Read Chang Naga WEJAKBÜ 5 Bible Online

WEJAKBÜ 5 - Chang Naga bible

WEJAKBÜ 5

¹BUNYUBOUei Mosa to laukei,

²“Im baubü mütmang ka saangbü, haibü to meitibü ka shonbü müt

³haoen shaishang ka nangan sattiashi dogo Israel shousi shuong la ngühkhüm kuashi; haoen bousukei yaksakei kanei shaishang khongaeto shian sattiashi; shaishang laoboua ngo kida kho haoenei ashatijan.”

⁴Israel shousi shuongei kho tegü kümbei, hoba haoen shaishang khonga apyokei; BUNYUBOUei Mosa to laubü tegü Israel shousi shuongei kümbei.

⁵BUNYUBOUei Mosa to laukei,

⁶“Israel shousi shuong to jo- yoashi: Bousu ayingsi yaksa cheei BUNYUBOU yoa mailem leiluko müteibü shabü at shonalonga hoba khünei shedbü kialonga,

⁷haoei shonbü shabü kho thekujan, hoba shedbü pendou shemjan, hoba ao to haoei amaibü kümbei hao la phejan ngaoa che aeila jinyoan kungaijan.

⁸Lausikei aola shedbü shanga sanghshemlabü ki, hao thenbou akilonga matshembü sanghsiyung kho BUNYUBOU la kulabü, kho ungshedbou shangabü yinglabü, kho to yoko shabü delabü sanlon paang laobou hao shanga shabü delabü ki.

⁹Hobaje Israel shousi shuongei heshaibü hoba saopobü jongsak ungshedbou la kulabü pendou haoeibü peisilei yeilabü.

¹⁰Hobaje mütpem wekoeibü saopobü peisilei kho hao shangabü yeilabü, aoei ai ong ungshedbou la kuda, hao shangabü yeilabü.”

¹¹BUNYUBOUei Mosa to laukei,

¹²“Israel shousi shuong to lenashi: Müt at yak amaiko yeian, hao khulimbo shabü shonalonga,

¹³hoba müt atei sao to jamalonga hoba kho saoeibü laoeibü nyekei ühüpbo kialonga hoba sao lolo shaan apan sao alapenlonga hoba sao khulimbo aukabü akilonga sao lemthek alapsije,

¹⁴khei jembü yak to maangalembü songsido che hao to kialonga,

¹⁵haoei jembü yak ungshedbou thedangto leian loujan, hoba sao shanga barli wen efa che an phejan, sao shanga lembü jungjan; khünei onang ajinjan ayingsi kho thüka ponlem hilabü haoei ajinjan, aishanga ho maangalembü shausiyung lembü ki, shabü damentiko damenlabü shausiyung lembü ki.”

¹⁶Hobaje ungshedbouei sao nyangko leijung louan BUNYUBOU thedanga phokulabü;

¹⁷ungshedbouei thamchak che ka saopobü deia jinkulabü;

¹⁸hoba yaksanyu kho BUNYUBOU thedanga lotian phokuan yaksanyueibü khua khulou sengtilabü, hoba saoeibü ika damenlabü shausiyung jungtilabü, kho maangalembü shausi- yung lembü ki; hoba ungshedbou khoei saoeibü ika khauekbü dei kho jungan kijinei khüklauoklabü.

¹⁹Hobaje ungshedbouei sao la thetilantiko yaksanyu to laulabü, “Ka to bousu aokei ayepbo kialonga hoba kalao phanga kian nyi shabü kümla ayingbü to ohauko kialonga khüksiuok baubü dei ka no satenashi.

²⁰Lausikei kalao phanga phoan no ayingbü to satan kialonga hoba no totnyinan kialonga hoba kalao to liman bousu at to yepan kialonga;

²¹(yaksanyu la khüksiuok ngüh lautiko ungshedbouei sao to laulabü): BUNYUBOUei no tetla talabü yeitishi, kaibü youshi pheitiko, hoba kaibü shimung bokbüei haoei kaibü mütshuong yoa khüksiuok yeitishi.

²²Khükbüuokbü dei khoei kaibü youshi pheitiko hoba kaibü shimung bokko nasetshang to attishi.” Hobaje yaksanyu khoei laulabü, “Amen, kho khei yingtishi.”

²³Kheijinei ungshedbouei khükbüuokbü shuong kho le chenei doan pholabü hoba kho khauekbü dei khoei nyaülettilabü;

²⁴hoba shedsikhau baubü khauekbü dei kho sao la yungtilabü hoba sao to attian sao aeibou khonkutilabü.

²⁵Hobaje ungshedbou khoei maangalembü shausiyung lembü yaksanyueibü ik ka sunglabü, hoba BUNYUBOU thedanga shausiyung lembü kho jipeilabü, hoba kho lemshang to jungan loulabü;

²⁶hoba kho damenlabü shanga ungshedbou khoei shausiyung lembü kho ikmaang shenko junglabü, hoba phaila dei kho yaksanyu la yungtilabü.

²⁷Ladang haoei sao la dei kho yungtilaje, sao totyoan kialonga saoeibü lao khulimbo shed shonan kialonga, khüktiuoktibü dei kho sao to atlabü hoba khauan aplabü, hoba sao shimung boklabü hoba sao youshi pheilabü, hoba yaksanyu kho jembü mütli yoa shedsikhau che kilabü.

²⁸Hobaje yaksanyu kho atotyoko saüenan kialonga, sao to ai ayinglabü, hoba saoei toukei shou buklabü.

²⁹Ladang yakei jembü lao phanga kian ayingbü to totyolaje, ho maangalembü ngühkhüm ki; ayingsi bousubou to maangalembü songsido che louan hao yak to maangalembo yeilaje, kheijinei haoei yaksanyu kho BUNYUBOU thedanga phokujan, hoba ungshedbouei kho ngühkhüm pendou sao to kümlabü.

³¹Hobaje bousubou to akakko kilabü, hoba kho yaksanyuei jembü shedbü künlabü.