Read Chang Naga WEJAKBÜ 4 Bible Online

WEJAKBÜ 4 - Chang Naga bible

WEJAKBÜ 4

²Levi shousi shuong, chung, chempen chempen,

³po khujin ka po anjinsem jaishou sühko kamshang neichema kümlaleila kümtoleito atbü pendou wean chühashi.

⁴Yongbou, saopobü peisilei shuong shanga kamshang neichema Kohat shousi shuong kümsilei habü ho ki.

⁵Ladang shaishang kuklaje Aron si haoeibü shousi shuong maangto atlabü, hoba thangtetbü yukbü kho haoenei sungletlabü, hoba khoei ngühkhüm busen kho küpletjan.

⁶hoba kho thüka loneibü khon yukleplabü, hoba kho thüka pilaü neiei seikulabü, hoba kaang jinan phokulabü.

⁷Hobaje Mühghaü thedanga phobü wentek phobü khümsoka haoenei pilaü nei che imbujan, hoba kho thüka phau, nyaklak, hoba phauyaang hoba yeiyola thung shuong pholabü; hoba hanghangko kibü wentek kho, kho thüka kijan;

⁸hoba khübü thüka haoenei nakthüngbü nei seikulabü, hoba khokei loneibü khonei küpleplabü, hoba kho thüka kaang jinan phokulabü.

⁹Pi nei cheei ngesakbü shanga wanthung denshang, wanthung, kip, wanyui phobü hoba onang shuong pendou haoenei küpan phokujan.

¹⁰Hobaje haoenei peisilei pendou kho loneibü khonei yuklepan phojan hoba kho belabü shon chenei phokulabü.

¹¹Hobaje honeibü lemshon thüka haoenei pinei che imjan hoba kho loneibü khonei küpleplabü, hoba kho thüka kaang jinan pholabü.

¹²Hobaje lemshang khangenbü kümaleia jungeibü chaksiam pendou sungan haoenei khübü kho pinei chenei jinan, hoba loneibü khonei küplepan belabü shon thüka phokujan.

¹³Hobaje lemshon ka haoeneibü tap kho apjan hoba hoba kho thüka nakthüngbü nei seikulabü,

¹⁴hoba kho kümsilei shanga jungeibü chaksiam pendou kho thüka phokuan wansuokjin, phe- yaüjin, suoklabü, hoba phauyaang hoba lemshona chaksiam pendou; hoba kho thüka haoenei loneibü khonei yukleplabü, hoba kho thüka kaang khühlabü.

¹⁵Hobaje shaishang ka kukjinei ladang Aron si hao shousi shuongei lemshang küplepbü wantilaje hoba lemshang peisilei pendou lamlekulaje, kheijinei Kohat shousi shuongei kho bela loulabü; lausikei haoen haisi amaibula dogo lemshang khüto haoenei ameitijan. Khübü peisileia kamshang neichema Kohat shousi shuongeibü on ki.

¹⁶Hobaje Aron ungshedboueibü shousi Eleazarei wanthung shanga onang, ponlemhibü jen, hanghangko kibü shausiyung lembü, hoba naanglabü onang, lemshang neichem, hoba khünei kibü peisilei pendou thüka ik jaijan.

¹⁷BUNYUBOUei Mosa si Aron to laukei,

¹⁸“Levibü yo ka Kohatbü wapan tüpma,

¹⁹lausikei yongko saopobü peisilei shuong nyangko haoen loujinei haoen ühaiko lang kilabü shanga haoen to hai jungeiashi: Aron hoba haoeibü shousi shuong atlabü, hoba haoen mütpem weko la jembü kümsilei hoba jembü on kuashi;

²⁰lausikei haoenei saopobü peisilei shuong chühla ütjan, khei ayinglonga haoen hailabü.”

²¹BUNYUBOUei Mosa to laukei,

²²Gershon shousi chung chung, chempen lühbak weanchühashi.

²³Kamshang neichema kümlaleila aoyou louda, po khujin ka po anjinsem jaishou sühko nyi haoen lühbak weanchühashi.

