Read Chang Naga WEJAKBÜ 8 Bible Online

WEJAKBÜ 8 - Chang Naga bible

WEJAKBÜ 8

¹BUNYUBOUei Mosa to laukei,

²“Aron to lenashi, wanthung denshang thedang aenei wanthung nyet khoei ngesakbü kujan.”

³Hobaje Aronei kho tegü kümbei; BUNYUBOUei Mosa la sakkubü tegü wanthungei thedang aenei haulabü lele haoei wanthung kho sapbei.

⁴Hobaje wanthung denshang shanga lebü kho honei chungthem ka chipen pungshang sühko jangan yeitian kümbü kikei; BUNYUBOUei Mosa la lenbü noksa tegü haoei wanthung denshang kho kümbei.

⁵BUNYUBOUei Mosa to laukei,

⁶“Israel shousi shuong yoka Levi shuong bangentiko haoen saüenkushi.

⁷Hobaje haoen hinseitila nyi haoen to hai kümshi: shabü dean apla jungeibü dei kho haoen la lakkushi, hoba haoeneibü mang pendou kheijinei shuan apbushi, hoba haoeneibü neisimei sakan apbushi hoba haoen lolo hinseitishi.

⁸Kho phaia haoenei masu pongsu che sungan, hoba khoeibü shausiyung lembü shanga onang to kheiyobü wen inyaibü hoba nyi shabü lembü shanga masu paangshou che lejan.

⁹Hobaje nyi Levi shuong kamshang neichem to leian loujan, hoba nyi Israel shousi shuong khümbo yoshaitijan;

¹⁰hoba nyi Levi shuong BUNYUBOU thedanga phokujan, hoba Israel shousi shuongei Levi shuong to ikei shangetjan;

¹¹hoba Levi shuongei BUNYUBOU shanga kümsilei kümlabü, Israelbü ka jipbü lembü che tegü Aronei haoen BUNYUBOU thedanga kujan.

¹²Hobaje Levi shuongei masu pongsu shuongeibü khua haoeneibü ikei shangetjan; hoba Levi shuong shanga shabü dean apla shabü lembü shanga che, hoba che kho juokbü lembü shanga nyi BUNYUBOU to lemjan.

¹³“Kho phaia nyi Levi shuong Aron si haoeibü shousi shuong thedanga lotiashi, hoba haoenei haoen BUNYUBOU thedanga jipbü lembü shanga kutiashi;

¹⁴kho nyi Levi shuong Israel shousi shuong yo ka bangentiashi; hoba Levi shuong kho ngeibü yinglabü.

¹⁵Hobaje nyi haoen saüenkuan, hoba jipbü lembü shanga haoen leman phaia, kho phaia Levi shuongei kamshang neichem kümsilei kümla atjan.

¹⁶Aishanga Israelbü ka kü shanga khangenla haoen pienakei; Israelbü shaang bukbü shou pendou aoyouei shaangla nasetshang ipbei, haoen pendou jeila kü shanga ngei haoen lea.

¹⁷Aishanga müt si meisiau shaang hapbü ham kho Israel shousi yo ka pendou ngeibü, Ijep kaodaka shaang bukbü haitibü chaloua ngei haoen kü shanga pienan phoa.

¹⁸Hobaje Israelbü yoa shaang bukbü pendou jeila ngei Levi shuong lea.”

¹⁹Israelbü shuong lemshang nyangko loujinei haoen to shieikoe asühlabü, hoba Israel shousi shuong shabü dean apla shanga kamshang neichema Israel shousi shuong kümlaleila Israel shousi yo ka ngei Levi shuong Aron hoba haoeibü shousi shuong la khangenla kua.

²⁰Kho tegü Mosa si Aron hoba Israelbü pendouei Levi shuong to kümbei. Levi shuong shanga BUNYUBOUei Mosa la sakkubü tegü Israelbü shuongei kümbei.

²¹Hobaje Levi shuongei haoen lolo shabü ka hinseian haoenei haoeneibü neisimei sakkei; hoba BUNYUBOU thedanga Aronei jipbü lembü shanga haoen shanga lembei.

²²Hobaje kho phaia Aron hoba haoeibü shousi shuong thedanga kamshang neichema kümlaleila Levi shuong atkei; Levi shuong shanga BUNYUBOUei Mosa la sakkubü tegü haoenei haoen to kümbei.

²³Hobaje BUNYUBOUei Mosa to laukei,

²⁴“Levi shuong shanga ngühkhüm habü ho ki: po saoto ngao jai onbü thükae ka haoen kamshang neichema kümtoleito atlabü;

²⁵lausikei po anjinsem onan phaia kümkaleika thaklabü, hoba touje akümaleilabü.

²⁶Haoenei kamshang neichema jembü jaisinasi shuong kümaleia thuila thükkei, lausikei kümaleia akhangenjan. Ho tegü Levi shuong kümaleia nyi haoen to kümjan.”