga hoba leiyeibü thedanga hoba Israel shousi chung leiyeibü thedang to louan joyokei.

²Hobaje haoenei laukei, “Phaang pakko kaonyek kho phetphanla Israel shousi shuong la kula shanga BUNYUBOUei ngeibü bunyu la sakkua; hoba kün jaisina Zelofehadeibü phet haoeibü shou nouyangnyu shuong la kula BUNYUBOUei ngeibü bunyu la sakkua.

³Hobaje Israel shousi chung lubü shousi at jungto hauan chemkana longa, kheijinei haoeneibü phet kho küneibü bousi shuongeibü phet ka sungjung hauan, haoen laobou chung ki haoen la jinkulabü, kho tegü küneibü phet hapbü ka langlabü.

⁴Hobaje ladang Israelbü jubilee kilaje, haoeneibü phet kho haoen laobou chunga yoan ki khola kulabü, hoba kho tegü haoeneibü phet kho küneibü bousi shuongeibü phet ka sunglanglabü.”

⁵Hobaje BUNYUBOUei sakkubüei Mosaei habü ngühkhüm Israel shousi la kuko laukei, “Josef shousi chungei tükde lauda.

⁶Zelofehad nouyangnyusi shuong shanga BUNYUBOUei sakkubü kho ho ki. Haoenei aoyou mangsühda haoen jungto laolamla hautishi; haoenei haoeneibü bousi shuong chung chempen jungto ong laolamla haulabü.

⁷Kho tegü Israelbüeibü phetkei aikei phang che ka che to ohaulabü; aieilausi Israel shousi shuongei jembü boueibü chung phet phanko kilabü.

⁸Hobaje Israelbü phanga yaksa shou aoei phet phanlabü lele longlaje, Israel shousi shuongei jembü boueibü phet phanlabü lele saoei saoeibü boueibü chung at jungto laolamla haujan.

⁹Kho tegü ai phetkei phang che ka che to ohautijan; aishanga Israel phang wekoei jembü phet phanjan.”

¹⁰Zelofehadeibü nouyangnyu shuongei BUNYUBOUei Mosa la sakkubü tegü kümbei;

¹¹aieilausi Mahla, Tirza, Hogla, Milka, hoba Noa, Zelofehadeibü nouyangnyu shuongei haoeneibü boueibü naeibü shousi shuong to chem kankei.

¹²Haoen Josefeibü shou Manasse ka pakbü chempen jungto haukei, haoeneibü phet haoeneibü boueibü chempen to kikei.

¹³Jordan nyangko Jerikhoa Moab pholia BUNYUBOUei Mosaeibü ik danko Israel shousi la kubü ngühkhüm hoba song habü ki.