²⁴Khangenbüa hoba on künbü hao Gershon chempeneibü kümsilei ki;

²⁵haoenei lemshang neichem thangtet, kamshang neichem yukbü hoba kho thükaenei kibü loneibü khonei küplepbü kamshang neichem koukhüna thangbü,

²⁶hoba khongaenei antian phobü khongmaang kouyem lam thangtetbü laoboua lemshang neichem hoba lemshon yoan ki, hoba khübü jolüh hoba kümsilei shanga peisilei pendou hoba khübü khoei ai ong kümlabü ki khübüa haoenei khangenjan.

²⁷Gershoneibü shousi shuongei kümlabü kümsilei pendou hoba haoenei künlabü on pendou hoba haoenei kümlabü pendoua Aron si haoeibü shousi shuongei sakkubü phanga kilabü, hoba kanei haoen la haoeneibü on pendou nangan phokuashi.

²⁸Kamshang neichem- a Gershoneibü shousi chempen kümsilei habü ho ki, hoba Aron ungshedboueibü shousi Ithammar phanga haoen ikjai letijan.

²⁹Merarieibü shousi shuong shanga nyi haoen chung chempen chempen weanchühjan.

³⁰Kamshang neichema kümlaleila kümtoleito atbü mütpem weko, po khujin thükae ka po anjinsem jaishou sühko nyi haoen lühbak wejan.

³¹Kamshang neichema haoenei kümlabü pendou on kho ho: lemshang neichem wa shuong, ho kümlabü; thaonyu khamthung, hoba khübü hanleplabü.

³²hoba khongmaang kaijembo thaonyu shuong, hoba khübü hanleplabü, hoba kelabü, hoba khübü jolüh peisilei pendou hoba khübü shanga ajanjan pendou yoan; hoba haoen nyen ngako haoenei künlabü on kanei lenjan.

³³Aron ungshedboueibü shou Ithamar phanga Merari shou chempen shuongei kamshang neichema haoenei kümlabü kümsilei pendou ho ki.

³⁴Mosa, Aron hoba tan leiyeibü shuongei Kohatbü chung chung, chempen chempen pakkei.

³⁵Kamshang neichema kümsilei shanga kümtoleito atbü mütpem po khujin ka thükae po anjinsem sühko;

³⁶hoba aoyou chempen chempen pakkei, khübü kho hajar nyito saongao nyetto anjinsem kikei.

³⁷Mosaeibü ik danko BUNYUBOUei sakkubü tegü, Kohat chung, kamshang neichema kümbüleibü pendou Mosa si Aronei pakan chühbü haoen habü ho ki.

³⁸Gershoneibü shousi shuong haoen chung chung, chempen chempen pakbü kho,

³⁹kamshang neichema kümsilei kümla shanga kümtoleito atbü mütpem weko po khujin thükae ka po anjinsem jaishou

⁴⁰khei haoen chung chung, chempen chempen lühbak webü hajar nyi saongao lakto khujin kikei.

⁴¹BUNYUBOUei sakkubü tegü kamshang neichema khangenbü pendou Gershoneibü shousi shuong haoen chung chung, chempen chempen Mosa si Aronei lühbak weanchühbü habü ho ki.

⁴²Merarieibü shousi shuong haoen chung chung, chempen chempen pakbü kho;

⁴³kamshang neichema kümlaleila shanga kümtoleito atbü mütpem weko po khujin thükae ka po anjinsem jaishou sühko,

⁴⁴khei haoen chung chung, chempen chempen lühbak webü kho hajar semto saoan,

⁴⁵Mosaeibü ik danko BUNYUBOUei sakkubü tegü, Merari shousi shuong haoen chempen chempen Mosa si Aronei pakbü ho ki.

⁴⁶Mosa, Aron hoba Israel leiyeibü shuongei Levibü chung chung chempen chempen pendou pakbüei,

⁴⁷kamshang neichema on künlabü kümsilei, hoba khangenla kümtoleito atbü mütpem weko po khujin thükae ka po anjinsem sühko

⁴⁸khei haoen lühbak weanchühbü hajar set saongao ngaoto saonyi kikei.

⁴⁹Mütpem weko lulueibü kümsilei hoba lulueibü on BUNYUBOUei Mosa la sakkubü tegü haoen lühbak weanchühkei.