Read Chang Naga WEJAKBÜ 6 Bible Online

WEJAKBÜ 6 - Chang Naga bible

WEJAKBÜ 6

¹BUNYUBOUei Mosa to laukei,

²Israel shousi shuong to lenashi: Ladang bousu yingasikei yaksa yingasikei jembü lolo BUNYUBOU shanga kuan apbü langkei kila Nazarit takletbü, khei lepde theletbü kilaje,

³haoei jembü lolo ih si nyakidei ka bangenlabü, haoei ih shalepbü ayingsi nyakidei haijepbü ayingsi semlühdei ih ayungjan ayingsi semlüh sangtüngbü, ayingsi linbü ashaulabü.

⁴Hao saüenan kibü chalou sünga semlüh hekei kümbü maanga lang ka khop sühko aikei haoei ashaulabü.

⁵Hao saüenan kibü takletbü chalou pendoua haoei khua khujin aikei ajinjan; chalou apen shongko laoboua haoei hao lolo khümbo saüenan BUNYUBOU shanga kilaje, hao saopotham kilabü, haoei haoeibü khulou lounyu amjan.

⁶Haoei BUNYUBOU shanga khümbo saüenan kibü chalou pendou haoei haibü mang nyangko ohaujan.

⁷Haoei jembü lolo bou shanga ayingsi nyu shanga ayingsi na shanga ayingsi nousina shanga haoen haijinei asaopoko üpjan.

⁸Hao khümbo saüenan kibü chalou pendoua BUNYUBOU junga hao saopobü ki.

⁹Hobaje müt at hao nyangko mangde haian apsi hoba saüenan phobü khu kho shaan aptialonga kheijinei haoei hao saüenbü chaloua khu shuan apjan; nyetbounyet kho haoei shuan apjan.

¹⁰Hobaje setbounyet haoei dukutuk penyi ayingsi jemau shoushou penyi ungshedbou jungto kamshang neichem koukhün jungto sungbajan.

¹¹Hobaje ungshedbou khoei che shabü lembü shanga hoba che kho juokbü lembü shanga saomei saülabü; aishanga haibü mangei haoei haoeibü shed shonkei, hoba khünyettham haoeibü khu saüenjan.

¹²Hobaje hao khümbo kuan kibü chaloua BUNYUBOU shanga bangenan kijan, hoba sanlon paang che, po cheeibü shou shedbü lembü shanga haoei sungbajan; lausikei haoei thedang to khümbo saüenan kibü chalou shuong kho haoei ashatisije khoje wean ajinlabü.

¹³Haoei khümbo saüenan kibü chalou penjinei ho Nazarit ngühkhüm ki,

¹⁴hoba haoei BUNYUBOU la haoeibü lembü kujan; juokbü lembü shanga po cheeibü sanlon paang nali athebü che, hoba po cheeibü shou sanlon pi mo alebü shabü lembü shanga hoba sanlon paang mo alebü sangmai lembü shanga lemlabü.

¹⁵Hobaje tokai ajinbü wentek kam che, wen inyaibü onang yoa nyatyobü on hoba onang tokai ajinbü wentek peklebü hoba kho yoa haoeneibü shausiyung lembü hoba haoeneibü yunglabü lembü.

¹⁶Hobaje ungshedbouei kho BUNYUBOU thedanga kulabü, hoba shabü lembü hoba juokbü lembü kulabü;

¹⁷hoba sanlon paang kho tokai ajinbü wentek kam to yoko BUNYUBOU la sangmai lembü haitian lemlabü, khoei ungshedbouei tokei shausiyung lembü hoba yunglabü lembü kulabü.

¹⁸Hobaje Nazarit hao khümbo saüenan phobü khu kho kamshang neichem koukhüna shuan aplabü, hoba khümbo saüenan kibü khu kho sangmai lembü haitibü phanga kibü wan thüka jinkulabü.

¹⁹Hobaje ungshedbou khoei thungan kibü sanlon paangeibü phak kho sunglabü hoba kam ka tokai ajinbü wen on che, hoba tokai ajinbü wentek peklebü che haoei khümbo kuan phobü khu kho shuan apan khübü kho Nazarit ika phokulabü.

²⁰Hobaje ungshedbou khoei khübü kho jipeiko lembü shanga BUNYUBOU thedanga jipeilabü; jipeibü lembü khük yoan ungshedbou shanga ho saopobü, hoba kho phaia Nazarit khoei ih yungla thükkei.

²¹Haoei hapenlabü to liman aoei theletda, haoei BUNYUBOU la haoei theletbü shanga lembü shanga Nazarit shanga ho ngühkhüm ki; haoei laobou theletkei takletbü tegütham haoei kho ngühkhüm jungeijan.

²²BUNYUBOUei Mosa to laukei,

²³Aron hoba haoeibü shousi shuong to lenashi: Kanei Israel shousi shuong ho tegü hai haükushi; kanei haoen to lenlabü:

²⁴BUNYUBOUei no haükushi, hoba no lombo kishi;

²⁵BUNYUBOUei haoeibü thenyek ka to haukushi; hoba ka to onoushi;

²⁶BUNYUBOUei ka to maangshikko ka la sangmai hakso kushi.

²⁷Hobaje BUNYUBOUei laukei, “Kho tegü Israel shousi shuong thüka haoenei kü nyen phokujan hoba ngei haoen haükulabü.”